ಕನಿಷ್ಠ ತಾವಾದ (Minimalism)

ಕನಿಷ್ಠ ತಾವಾದ   (Minimalism)

        ಚಿತ್ರ ಕೃಪೆ: ಅಂತರ್ಜಾಲ 


ಹಣದ ಕೊರತೆ ಹಾಗೂ ಅದರ ಚಿಂತೆ ಇವುಗಳನ್ನೆಲ್ಲಾ ಕಡಿಮೆ ಮಾಡಲು ಸರಿಯಾದ ಜೀವನ ಶೈಲಿ ಆಯ್ಕೆ ಪ್ರಮುಖ ಪಾತ್ರ ವಹಿಸುತ್ತದೆ. ಇವುಗಳಿಗೆ ಮಿನಿಮಲಿಸಂ ( ಕನಿಷ್ಠ ತಾವಾದ ) ಜೀವನಶೈಲಿ ಅತಿದೊಡ್ಡ ಕೊಡುಗೆ ನೀಡುತ್ತದೆ, ಅದೇನೆಂದು  ತಿಳಿಯೋಣ. 

ಕನಿಷ್ಠ ತಾವಾದ ಅಥವಾ ಮಿನಿಮಲಿಸಂ ಎಂದರೆ ಏನು 
              ಜೀವನದಲ್ಲಿ ನಮಗೆ ಅವಶ್ಯಕತೆ ಇರುವ ವಸ್ತು, ಸೇವೆಗಳನ್ನು ಗುರುತಿಸಿ ಅವುಗಳನ್ನು ಮಾತ್ರ ಇಟ್ಟುಕೊಳ್ಳುವುದು, ಬಳಕೆ ಮಾಡುವುದು ಇದನ್ನು ಹೊರತುಪಡಿಸಿ ಉಳಿದಿದ್ದೆಲ್ಲ ಅನಾವಶ್ಯಕ ಎಂದು ಮನಗಂಡು ಅವುಗಳನ್ನು ನಮ್ಮ ಜೀವನದಿಂದ ಹೊರಗೆ ಇಡುವುದೇ ಕನಿಷ್ಠ ತಾವಾದ ಅಥವಾ ಮಿನಿಮಲಿಸಂ 

ನಾವು ಹಿಂದಿನ ಲೇಖನಗಳಲ್ಲಿ ಓದಿದಂತೆ ನಾವು ಬಳಸುವ ಸೇವೆಗಳ ಮತ್ತು ಉತ್ಪನ್ನಗಳ  ದೊಡ್ಡ ಪಟ್ಟಿಯೇ ಇದೆ. ಇವುಗಳಲ್ಲಿ ನಿಜವಾಗಲೂ ಯಾವುದು ಅವಶ್ಯಕತೆ ಇದೆಯೋ, ನಿಜವಾಗಲೂ ಯಾವುವನ್ನು ಬಳಸುತ್ತೇವೆಯೋ ಅಂತಹ ಉತ್ಪನ್ನಗಳನ್ನು, ವಸ್ತುಗಳನ್ನು ಮಾತ್ರ ನಾವು ಇಟ್ಟುಕೊಳ್ಳಬೇಕು, ಉಳಿದವೆಲ್ಲವು ನಮ್ಮ ಮನೆಯಲ್ಲಿ ಕಸವಾಗಿ ಉಳಿದುಬಿಡುತ್ತವೆ, ಹೌದು ಕಸವಾಗಿ ಹೆಚ್ಚಿನ ಸ್ಥಳಾವಕಾಶವನ್ನು ಕೇಳುತ್ತಾ, ಧೂಳು ಹಿಡಿದು ಕುಳಿತುಕೊಳ್ಳುತ್ತವೆ, ಅವುಗಳ ದುರಸ್ತಿ, ಸ್ವಚ್ಛತೆ, ನಿರ್ವಹಣೆ ನಮಗೆ ಅನಗತ್ಯ ವೆಚ್ಚದ ಹೊರೆಯನ್ನು ತಂದುಕೊಡುತ್ತವೆ. ಇದರಿಂದ ಹಣದ ದುಂದು ವೆಚ್ಚ, ಅದುವೇ ಬೇಡದ ಕಸವಾಗಿ ಕೂರುವ ವಸ್ತುಗಳಿಗಾಗಿ. ಇವುಗಳಿಂದ ಶ್ರಮ ಹೆಚ್ಚಾಗುತ್ತದೆ, ಸಮಯ ಹಾಳಾಗುತ್ತದೆ, ಹಣದ  ವ್ಯರ್ಥ.  ಹೀಗಾಗಿ ಈ ಎಲ್ಲಾ ಸಮಸ್ಯೆಗಳಿಂದ ಮುಕ್ತಿ ಹೊಂದಲು ನಾವು ಪ್ರಜ್ಞಾಪೂರ್ವಕವಾಗಿ ಮಿನಿಮಲಿಸಂ (ಕನಿಷ್ಠ ತಾವಾದ ) ಅನ್ನು ಅನುಸರಿಸಬೇಕು. ಇದರಿಂದ ಪ್ರಜ್ಞಾಪೂರ್ವಕವಾಗಿ ಮನೆಗೆ ಬರುವ ಪ್ರತೀ ವಸ್ತುವಿನ ಅವಶ್ಯಕತೆಗಳನ್ನು ಅರ್ಥಮಾಡಿಕೊಂಡು ನಾವುಗಳು ತರುವುದು ಬಿಡುವುದು ನಿರ್ಧರಿಸಬಹುದು.

       ಮಿನಿಮಲಿಸಂ ಕೇವಲ ಭೌತಿಕ ವಸ್ತುಗಳಿಗೆ ಅನ್ವಯಿಸುವುದಿಲ್ಲ ಜೊತೆಗೆ ಡಿಜಿಟಲ್ ಜಗತ್ತಿನಲ್ಲೂ ಈ ಕನಿಷ್ಠತಾವಾದವನ್ನು  ನಾವು ಅಳವಡಿಸಿಕೊಳ್ಳಲೇಬೇಕು. ನಾವು ಹಲವಾರು ವಾಟ್ಸಾಪ್ ಗುಂಪುಗಳಲ್ಲಿ ಸದಸ್ಯರಾಗಿ ಜನರು ಕಳಿಸುವ ನಮ್ಮ ಜೀವನದಲ್ಲಿ ವ್ಯತ್ಯಾಸ ಮಾಡದ, ಪ್ರಭಾವ ಬೀರದ, ಅನಗತ್ಯ ಚಿತ್ರಗಳು, ಉಕ್ತಿಗಳು, ವಿಡಿಯೋಗಳು ಬರುತ್ತಲೇ ಇರುತ್ತವೆ. ಇವುಗಳು ನಮ್ಮ ಡಿಸ್ಕ್ ನಲ್ಲಿ  ಅನಗತ್ಯವಾದ ಸಂಖ್ಯೆಯಲ್ಲಿ  ಕುಳಿತು  ಬಿಡುತ್ತದೆ. ಇವುಗಳ ಮಧ್ಯದಲ್ಲಿ ನಾವು ಉಪಯೋಗಿಸುವ ಪ್ರಮುಖವಾದ ಕಡತಗಳು ಯಾವುದೋ ಮೂಲೆಯಲ್ಲಿ ಕುಳಿತಿರುತ್ತದೆ. ಅವುಗಳನ್ನು ಹುಡುಕುವುದು ದುಸ್ತರವಾಗುತ್ತದೆ, ಬೇಕೆಂದಾಗ ತಕ್ಷಣ ಸಿಗುವುದಿಲ್ಲ. ಇದರಿಂದ ಅನಗತ್ಯ ಆತಂಕ, ಹಾಗಾಗಿ ಡಿಜಿಟಲ್ ಲೋಕದಲ್ಲಿ ನಾವು ಅನಗತ್ಯ ಕಡತಗಳನ್ನು, ಚಿತ್ರಗಳನ್ನು, ವಿಡಿಯೋಗಳನ್ನು ಅಳಿಸಿ ಹಾಕಿ  ಕೇವಲ ಉಪಯೋಗಿಸುವ ಕಡತಗಳನ್ನು ಮಾತ್ರ ಉಳಿಸಿಕೊಂಡು ಬೇಕಾಗಿದ್ದನ್ನು ಹುಡುಕುವ ಅನಗತ್ಯ ಶ್ರಮದಿಂದ ತಪ್ಪಿಸಿ ಕೊಳ್ಳಬಹುದು. ಸಮಯ ವ್ಯರ್ಥ ದಿಂದ ಹಾಗೂ ಡಿಸ್ಕ್ ನಲ್ಲಿ ಸ್ಥಳಾವಕಾಶದ ಕೊರತೆಯಿಂದ  ಕಾಪಾಡಿಕೊಳ್ಳಬಹುದು.  

        ಮಿನಿಮಲಿಸಂ ನಿಂದ ಈ ಕೆಳಗಿನ ಲಾಭಗಳನ್ನು ನಾವು ಪಡೆಯಬಹುದು:

1. ಅನಗತ್ಯ ವಸ್ತುಗಳು ಕಡಿಮೆಯಾಗಿ ಮನೆಯಲ್ಲಿನ ಸ್ವಚ್ಛತೆ ಹೆಚ್ಚಾಗುತ್ತದೆ  

2. ಗೊಂದಲಗಳು ಕಡಿಮೆಯಾಗಿ ಮನಸು ಶಾಂತವಾಗಿರುತ್ತದೆ 

3. ವಸ್ತುಗಳ ಹುಡುಕಾಟದ ಸಮಸ್ಯೆ ಇರುವುದಿಲ್ಲ 

4. ಮನೆಯ ಉತ್ಪನ್ನಗಳನ್ನು ಮೇಲ್ದರ್ಜೆಗೇರಿಸುವ, ನಿರ್ವಹಣೆ ಮಾಡುವ, ದುರಸ್ತಿ ಮಾಡಿಸುವ ಖರ್ಚು     ವೆಚ್ಚಗಳು ಗಣನೀಯವಾಗಿ ಕಡಿಮೆಯಾಗಿ ಹಣದ ಉಳಿತಾಯವಾಗುತ್ತದೆ. 

5. ನಿಮ್ಮನ್ನು ನೀವು ಅರ್ಥಮಾಡಿಕೊಳ್ಳಲು ನೆರವಾಗುತ್ತದೆ 

6. ಬೇಡ ಅಥವಾ ಸಾಕು ಎಂದು ಹೇಳಲು ಕಲಿಯುತ್ತೀರಿ 

7. ಜೀವನದಲ್ಲಿ ಅರ್ಥಪೂರ್ಣತೆ  ಹಾಗೂ ತೃಪ್ತಿಗೆ ಮಹತ್ವದ ಕೊಡುಗೆ ನೀಡುತ್ತದೆ 

8. ಜೀವನ ಸರಳ ಹಾಗೂ ಸುಲಭ ಎಂಬ ವಾಸ್ತವ ಅರ್ಥವಾಗುತ್ತದೆ 

9. ಮನೆ ಬದಲಾಯಿಸಿದಾಗ ಮನೆ ವಸ್ತುಗಳ ಸಾಗಾಣೆ ಸುಲಭವಾಗುತ್ತದೆ 

10. ಪ್ರಕೃತಿಗೆ ಕಸ ಹಾಕದೆ ಪರಿಸರ ಸ್ನೇಹಿಯಾಗಿರುತ್ತದೆ.

11. ಡಿಜಿಟಲ್ ಮಿನಿಮಲಿಸಂ ನಿಮಗೆ ಗಮನ-ಭಂಗ ಕಡಿಮೆ ಮಾಡುತ್ತದೆ. 

12. ಉಳಿತಾಯ ಹೆಚ್ಚಾಗಿ  ವಸ್ತುಗಳ ಖರೀದಿಗೆ ಸಾಲದ ಅಗತ್ಯ ಇರುವುದಿಲ್ಲ

13. ಸಾಮಾನ್ಯ ಪ್ರಜ್ಞೆ ಹಾಗೂ ಬುದ್ಧಿವಂತಿಕೆಯ ಪ್ರಯೋಗ ಹೆಚ್ಚಾಗುತ್ತದೆ 

ಅಗತ್ಯ ಮತ್ತು ಆಸೆ:

     ಸಾಮಾನ್ಯವಾಗಿ ಒಂದು ಉತ್ಪನ್ನವನ್ನು ತಯಾರಿಸುವಾಗ, ಅವುಗಳ ಹಲವು ರೂಪಾಂತರಗಳನ್ನು ಉತ್ಪಾದಿಸುತ್ತಾರೆ. ಉದಾಹರಣೆಗೆ ನೀವು ಕಾರು ಖರೀದಿಸಲು ಹೋದರೆ ಬೇಸಿಕ್ ಮಾಡೆಲ್ ನಂತರ ಐಷಾರಾಮಿಯ ಹಲವು ರೂಪಾಂತರ ಮಾಡೆಲ್ ಗಳು ನಮಗೆ ನೋಡಲು ದೊರೆಯುತ್ತದೆ. ಆದರೆ ಕಾರು ಒಂದೇ ಆಗಿರುತ್ತದೆ ಅಂದರೆ ಬೇಸಿಕ್ ಮಾಡೆಲ್ ನ ಕಾರು ನಿಮ್ಮ ಅವಶ್ಯಕತೆಗಳನ್ನು ಪೂರೈಸಿದರೆ, ಮೇಲ್ದರ್ಜೆಯ ಮಾಡೆಲ್ ಕಾರ್ ಗಳು ನಿಮ್ಮ ಆಸೆ ಹಾಗೂ ಅವಶ್ಯಕತೆ ಎರಡನ್ನು ಪೂರೈಸುತ್ತದೆ ಅಂದರೆ ನೋಡಲು ಆಕರ್ಷಕವಾಗಿರುತ್ತದೆ, ಐಷಾರಾಮಿ ವೈಶಿಷ್ಟ್ಯಗಳನ್ನು ಹೊಂದಿರುತ್ತದೆ. ಹೀಗಾಗಿ ಅವಶ್ಯಕತೆಯ ವಸ್ತುವೇ ಬೇರೆ, ಆಸೆ ಪಟ್ಟ ವಸ್ತುವೇ ಬೇರೆ ಇರುವುದಿಲ್ಲ, ಒಂದೇ ಉತ್ಪನ್ನದಲ್ಲಿ ನಾವು ಅವಶ್ಯಕತೆ ತಕ್ಕಂತೆ ಬೇಸಿಕ್ ಮಾಡೆಲ್ ನ ತಯಾರಿಸಬಹುದು ಅಥವಾ ಐಷಾರಾಮಿ ಉತ್ಪನ್ನವಾಗಿ ಉತ್ಪಾದಿಸಬಹುದು.  
     ಈ ಮೇಲಿನ ಸ್ಪಷ್ಟತೆಯಿಂದ ನಾವು ತಿಳಿದುಕೊಂಡ ವಿಷಯವೇನೆಂದರೆ ಮನೆಯಲ್ಲಿರುವ ವಸ್ತುಗಳ ಸಂಖ್ಯೆಯನ್ನು ಹೆಚ್ಚಿಸದೆ ನಾವು ಬಯಸಿದಂತಹ ವಸ್ತುಗಳನ್ನು ಮಾತ್ರ ಕೊಂಡು ಕನಿಷ್ಠತಾವಾದವನ್ನು ಅಳವಡಿಸಿಕೊಳ್ಳಬಹುದು. 

ವೆಚ್ಚಗಳ ಸ್ಪಷ್ಟತೆ ಹಾಗೂ ನಿರ್ವಹಣಾ ಯೋಜನೆಗಳು

ವೆಚ್ಚಗಳ ಸ್ಪಷ್ಟತೆ ಹಾಗೂ ನಿರ್ವಹಣಾ ಯೋಜನೆಗಳು  

 ನೀವು ನಿಮ್ಮ ಖರ್ಚು ವೆಚ್ಚಗಳ ಅನುಸರಣೆ ಮಾಡಿದ್ದಲ್ಲಿ, ನಿಮಗೆ ನಿಮ್ಮ ಮಾಲೀಕತ್ವದಲ್ಲಿ ಇರುವ ವ್ಯಕ್ತಿಗಳು, ಉತ್ಪನ್ನಗಳ  ಬಗ್ಗೆ ಸ್ಪಷ್ಟವಾದ ತಿಳುವಳಿಕೆ ಮೂಡುತ್ತದೆ ಹಾಗೆಯೇ  ನೀವು ಪಡೆಯುವ ಸೇವೆಗಳ ಬಗ್ಗೆ ನಿಮ್ಮ ತಿಳುವಳಿಕೆ ಸ್ಪಷ್ಟವಾಗುತ್ತಾ ಹೋಗುತ್ತದೆ. ಈಗ ನಿಮ್ಮ ಬಳಿಯಲ್ಲಿ ಲಭ್ಯವಿರುವ ದತ್ತಾಂಶಗಳನ್ನು ರಚನಾತ್ಮಕವಾಗಿ  ರಚಿಸಿ  ವಿಶ್ಲೇಷಣೆ ಮಾಡಿದರೆ ಮನೆಯ ಸದಸ್ಯರ ಹಾಗೂ ಮನೆಯಲ್ಲಿರುವ ಪ್ರತಿ ಉತ್ಪನ್ನಗಳ ಸ್ವಭಾವಗಳು, ಅವುಗಳ ಆರೋಗ್ಯ, ಆಯಸ್ಸು, ಅದರ ನಿರ್ವಹಣೆಯ ಅವಶ್ಯಕತೆಗಳು ಅರ್ಥವಾಗುತ್ತದೆ. 

ನಾವು ಮಾಡುವ ವಿಶ್ಲೇಷಣೆಯಲ್ಲಿ ಈ ಕೆಳಕಂಡ ವಿಷಯಗಳು ನಮಗೆ ಸ್ಪಷ್ಟವಾಗಿ ತೋರುತ್ತವೆ. ಅವುಗಳೆಂದರೆ

1. ಪ್ರತಿ ತಿಂಗಳು ಸೇವೆಗಳ ಬಿಲ್ ಜೊತೆಗೆ ಹೊಸ ಉತ್ಪನ್ನಗಳ ಖರೀದಿ ಇದ್ದೆ ಇರುತ್ತದೆ, ಜೊತೆಗೆ ಇರುವ ಉತ್ಪನ್ನಗಳ ದುರಸ್ತಿ ಹಾಗೂ ನಿರ್ವಹಣಾ ವೆಚ್ಚ ಇದ್ದೆ ಇರುತ್ತದೆ. 

2. ಪ್ರತಿ ತಿಂಗಳು ಬರುವ ಸೇವಾ ಬಿಲ್ ಗಳು  ಖರ್ಚಿನ ನಿಶ್ಚಿತ ರೂಪ ಕೊಡಬಹುದು ಆದರೆ ವಸ್ತುಗಳ ಅಥವಾ ಉತ್ಪನ್ನಗಳ ಖರೀದಿ ಹಾಗೂ ದುರಸ್ತಿ ಎಂದಿಗೂ ಅನಿಶ್ಚಿತ ವಾಗಿರುತ್ತದೆ.

3. ಯಾವುದೇ ದುಬಾರಿ ಉತ್ಪನ್ನಗಳು ಉದಾಹರಣೆಗೆ ಮನೆ, ವಾಹನಗಳು  ಹಾಗೂ ಇತರೆ ದುಬಾರಿ  ಗೃಹಪಯೋಗಿ ವಸ್ತುಗಳು ಸಾಲಕ್ಕೆ ಎಡೆಮಾಡಿಕೊಟ್ಟಿವೆ.

4. ಭವಿಷ್ಯದ ಅಭಿವೃದ್ಧಿ ಯೋಜನೆಗಳಿಗೆ ಹಾಗೂ ಖರ್ಚುಗಳಿಗೆ ಉಳಿತಾಯದ ಅವಕಾಶಗಳಿವೆಯೇ ಹಾಗೂ ವೃದ್ಧಿಗಾಗಿ ಹೂಡಿಕೆ ಸಾಧ್ಯವೇ 

5. ಮನೆಯಲ್ಲಿ ಆಗುವ ಖರ್ಚುಗಳನ್ನು ಅತಿ ಹೆಚ್ಚು ಮಾಡುವವರು ಯಾರು, ಅದರಲ್ಲಿ ದುಂದು ವೆಚ್ಚ ಏನಾದರೂ ಇದೆಯೇ.  

6. ಮನೆಯ ಸದಸ್ಯರಲ್ಲಿ ಯಾರಿಗೆ ಯಾವ ತರಹದ ಆರೋಗ್ಯ ಸಮಸ್ಯೆಗಳಿವೆ ಹಾಗೂ ಅವುಗಳ ಚಿಕಿತ್ಸೆ, ನಿರ್ವಹಣೆ. 

7. ಮನೆಯಲ್ಲಿನ ಹಣದ ಬೇಡಿಕೆ ಮತ್ತು ಪೂರೈಕೆ

8. ಸೇವಾ ವಲಯಗಳಿಗಿಂತ ಉತ್ಪನ್ನಗಳು ಹೆಚ್ಚಿನ ಹತೋಟಿ,  ಸ್ವಾತಂತ್ರ್ಯ,  ಹಾಗೂ ಸೇವೆಗಳನ್ನು ನೀಡುತ್ತವೆ. 

9. ಉತ್ಪನ್ನಗಳ ನಿರ್ವಹಣೆ ಅವುಗಳ ದುರಸ್ತಿಗಿಂತ ಅಗ್ಗವಾಗಿರುತ್ತದೆ 

10. ಉತ್ಪನ್ನಗಳ ದುರಸ್ತಿಯು ಅವುಗಳ ಖರೀದಿಗಿಂತ ಅಗ್ಗವಾಗಿರುತ್ತದೆ 


ಸುಧಾರಣಾ ಕ್ರಮಗಳು 

ನಾವು ವಿಶ್ಲೇಷಿಸಿ ಗಮನಿಸಿದ ಸಮಸ್ಯೆಗಳನ್ನು ಅಥವಾ ಪರಿಹರಿಸಬಹುದಾದ ಅವಕಾಶಗಳನ್ನು ತಿಳಿದುಕೊಂಡಾಗ ಅವುಗಳ ಸುಧಾರಣೆಗೆ ಕ್ರಮಗಳನ್ನು ಕಂಡುಕೊಳ್ಳಬಹುದು. ಅವುಗಳು ಹೇಗೆ ಮಾಡಬಹುದೆಂದು ಕೆಳಗಿನ ಉದಾಹರಣೆಗೆ ಕೊಟ್ಟ ಪರಿಹಾರಗಳನ್ನು ತಿಳಿಯೋಣ.

ಮೊದಲನೆಯದಾಗಿ ಉತ್ಪನ್ನಗಳ ಬಳಕೆಯಿಂದ ಸಿಗುವ ಅನುಕೂಲ, ಲಾಭಗಳನ್ನು ಬಳಸಿಕೊಳ್ಳಬಹುದು. ಸೇವಾ ವಲಯವು ಒದಗಿಸುವ ಸೇವೆಗಳಿಗಿಂತ, ನಾವು ಹೇಗೆ ಅದೇ ಸೇವೆಗಳನ್ನು ಒದಗಿಸುವ ಉತ್ಪನ್ನಗಳನ್ನು ಖರೀದಿಸಿ, ಬಳಕೆ ಮಾಡಿಕೊಳ್ಳಬಹುದು ಎಂಬುದನ್ನು ಅರಿತು. ಆ ಉತ್ಪನ್ನಗಳನ್ನು ತಂದು ಪ್ರತಿಷ್ಠಾಪಿಸಿ, ಅದರ ಸೇವೆಯನ್ನು ಬಳಕೆ ಮಾಡುವುದರಿಂದ ಸೇವೆದಾರರ ಮೇಲೆ ಅವಲಂಬನೆ ತಪ್ಪಿಸಬಹುದು ಹಾಗೂ ಖರ್ಚುಗಳನ್ನು ಗಣನೀಯವಾಗಿ ತಗ್ಗಿಸಬಹುದು.  

ಉದಾಹರಣೆಗೆ ಸೌರಶಕ್ತಿಯಿಂದ ವಿದ್ಯುಚ್ಛಕ್ತಿ ನಾವೇ ಉತ್ಪಾದಿಸಿ ಅದನ್ನು ಬಳಕೆ ಮಾಡಬಹುದು, ಹಾಗೂ ವಿದ್ಯುತ್ ಸಂಸ್ಥೆಗೆ ಮಾರಾಟವು ಮಾಡಬಹುದು.

ವಿದ್ಯುತ್ ಚಾಲಿತ ವಾಹನಗಳಿಂದ, ವಾಹನಕ್ಕೆ ಬೇಕಾಗುವ ಶಕ್ತಿಯನ್ನು ನಾವೇ  ಮನೆಯಲ್ಲೇ ಪೂರೈಕೆ ಮಾಡಬಹುದು  ಹಾಗೂ  ಇಂಧನಗಳ ಖರೀದಿಯನ್ನು  ತಪ್ಪಿಸಬಹುದು.
 
ಮನೆಯಲ್ಲಿ ದಿನನಿತ್ಯದ ಸ್ವಚ್ಛತಾ ಕಾರ್ಯಗಳನ್ನು ವಾಷಿಂಗ್ ಮಷೀನ್, ಡಿಶ್ ವಾಶರ್ ಹಾಗೂ ರೋಬೋ ಯಂತ್ರಗಳ ಸಹಾಯದಿಂದ ನಿಭಾಯಿಸಬಹುದು ಇದರಿಂದ ಸಹಾಯಕರನ್ನು  ನೇಮಿಸಿ, ಸಂಬಳ ಕೊಡುವ ಖರ್ಚನ್ನು ತಪ್ಪಿಸಬಹುದು ಇತ್ಯಾದಿ. 

 ಚಿಕಿತ್ಸೆಗಿಂತ ತಡೆಗಟ್ಟುವಿಕೆ ಉತ್ತಮ: (Prevention is better than cure)

ನಮ್ಮ ಮನೆಯ ಸದಸ್ಯರು ಹಾಗೂ ನಮ್ಮ ಬಳಿ ಇರುವ ಮನೆ ಕಟ್ಟಡ, ಮನೆಯ ಗೃಹಪಯೋಗಿ ವಸ್ತುಗಳು, ವಾಹನಗಳು ಇವೆಲ್ಲವಕ್ಕೂ ಕಾಲ ಕಾಲಕ್ಕೆ ಸಮಸ್ಯೆಗಳು ಕಾಡುತ್ತಿರುತ್ತವೆ ಹಾಗಾಗಿ ನಮ್ಮ ಜನರ ಹಾಗೂ ವಸ್ತುಗಳ, ಉತ್ಪನ್ನಗಳ ಆರೋಗ್ಯದ ಸ್ಥಿರತೆ ಹಾಗೂ ಸುಸ್ಥಿತಿಯನ್ನು ಕಾಪಾಡಿಕೊಳ್ಳಲು ನಿರ್ವಹಣೆ ಅತ್ಯಗತ್ಯ. ಏಕೆಂದರೆ ನಿರ್ವಹಣೆ ದುರಸ್ತಿಗಿಂತ ಅಗ್ಗವಾಗಿರುತ್ತದೆ ಹಾಗೂ ದುರಸ್ತಿಯು  ಖರೀದಿಗಿಂತ ಅಗ್ಗವಾಗಿರುತ್ತದೆ. ಹಾಗೆಯೇ ನಿರ್ವಹಣೆಯಿಂದ ಎಲ್ಲದರ ಆಯಸ್ಸು, ಬಾಳಿಕೆ ಹೆಚ್ಚಾಗುತ್ತದೆ. ಅದೇ ರೀತಿಯಲ್ಲಿ ಖರ್ಚು, ಶ್ರಮ, ಆತಂಕ ಗಣನೀಯವಾಗಿ ತಗ್ಗುತ್ತದೆ. ಆದುದರಿಂದ ಈ ಪ್ರಕ್ರಿಯೆ, ವ್ಯವಸ್ಥೆ ಅತಿ ಪ್ರಮುಖ ಪಾತ್ರ ವಹಿಸುತ್ತದೆ.

        ನಮ್ಮಲ್ಲಿರುವ ಯಾವುದೇ ಉತ್ಪನ್ನಗಳ ಆಗಲಿ ಅವು ವಿದ್ಯುತ್ ಅಥವಾ ವಿದ್ಯುನ್ಮಾನ ಸಾಧನಗಳು,  ಸ್ವಯಂ ಚಾಲಿತ ಯಂತ್ರಗಳು, ಉಪಕರಣಗಳು, ಪರಿಕರಗಳು  ಹೀಗೆ ಮನೆಯ ಸಾಧನಗಳು ಕೆಟ್ಟು ದುರಸ್ತಿಗೆ ಬರುವ ಸಾಧ್ಯತೆಗಳು ಸದಾ ಇರುತ್ತದೆ. ಆದುದರಿಂದ ಕೆಡುವುದನ್ನು ತಡೆಗಟ್ಟಬೇಕಾದರೆ ನಾವು ಅವುಗಳ ನಿರ್ವಹಣೆ ಮಾಡುವುದು ಅತಿ ಮುಖ್ಯವಾಗಿರುತ್ತದೆ. ಏಕೆಂದರೆ ಕಾಲ ಕಾಲಕ್ಕೆ ನಿರ್ವಹಣೆ ಮಾಡುವುದರಿಂದ  ಉತ್ಪನ್ನಗಳು ಕೆಡುವುದನ್ನು ತಡೆಗಟ್ಟಬಹುದು, ಇದರಿಂದ ದುರಸ್ತಿಯ ಅನಗತ್ಯ ಶ್ರಮ, ಖರ್ಚು ಹಾಗೂ ಸಮಯದ ಉಳಿತಾಯವಾಗುತ್ತದೆ. ಉತ್ಪನ್ನಗಳು ದೀರ್ಘಕಾಲ ಬಾಳಿಕೆ ಬರುತ್ತವೆ. ಇದರಿಂದ ದೊಡ್ಡ ಪ್ರಮಾಣದಲ್ಲಿ ಹಣ ಖರ್ಚಾಗುವದನ್ನು ತಡೆಯಬಹುದು ಹಾಗೂ ಉಳಿತಾಯ ಹೆಚ್ಚು ಮಾಡಬಹುದು . 

ಉದಾಹರಣೆಗೆ ಜಲ ಶುದ್ಧೀಕರಣ ಯಂತ್ರವನ್ನು ಕಾಲಕಾಲಕ್ಕೆ ಸ್ವಚ್ಛಗೊಳಿಸಿ ಅದರ ಕ್ಯಾಂಡಲ್ ಗಳನ್ನು ಬದಲಾಯಿಸಿ ನಿರ್ವಹಣೆ ಮಾಡಬೇಕು. 

ಇದೇ ರೀತಿಯಲ್ಲಿ ಗಡಸು ನೀರನ್ನು ಮೆದು ನೀರಾಗಿ ಪರಿವರ್ತಿಸುವ ಯಂತ್ರಕ್ಕೆ ಸರಿಯಾದ ಉಪ್ಪನ್ನು ಹಾಕಿ ಕಾಲ ಕಾಲಕ್ಕೆ ತಂತ್ರಜ್ಞರಿಗೆ ತೋರಿಸಿ ಅದನ್ನು ಕಾಪಾಡಿಕೊಳ್ಳಬೇಕು. 

ನಿಮ್ಮ ವಾಹನಗಳನ್ನು ಕಾಲ ಕಾಲಕ್ಕೆ ಸರ್ವಿಸ್ ಮಾಡಿಸಿ, ಆಯಿಲ್ ಬದಲಾಯಿಸಿ, ಸ್ವಚ್ಛಗೊಳಿಸಿ ಕಾಪಾಡಿಕೊಳ್ಳಬೇಕು    

   ಮನೆಯ ಸದಸ್ಯರ ಅಥವಾ ನಿಮ್ಮ ಆರೋಗ್ಯ ಸಮಸ್ಯೆಗಳು ಚಿಕ್ಕದಿದ್ದಾಗ, ಪ್ರಾಥಮಿಕ ಹಂತದಲ್ಲಿ ಇದ್ದಾಗಲೇ ಅದನ್ನು ಗುರುತಿಸಿ ಅದಕ್ಕೆ ಸೂಕ್ತ ಚಿಕಿತ್ಸೆ ಕೊಡುವುದರಿಂದ ಅದು ಮುಂದೆ ಉಲ್ಬಣಗೊಳ್ಳುವ ದರಿಂದ ತಡೆಯಬಹುದು.  ಜನರು ತಮ್ಮ ಆರೋಗ್ಯವನ್ನು ಮುಂಜಾಗ್ರತೆಯಿಂದ ನೋಡಿಕೊಳ್ಳಬೇಕು ಅಂದರೆ ಪೌಷ್ಟಿಕ ಆಹಾರದ ಸೇವನೆ, ಸರಿಯಾದ ಶಿಸ್ತುಬದ್ಧ ವ್ಯಾಯಾಮ, ಕಾಲಕಾಲಕ್ಕೆ ಆರೋಗ್ಯ ತಪಾಸಣೆ ಹೀಗೆ ಮಾಡುವುದರಿಂದ ನಿಮ್ಮ ಆರೋಗ್ಯದ ಬಗ್ಗೆ ಅರಿವು ಹೆಚ್ಚಾಗಿರುತ್ತದೆ. ಇದು ಆರೋಗ್ಯವನ್ನು ಸುಸ್ಥಿತಿಯಲ್ಲಿ ಕಾಪಾಡಬಹುದು. 

ಹಲ್ಲುಗಳನ್ನು ಸ್ವಚ್ಛವಾಗಿಡಬೇಕು, ಊಟವಾದ ತಕ್ಷಣ ಬಾಯನ್ನು ಮುಕ್ಕಳಿಸಿ ಸ್ವಚ್ಛವಾಗಿಡುವ ಮೂಲಕ ಹಲ್ಲು ಜುಮ್ ಜುಮ್ ಅನ್ನುವುದನ್ನು ತಪ್ಪಿಸಬಹುದು.

ದಿನದಲ್ಲಿ ಯಥೇಚ್ಛವಾಗಿ ನೀರನ್ನು ಕುಡಿಯಬೇಕು ಇದರಿಂದ ಕಿಡ್ನಿಯ ಕಲ್ಲುಗಳನ್ನು  ತಡೆಗಟ್ಟಬಹುದು 

 

ಹಣದ ಜಾಡು ಹಿಡಿಯುವುದು

 ಹಣದ ಜಾಡು ಹಿಡಿಯುವುದು

ಚಿತ್ರ ಕೃಪೆ:  ಅಂತರ್ಜಾಲ

 ನಾವು ಸಂಪಾದಿಸಿದ ಹಣ  ಎಲ್ಲಿ ಹೋಗುತ್ತದೆ,  ಯಾವುದಕ್ಕಾಗಿ ಬಳಸಲಾಗುತ್ತದೆ, ಎಲ್ಲಾದರೂ ಹಣದ ಸೋರಿಕೆ ಆಗುತ್ತಿದೆಯಾ  ಹಾಗೂ  ಇದರ ಮೂಲಕ ನಮ್ಮ ಸ್ವಭಾವವನ್ನು  ಅರಿತುಕೊಳ್ಳಲು  ಹಣದ ಜಾಡನ್ನು ಹಿಡಿಯಬೇಕಾಗುತ್ತದೆ.  ಇದಕ್ಕಾಗಿ  ನಾವು ಮಾಡುವ  ಖರ್ಚು ವೆಚ್ಚಗಳನ್ನು  ಬರೆಯಬೇಕು.   ಅದು  ನಿರ್ದಿಷ್ಟವಾಗಿರಲಿ  ಅಂದರೆ  ಈ  ದಿನಾಂಕದಂದು,  ಇಂತಿಷ್ಟು ಮೊತ್ತದ ಹಣವನ್ನು ಈ ಉದ್ದೇಶಕ್ಕಾಗಿ  ಖರ್ಚು ಮಾಡಲಾಗಿದೆ ಎಂದು ನಿರ್ದಿಷ್ಟವಾಗಿ ನಮೂದಿಸಬೇಕು.  ಇದನ್ನು  ಒಂದು ಪುಸ್ತಕದಲ್ಲಿ ಬರೆಯುವುದರ ಮೂಲಕ  ಅಥವಾ   ನಿಮ್ಮ ಮೊಬೈಲ್ ನಲ್ಲಿ   ಖರ್ಚುಗಳಿಗೆ ಸಂಬಂಧಪಟ್ಟ  ಮೊಬೈಲ್ ಅಪ್ಲಿಕೇಶನ್ ನಲ್ಲಿ  ಸೇರಿಸುವುದರ ಮೂಲಕವಾದರೂ ಮಾಡಬಹುದು.  ನಿಮ್ಮ ಖರ್ಚು ವೆಚ್ಚಗಳನ್ನು ಅರ್ಥ ಮಾಡಿಕೊಳ್ಳಬೇಕಾದರೆ   ಕನಿಷ್ಠಪಕ್ಷ  ಮೂರು ತಿಂಗಳಾದರೂ ಬರೆಯಬೇಕು. ಆದರೆ  ವರ್ಷಪೂರ್ತಿ ಪ್ರತಿನಿತ್ಯ ಬರೆಯುವ ಅಗತ್ಯವಿರುವುದಿಲ್ಲ.  ಖರ್ಚು ವೆಚ್ಚಗಳನ್ನು ಬರೆದಾಗ ಅವುಗಳ ವರ್ಗೀಕರಣ ಮಾಡಬೇಕು. ಈ ವರ್ಗೀಕರಣದಿಂದ ನಾವು ಯಾವ ಉದ್ದೇಶಕ್ಕಾಗಿ ಖರ್ಚುಗಳನ್ನು ಮಾಡುತ್ತೇವೆ ಎಂದು ತಿಳಿದು ಬರುತ್ತದೆ.

 ಇಂದಿನ ದಿನಗಳಲ್ಲಿ  ಖರ್ಚಿನ ಲೆಕ್ಕ ಬರೆಯುವುದು ತಂತ್ರಜ್ಞಾನದ ಸಹಾಯದಿಂದ ಇನ್ನೂ ಸುಲಭವಾಗಿದೆ.    ನೀವು  ಡಿಜಿಟಲ್ ಪಾವತಿ ಮೂಲಕ  ಆಗುವ ವೆಚ್ಚಗಳು  ನೆಟ್ ಬ್ಯಾಂಕಿಂಗ್  ನಲ್ಲಿ   ಸುಲಭವಾಗಿ  ನೋಡಿ  ಲೆಕ್ಕವನ್ನು ಬರೆಯುವುದು.   ಮೊಬೈಲ್ ಅಪ್ಲಿಕೇಶನ್ ನಲ್ಲಿ   ಖರ್ಚು ಆದ ತಕ್ಷಣ   ಖರ್ಚನ್ನು ದಾಖಲಿಸಬಹುದು.   ಇದಲ್ಲದೆ   ಖರ್ಚಿನ  ಸಮಗ್ರ ವರದಿಯನ್ನು  ಅದೇ ಅಪ್ಲಿಕೇಶನ್  ಸಿದ್ಧ ಮಾಡಿಕೊಡುತ್ತದೆ.  ಇದರಿಂದ   ನಿಮಗೆ   ಏತಕ್ಕಾಗಿ,   ಎಷ್ಟು,   ಎಲ್ಲಿ,   ಯಾವತ್ತು   ಖರ್ಚುಗಳನ್ನು ಮಾಡಿದ್ದೇವೆ   ಎಂಬ ವರದಿ  ನಿಮ್ಮ ಮುಂದೆ ಬರುತ್ತದೆ.    ಈ ವರದಿಯಿಂದ   ನೀವು   ವಿಷಯಗಳನ್ನು ಅರ್ಥೈಸಿಕೊಂಡು  ಮುಂದೆ  ಯಾವ ಕ್ರಮವನ್ನು ಕೈಗೊಳ್ಳಬೇಕೆಂದು  ನಿರ್ಧರಿಸಬಹುದು.

 ವರ್ಗಿಕರಣವನ್ನು ಕ್ಲಿಷ್ಟಗೊಳಿಸದೆ ಸರಳವಾಗಿ ಕೇವಲ ಕೆಳಕಂಡಂತೆ  ಪ್ರಮುಖ ಎರಡು ವರ್ಗಗಳಾಗಿ ವಿಂಗಡಿಸಬಹುದು.

1. ಉಪಭೋಗ್ಯಗಳು / ಮಾಸಿಕ ಖರ್ಚು

2.  ಉತ್ಪನ್ನಗಳ ಖರೀದಿ / ದುರಸ್ತಿ / ಸ್ವಚ್ಛತೆ.

 ನೀವು ಮಾಡುವ ಖರ್ಚುಗಳನ್ನು ಈ ಕೆಳಕಂಡಂತೆ ವರ್ಗಗಳಲ್ಲಿ ಸೇರಿಸುತ್ತಾ ಹೋದರೆ ಖರ್ಚುಗಳ   ಜಾಡು ಹಿಡಿಯಬಹುದು.  ಇದು ಕೇವಲ ಉದಾರಣೆಯಾಗಿದ್ದು ನೀವು ನಿಮ್ಮದೇ ಪಟ್ಟಿಗಳನ್ನು ಅಥವಾ ವರ್ಗಗಳನ್ನು ಸೃಷ್ಟಿ ಮಾಡಿಕೊಂಡು ನಿಮ್ಮ ಖರ್ಚುಗಳನ್ನು  ದಾಖಲಿಸುತ್ತ ಹೋಗಬಹುದು.

1. ಉಪಭೋಗ್ಯಗಳು / ಮಾಸಿಕ ಖರ್ಚು

 ಈ ವರ್ಗೀಕರಣದಲ್ಲಿ ಉಪಭೋಗ್ಯಗಳು (Consumables) ಅಂದರೆ ನೀವು ಬಳಸಿ ಮುಗಿಸುವ ಸೇವೆಗಳು ಅಂದರೆ ಇವುಗಳು ಒಮ್ಮೆ ಖರೀದಿಸಿ ಪುನಃ ಪುನಃ ಉಪಯೋಗಿಸಬಲ್ಲ ಉತ್ಪನ್ನಗಳಾಗಿರುವುದಿಲ್ಲ,  ಆದರೆ ಒಮ್ಮೆ ಬಳಸಿದರೆ ಮುಗಿದು ಹೋಗುವ ಸೇವೆಗಳು. ಉದಾಹರಣೆಗೆ ದಿನಸಿ ಸಾಮಗ್ರಿಗಳು, ಹಾಲು, ತರಕಾರಿ, ಮನೆ ಬಾಡಿಗೆ, ಔಷಧಿಗಳು, ವಿದ್ಯುತ್ ಬಿಲ್, ಅಂತರ್ಜಾಲದ ಬಿಲ್ ಹಾಗು ಇತರೆ ಈ ತೆರನಾದ ಸೇವೆಗಳು.  ಇವುಗಳನ್ನು ಈ ಕೆಳಗಿನಂತೆ ಪಟ್ಟಿ ಮಾಡಲಾಗಿದೆ.      

  2.  ಉತ್ಪನ್ನಗಳ ಖರೀದಿ / ದುರಸ್ತಿ / ಸ್ವಚ್ಛತೆ.   

ಈ ಎರಡನೆಯ ವರ್ಗೀಕರಣದಲ್ಲಿ ಉತ್ಪನ್ನಗಳ ಖರೀದಿ, ಅವುಗಳ ದುರಸ್ತಿ(Repair) ಹಾಗೂ ಅವುಗಳ ಸ್ವಚ್ಛತೆ, ಇವುಗಳ ಖರ್ಚನ್ನು ಬರೆಯುತ್ತಾ ಹೋಗಬೇಕು. ಅಂದರೆ ಉತ್ಪನ್ನಗಳನ್ನು ನಾವು ಒಮ್ಮೆ ಹಣ ಪಾವತಿ ಮಾಡಿ ಖರೀದಿ ಮಾಡಿರುತ್ತೇವೆ ಅವುಗಳು ನಮ್ಮ ಮಾಲೀಕತ್ವದಲ್ಲಿ ಇರುತ್ತವೆ, ಇವುಗಳು ಯಂತ್ರಗಳು ಆಗಿರಬಹುದು ಉಪಕರಣ, ಸಲಕರಣೆಗಳು ಆಗಿರಬಹುದು. ಇವುಗಳನ್ನು ಅದರ ಆಯುಷ್ಯ ಇರುವ ತನಕ ನಾವು ಪುನರ್ ಬಳಕೆ ಮಾಡಬಹುದು. ಆದುದರಿಂದ ನಾವು ಅದನ್ನು ಕಾಪಾಡಿಕೊಳ್ಳಲು ದುರಸ್ತಿಯ ಖರ್ಚು ಮಾಡಬೇಕಾಗುತ್ತದೆ ಹಾಗೂ ಸ್ವಚ್ಛತೆಗೆ ಆದ್ಯತೆ ನೀಡಬೇಕಾಗುತ್ತದೆ  ಇವುಗಳಿಂದ  ಅದರದ್ದೆ ಆದ ಖರ್ಚುಗಳು ಸೃಷ್ಟಿ ಆಗಿರುತ್ತವೆ. ಉದಾಹರಣೆಗೆ ಆ ಉತ್ಪನ್ನಗಳನ್ನು ಈ ಕೆಳಗಿನಂತೆ ಪಟ್ಟಿ ಮಾಡಲಾಗಿದೆ.      

      ಎಲ್ಲಾ ಸೇವೆಗಳಿಗೆ ಹಾಗೂ ಉತ್ಪನ್ನಗಳಿಗೆ ತನ್ನದೇ ಆದಂತ ಜೀವಮಾನವಿರುತ್ತದೆ ಅಂದರೆ ಬಾಳಿಕೆಯ ಅವಧಿ. ಉದಾಹರಣೆಗೆ ಒಂದು ಮನೆಯು ನೂರು ವರ್ಷ ಬಾಳುತ್ತದೆ, ಒಂದು ದ್ವಿಚಕ್ರ ಹಾಗೂ ಚತುರ್ಚಕ್ರ ವಾಹನ  ಹದಿನೈದರಿಂದ ಇಪ್ಪತ್ತು ವರ್ಷ ಬಾಳುತ್ತದೆ, ಒಂದು ಮೊಬೈಲ್ ಫೋನ್ ಐದರಿಂದ ಏಳು ವರ್ಷ ಬಾಳುತ್ತದೆ, ಹೀಗೆ ತನ್ನ ಆಯಸ್ಸು ಮುಗಿದ ಉತ್ಪನ್ನಗಳ ಪುನರ್ ಖರೀದಿ ಮಾಡಬೇಕಾಗುತ್ತದೆ, ಅದು ಬಾಳುವ ತನಕ ಅದರ ದುರಸ್ತಿ ಖರ್ಚು, ಸ್ವಚ್ಛತೆಯ ಖರ್ಚು ಮಾಡಬೇಕಾಗುತ್ತದೆ. ನಾವು ಗಮನಿಸಿದರೆ ಎಷ್ಟೋ ಸೇವೆಗಳು ಅಲ್ಪ ಕಲಿಕಾ ಉದಾಹರಣೆಗೆ ಆಹಾರ ಪದಾರ್ಥಗಳು, ಗ್ರಂಥಿಗೆ ಸಾಮಾನುಗಳು, ಹೂಗಳು, ಅನಿಲದ ಸಿಲಿಂಡರ್ ಗಳು, ಆಟೋದಲ್ಲಿ ಪ್ರಯಾಣ,   ವಿದ್ಯುತ್ ಬಿಲ್, ನೀರಿನ ಬಿಲ್  ಇತ್ಯಾದಿ.  ಹೀಗೆ ನಾವು ಬಳಸುವ ಸೇವೆಗಳ ಹಾಗೂ ಉತ್ಪನ್ನಗಳ ಆಯಸ್ಸನ್ನು, ಬಾಳಿಕೆ ಅವಧಿಯನ್ನು ಅರ್ಥಮಾಡಿಕೊಳ್ಳಬೇಕು. ಇದು ಮುಂದಿನ ದಿನಗಳಲ್ಲಿ  ನಿರ್ಧಾರಗಳನ್ನು ಕೈಗೊಳ್ಳಲು  ಸಹಾಯಕಾರಿಯಾಗುತ್ತದೆ.  ಉದಾಹರಣೆಗೆ ನೀವು ನಿಮ್ಮ 30ನೇ ವಯಸ್ಸಿನಲ್ಲಿ ಮೊದಲ ಕಾರು ಕೊಂಡಿದ್ದರೆ, ನಿಮಗೆ ನಿಮ್ಮ ಜೀವಮಾನದಲ್ಲಿ ಮೂರು ಅಥವಾ ನಾಲ್ಕು ಕಾರುಗಳನ್ನು ಕೊಳ್ಳಬೇಕಾಗುತ್ತದೆ. ಇದೇ ರೀತಿಯಲ್ಲಿ ಎಂಟರಿಂದ ಹತ್ತು ಮೊಬೈಲ್ ಫೋನ್ ಗಳನ್ನು ಖರೀದಿ ಮಾಡಬೇಕಾಗುತ್ತದೆ. ಒಂದು ಮನೆಯ ನೂರು ವರ್ಷ ಬಾಳುವುದರಿಂದ ನಮ್ಮ ಜೀವನದಲ್ಲಿ ಒಂದು ಮನೆ  ಕಟ್ಟಿದರೆ  ಸಾಕಾಗುತ್ತದೆ. ಹೀಗೆ ನೀವು ಕೊಳ್ಳುವ ಉತ್ಪನ್ನಗಳ ಆಯಸ್ಸಿನ ಮೇಲೆ ಭವಿಷ್ಯದಲ್ಲಿ ಇದೇ ಉತ್ಪನ್ನಗಳನ್ನು ಎಷ್ಟು ಬಾರಿ ಕೊಳ್ಳಬೇಕಾಗುತ್ತದೆ ಎಂಬ ಅಂದಾಜು ನಮಗೆ ಸಿಗುತ್ತಿದೆ. 

ಅನುಸರಣೆಯ  ಉದ್ದೇಶ (Tracking)

 ಇಷ್ಟು ಶ್ರಮವಹಿಸಿ ಖರ್ಚುಗಳನ್ನೆಲ್ಲಾ ಬರೆದು ಪಟ್ಟಿ ಮಾಡಿ, ಅವುಗಳನ್ನು ವರ್ಗೀಕರಿಸಿ, ದತ್ತಾಂಶವನ್ನು ರಚನಾತ್ಮಕ ಸ್ವರೂಪದಲ್ಲಿ ರಚಿಸಿ, ಸಂಗ್ರಹಿಸಲು  ಉದ್ದೇಶಗಳು ಇರಬೇಕಲ್ಲವೇ.  ಹಾಗಿದ್ದಲ್ಲಿ ಆ ಉದ್ದೇಶಗಳು ಏನೆಂದು ತಿಳಿಯೋಣ.  

1.  ಖರ್ಚು ವೆಚ್ಚಗಳ ವಿಶ್ಲೇಷಣೆ  ಮಾಡಲು.

2.  ಬೇಡಿಕೆ ಹಾಗೂ ಪೂರೈಕೆಯನ್ನು ಅರ್ಥ ಮಾಡಿಕೊಳ್ಳಲು.

3.  ಎಲ್ಲಾದರೂ ಅನಗತ್ಯ ದುಂದು ವೆಚ್ಚವಿದೆಯೇ ಎಂದು ಗುರುತಿಸಲು.

4.  ನಮ್ಮ ಹಾಗೂ ಕುಟುಂಬದವರ  ಹಣಕಾಸಿನ ಸ್ವಭಾವವನ್ನು  ಅರಿಯಲು.

5.  ಆರ್ಥಿಕ ಸುಧಾರಣೆ ಮಾಡುವ ಅವಕಾಶಗಳನ್ನು ಗುರುತಿಸಲು. 

6.  ಆರ್ಥಿಕ ಸಂಕಷ್ಟದ ಪೂರ್ವಸಿದ್ಧತೆಗಾಗಿ.

7.  ನಿವೃತ್ತಿ ಜೀವನದ  ಪೂರ್ವಸಿದ್ಧತೆಯ ಭಾಗವಾಗಿ.

8.  ಭವಿಷ್ಯದ ಗುರಿಗಳನ್ನು ಹಮ್ಮಿಕೊಳ್ಳಲು.

            ಹೀಗೆ ಖರ್ಚುಗಳ ಅನುಸರಣೆಯಿಂದ ನಮಗೆ ನಮ್ಮ ಹಣ ಖರ್ಚಾಗುವ ಕಾರಣಗಳು   ಮಾತ್ರವಲ್ಲದೆ ಭವಿಷ್ಯದ ಜೀವನದ ಸಿದ್ಧತೆಗೆ ಹಾಗೂ ವಿವಿಧ ಸಂದರ್ಭಗಳನ್ನುಎದುರಿಸಲು ಸಹಾಯವಾಗುತ್ತದೆ. ಇದಲ್ಲದೆ ನಾವು ಮಾಡುವ ಖರ್ಚುಗಳು ಎಷ್ಟು ಅವಶ್ಯಕತೆಗೆ ಮಾಡುವ ಖರ್ಚುಗಳಾಗಿವೆ, ಎಷ್ಟು ಹಣವನ್ನು ನಮ್ಮ ಆಸೆಯ ಈಡೇರಿಕೆಗಾಗಿ ಮಾಡುವ ಖರ್ಚುಗಳಾಗಿವೆ ಎಂದು ತಿಳಿದು ಬರುತ್ತದೆ. ಹೀಗೆ ಅನುಸರಣೆ ಮಾಡಿದ್ದ ದತ್ತಾಂಶದಿಂದ  ಹಲವಾರು ವಿಷಯಗಳು ತಿಳಿದು ಬರುತ್ತದೆ ಹಾಗೂ ಭವಿಷ್ಯದ  ಜೀವನವನ್ನು ನಿರ್ವಹಿಸಲು ಸಹಕಾರಿಯಾಗುತ್ತದೆ.

          ವಿಶ್ಲೇಷಣೆಯಿಂದ ಎಲ್ಲಿಯಾದರೂ ಸುಧಾರಣೆಗೆ ಅವಕಾಶಗಳಿವೆಯಾ ಎಂದು ಗುರುತಿಸಬೇಕು. ಇದ್ದಲ್ಲಿ ಅವುಗಳನ್ನು ಒಂದು ಅಥವಾ ಎರಡು ಚಟುವಟಿಕೆಯಾಗಿ ಅಥವಾ  ಒಂದು ಯೋಜನೆಯಾಗಿ ಕೈಗೆತ್ತಿಕೊಳ್ಳಬೇಕು.   ಉದಾಹರಣೆಗೆ ಸೌರ ಫಲಕಗಳ ಸಹಾಯದಿಂದ ವಿದ್ಯುತ್ ಉತ್ಪಾದಿಸಬಹುದೇ ಅದರ ಮೂಲಕ ಮನೆಯ ವಿದ್ಯುತ್ ಬಿಲ್ಲನ್ನು ಕಡಿತಗೊಳಿಸಬಹುದು ಎಂಬುದೊಂದು ಯೋಜನೆಯನ್ನು ಹಾಕಿಕೊಳ್ಳಬಹುದು. ಉತ್ಪಾದಿಸಿದ ವಿದ್ಯುತ್ತನ್ನು  ವಿದ್ಯುತ್ ಪ್ರಸರಣ ಸಂಸ್ಥೆಗೆ ಮಾರಬಹುದು. 

       ವಿದ್ಯುತ್ ಚಾಲಿತ ದ್ವಿಚಕ್ರ ವಾಹನಗಳು, ಚತುರ್ಚಕ್ರ ವಾಹನಗಳನ್ನು ಕೊಂಡು ಅದರ ಮೂಲಕ ವಾಹನಗಳ ಇಂಧನದ ಖರ್ಚನ್ನು ಉಳಿಸಬಹುದು, ಅದು ಅಲ್ಲದೆ ವಿದ್ಯುತ್ತನ್ನು ನಾವೇ ಉತ್ಪಾದಿಸುವುದರಿಂದ ವಾಹನಗಳ ಚಾರ್ಜ್ ಮಾಡುವ ಚಿಕ್ಕ ಖರ್ಚನ್ನು ಉಳಿಸಿ ಸಂಪೂರ್ಣವಾಗಿ ಉಚಿತವಾಗಿ  ಮಾಡಿಕೊಳ್ಳಬಹುದಾಗಿದೆ.  

           ಹಾಗೆಯೇ ದಿನಪತ್ರಿಕೆಗಳು ಬೇಕೆ? ಏಕೆಂದರೆ ದೂರದರ್ಶನದಲ್ಲಿ, ಅಂತರ್ಜಾಲಗಳಲ್ಲಿ ಸಾಕಷ್ಟು ಸುದ್ದಿಗಳು ಲಭ್ಯವಿರುವುದರಿಂದ ಅಲ್ಲಿಯೇ ಸುದ್ದಿಯನ್ನು ತಿಳಿದು ದಿನಪತ್ರಿಕೆಯ  ಬಿಲ್ಲನ್ನು  ಉಳಿಸಬಹುದು. 

    ಜೀವ ವಿಮೆಯ ಪಾಲಿಸಿ ಇದ್ದಲ್ಲಿ ಅದರ ಅವಶ್ಯಕತೆ ಇದೆಯೇ ಅದರ ಬದಲಿ ಉತ್ತಮವಾದ ಟರ್ಮ್ ವಿಮೆಯನ್ನು ಕೊಳ್ಳಬಹುದಲ್ಲವೇ.

ನಿಮ್ಮ ಮಾಸಿಕ ಔಷಧಿಗಳ ಬಿಲ್ ಹೆಚ್ಚಾಗಿದ್ದಲ್ಲಿ ನಿಮ್ಮ ಆರೋಗ್ಯವನ್ನು ಹೇಗೆ ಸುಧಾರಿಸಬಹುದು ಎಂಬುದರ ಕಡೆಗೆ ಗಮನ ಹರಿಸಿ ಆರೋಗ್ಯವನ್ನು ಸುಧಾರಿಸುವ ಕ್ರಮಗಳನ್ನು ಕೈಗೊಳ್ಳಬಹುದು. 

 ಯಾವುದಾದರೂ ಸೇವೆಗಳು ಅಥವಾ ಉತ್ಪನ್ನಗಳು ಅನಗತ್ಯವೆನಿಸಿದರೆ ಅವುಗಳನ್ನು ನಿಲ್ಲಿಸಬಹುದು ಅಥವಾ ನಿವೃತ್ತಗೊಳಿಸಬಹುದು, ಈ ಮೂಲಕ ಕೇವಲ ಬೇಕಾಗಿರುವ ಸೇವೆ ಹಾಗೂ ಸಾಮಗ್ರಿಗಳಿಂದ ಜೀವನವನ್ನು ಸರಳ ಹಾಗೂ ಸ್ವಚ್ಛವಾಗಿರಿಸಬಹುದು. 

 ಹೀಗೆ ಇದೇ ರೀತಿಯಲ್ಲಿ ನೀವು ಬಳಸುವ ಎಲ್ಲಾ ಸೇವೆಗಳು ಹಾಗೂ ಉತ್ಪನ್ನಗಳ ಸುಧಾರಣಾ ಸಾಧ್ಯತೆಗಳನ್ನು ವಿಶ್ಲೇಷಿಸಿ ಕ್ರಮಗಳನ್ನು ಕೈಗೊಳ್ಳಬಹುದು.

  ಹಣದ ಜಾಡು ಹಿಡಿಯುವ ಹಾಗೂ ಅನುಸರಿಸುವ ಚಟುವಟಿಕೆ ಈ ರೀತಿಯಲ್ಲಿ ನಮ್ಮ ವೈಯಕ್ತಿಕ ಜೀವನದ ಸುಧಾರಣೆಗೆ ಸಹಾಯಕಾರಿಯಾಗುತ್ತದೆ.  ಜೀವನವನ್ನು ಸರಳಗೊಳಿಸುವ ಮೂಲಕ ನೆಮ್ಮದಿಯನ್ನು ಕಂಡುಕೊಳ್ಳಬಹುದು.  

   ಕಳೆದ ಅಧ್ಯಾಯದಲ್ಲಿ ತಿಳಿಸಿದಂತೆ ಈ ಸುಧಾರಣಾ ಕೆಲಸಗಳನ್ನು ಗಂಡ ಹೆಂಡತಿ ಇಬ್ಬರೂ ಕುಳಿತು ಚರ್ಚಿಸಿ ನಿರ್ಧಾರ ತೆಗೆದುಕೊಳ್ಳುವುದು ಸೂಕ್ತ. ಇದಕ್ಕಾಗಿ  ಇಬ್ಬರೂ ಪ್ರಗತಿಪರ  ಚಿಂತನೆಯ ಮನಸ್ಥಿತಿಯನ್ನು ಹೊಂದಿರಬೇಕು. ಇದರ ಮೂಲಕ ಜೀವನವನ್ನು ಅರ್ಥೈಸಿ,  ಸರಳಿಕರಣಗೊಳಿಸಿ , ನೆಮ್ಮದಿಯ ಜೀವನವನ್ನು ನಡೆಸಲು ಸಹಕಾರಿಯಾಗುತ್ತದೆ. 

ಒಬ್ಬರೇ ನಿರ್ವಹಿಸುವುದು ಅಸಾಧ್ಯ

ಒಬ್ಬರೇ  ನಿರ್ವಹಿಸುವುದು  ಅಸಾಧ್ಯ:

ಚಿತ್ರ ಕೃಪೆ:  ಅಂತರ್ಜಾಲ 

    ವೈಯಕ್ತಿಕ  ಹಣಕಾಸು ನಿರ್ವಹಣೆ    ಹೆಸರೇ ಸೂಚಿಸುವಂತೆ  ವೈಯಕ್ತಿಕ ಆದರೂ  ಅದು  ನಿಜ ಅರ್ಥದಲ್ಲಿ ಕೌಟುಂಬಿಕ.   ಅಂದರೆ  ಮನೆಯ ಹಣಕಾಸು ನಿರ್ವಹಣೆ  ಕೇವಲ  ಮನೆಯ  ಯಜಮಾನನದಲ್ಲ ಅದರಲ್ಲಿ  ಸಂಗಾತಿಯ ಪಾತ್ರ ಬಹಳ ಮಹತ್ವದ್ದಾಗಿರುತ್ತದೆ ಹಾಗೂ ಕೌಟುಂಬಿಕ   ಮಟ್ಟದಲ್ಲಿ ನಡೆಯಬೇಕು.    ಹಣಕಾಸಿನ  ಎಲ್ಲಾ  ಆಯವ್ಯಯಗಳ  ಚರ್ಚೆ  ಮನೆಯಲ್ಲಿ ನಡೆಯಬೇಕು  ಸಂಗಾತಿಗಳು ಇಬ್ಬರು ಕುಳಿತು  ಚರ್ಚಿಸಿ  ತೀರ್ಮಾನಗಳನ್ನು ತೆಗೆದುಕೊಳ್ಳಬೇಕು.   ಇಲ್ಲದೆ ಹೋದರೆ   ಎತ್ತು ಏರಿಗೆ  ಎಳೆದರೆ ಕೋಣ  ನೀರಿಗೆ ಎಳೆದಂತೆ.  ಇದರಿಂದ  ಬದುಕಿನ ಬಂಡಿ  ಎಲ್ಲೂ ಸಾಗುವುದಿಲ್ಲ. 

 ಇಂತಹ ಅವ್ಯವಸ್ಥೆಯಿಂದ ಸೋಲುಗಳು, ನಿರಾಶೆಗಳು, ಹತಾಶೆಗಳು ಸಾಮಾನ್ಯವಾಗಿ ಬಿಡುತ್ತವೆ. ಅತೃಪ್ತಿ, ಅಸಮಾಧಾನ, ಕೋಪ  ಹೊಗೆಯಾಡುತ್ತಿರುತ್ತದೆ ಇದರಿಂದ ಕೌಟುಂಬಿಕ ವ್ಯವಸ್ಥೆಗೆ  ಅಡ್ಡ ಪರಿಣಾಮ ಬೀರುತ್ತದೆ.  ಆದ್ದರಿಂದ  ಪರಿಹಾರವಾಗಿ ಕುಟುಂಬದಲ್ಲಿ  ಆರ್ಥಿಕ ವ್ಯವಸ್ಥೆಯನ್ನು  ಸೃಷ್ಟಿಸಿಕೊಳ್ಳಬೇಕು  ಒಂದು ಪ್ರಕ್ರಿಯೆಯನ್ನು  ರೂಪಿಸಬೇಕು,   ಅದಕ್ಕಾಗಿ   ಮೂಲಸೌಕರ್ಯದ  ವ್ಯವಸ್ಥೆಯನ್ನು ಮಾಡಿರಬೇಕು ಹಾಗೆ ಅದಕ್ಕೆ ಸಾಧನಗಳನ್ನು ಕಂಡುಕೊಳ್ಳಬೇಕು.    

     ಈ ವ್ಯವಸ್ಥೆಯ ಭಾಗವಾಗಿ  ಕನಿಷ್ಠಪಕ್ಷ  ತಿಂಗಳಿಗೆ ಒಂದು  ದಿನ ಕುಳಿತು  ಆಯವ್ಯಯಗಳ  ಚರ್ಚೆ ನಡೆಸಬೇಕು.  ಇದರಲ್ಲಿ  ಮುಂದಿನ ಕೆಲಸ ಕಾರ್ಯಗಳು,  ಎದುರಿಸುತ್ತಿರುವ ಸಮಸ್ಯೆಗಳು,  ಅದರ  ಪರಿಹಾರಗಳು  ಹಾಗೂ ಭವಿಷ್ಯದ ಯೋಜನೆಗಳನ್ನು ಚರ್ಚಿಸಬೇಕು.   ಎಲ್ಲದಕ್ಕೂ ಎಷ್ಟು ಖರ್ಚಾಗುತ್ತದೆ,  ಅವುಗಳನ್ನು ಹೇಗೆ ನಿಭಾಯಿಸಬೇಕು  ಎಂಬುದರ ಚರ್ಚೆ ನಡೆಸಬೇಕು  ಹಾಗೆಯೇ ಮುಂದಿನ ತಿಂಗಳ  ಬಜೆಟ್  ಅನ್ನು ಸಿದ್ಧಪಡಿಸಬೇಕು. ಈ ಚರ್ಚೆಯು  ಒಂದು ಕಚೇರಿಯಲ್ಲಿ ಕಾರ್ಯವು ನಡೆಯುವಂತೆ  ವ್ಯವಸ್ಥಿತವಾಗಿ  ಇರಬೇಕು   ಅದಕ್ಕಾಗಿ  ನೀವು ಮನೆಯಲ್ಲಿ  ಕುರ್ಚಿ ಮೇಜುಗಳ  ವ್ಯವಸ್ಥೆ ಇರಬೇಕು ಅಥವಾ  ನಿಮ್ಮ ಮನೆಯ  ಡೈನಿಂಗ್ ಟೇಬಲ್ ಮೇಲೆ  ಕೂಡ ನಡೆಸಬಹುದು.   ಇದಕ್ಕಾಗಿ    ಗಣಕಯಂತ್ರದಲ್ಲಿ   ಎಂಎಸ್ ಎಕ್ಸೆಲ್  ನಂತಹ  ಸಾಧನಗಳನ್ನು  ಬಳಸುವುದು  ಅತಿ ಮುಖ್ಯ.   ಜೊತೆಗೆ   ಅವಶ್ಯಕತೆ   ಬಂದಲ್ಲಿ  ಸಂಬಂಧಪಟ್ಟ  ಮೊಬೈಲ್ ಅಪ್ಲಿಕೇಶನ್ ಗಳನ್ನು  ಬಳಸಬಹುದು.         

     ಈ ರೀತಿಯಲ್ಲಿ  ಇಬ್ಬರೂ ಚರ್ಚೆ ನಡೆಸುವುದರಿಂದ ಮನೆಯಲ್ಲಿನ ಬೇಡಿಕೆಗಳನ್ನು ಅರ್ಥೈಸಿಕೊಂಡು ಅದರ ಪೂರೈಕೆ ಹೇಗೆ,  ಯಾವಾಗ  ಮಾಡಬೇಕು ಎಂಬುದನ್ನು ನಿರ್ಧರಿಸಬಹುದು. ಇದರಿಂದ ಇಬ್ಬರಲ್ಲೂ ಸಮನ್ವಯತೆ  ಮೂಡಿ ಬರುತ್ತದೆ  ಜೊತೆಗೆ ಕೆಲಸಗಳು ಸರಾಗವಾಗಿ ಸಾಗುತ್ತವೆ.   ಇಲ್ಲದೆ ಹೋದರೆ ಮನೆಯಲ್ಲಿರುವ ಇತರೆ ಸದಸ್ಯರುಗಳು ಬೇಡಿಕೆಗಳನ್ನು ಇಡುವುದು,  ಒಬ್ಬರು ಮಾತ್ರ  ಅವುಗಳನ್ನು ನಿರ್ವಹಿಸುವುದು, ಪೂರೈಸುವುದು   ಸಾಧ್ಯವಾಗದ ಮಾತು.   ಅದಕ್ಕೆ   ಮನೆಯ ಎಲ್ಲಾ ಸದಸ್ಯರು   ಬೇಡಿಕೆ ಹಾಗೂ ಪೂರೈಕೆಗಳನ್ನು ಅರ್ಥಮಾಡಿಕೊಳ್ಳಬೇಕು. ಬಜೆಟ್ ಗೆ ಎಲ್ಲರೂ ಸ್ಪಂದಿಸಬೇಕು  ಆಗಲೇ  ಮನೆಯಲ್ಲಿ  ಸಮತೋಲನವಿರುತ್ತದೆ.

     ಸಾಮಾನ್ಯವಾಗಿ  ಮನೆಯಲ್ಲಿ  ಮಾಡಬೇಕಾದ ಕೆಲಸಗಳ ಪಟ್ಟಿಯನ್ನು (To-Do List) ಸಿದ್ಧಪಡಿಸುತ್ತಾ ಹೋಗಬೇಕು.     ಈ ಪಟ್ಟಿ  ನಿಮ್ಮ  ಕೆಲಸಗಳನ್ನು  ಮರೆಯದೆ  ಮಾಡಲು  ಸಹಕಾರಿಯಾಗುತ್ತದೆ ಅಲ್ಲದೆ ನಿಮ್ಮ ಚರ್ಚೆಗೆ  ವಿಷಯಗಳಾಗಿ  ಪ್ರಸ್ತುತವಾಗುತ್ತದೆ.   ಇದಲ್ಲದೆ  ನೀವು ಮಾಡುವ ಖರ್ಚುಗಳನ್ನು  ಒಂದು ಪುಸ್ತಕದಲ್ಲಿ  ಬರೆಯಿರಿ, ಅದಕ್ಕಿಂತಲೂ ಉತ್ತಮವಾದ  ಉಪಾಯವೆಂದರೆ  ಒಂದು ಮೊಬೈಲ್ ಅಪ್ಲಿಕೇಶನ್ ನಲ್ಲಿ  ದಾಖಲಿಸುತ್ತಾ ಹೋಗಬೇಕು.  ಇದು  ನೀವು ಮಾಡುವ  ಖರ್ಚುಗಳ ವೈಕರಿಯನ್ನು  ತೋರಿಸುತ್ತದೆ  ಇದರಿಂದ  ನೀವು ಚರ್ಚೆ  ಹಾಗೂ ವಿಶ್ಲೇಷಣೆ ಮಾಡಲು  ಅನುಕೂಲವಾಗುತ್ತದೆ.   ಇದು ಒಂದು ತ್ರಾಸದಾಯಕವಾದ ಕೆಲಸ  ಆದುದರಿಂದ  2 ರಿಂದ 3 ತಿಂಗಳು ಮಾಡಿದರು  ನಿಮಗೆ  ಒಂದು ಅಂದಾಜು ಲೆಕ್ಕ ಸಿಗುತ್ತದೆ.      

 ಸಾಕಷ್ಟು ಮನೆಗಳಲ್ಲಿ  ವೇತನ ಬಂದ  ಒಂದು ವಾರ ಅಥವಾ 15 ದಿವಸಗಳಲ್ಲಿ   ಹಣವೆಲ್ಲ ಮುಕ್ಕಾಲು ಪಾಲು ಖಾಲಿಯಾಗುತ್ತದೆ ಎಂದು ಹೇಳುವವರು ಹೆಚ್ಚು.    ನೀವು ಬಕಪಕ್ಷಿಗಳಂತೆ  ಕಾದು ಕುಳಿತು ನಿಮ್ಮ ವೇತನ ಅಥವಾ ಆದಾಯ ಬರುತ್ತಿದ್ದಂತೆ   ಎಲ್ಲವನ್ನು ಒಟ್ಟಿಗೆ ಖರ್ಚು ಮಾಡದಿರಿ.   ಅದರ ಬದಲಾಗಿ  ಕೇವಲ ಮಾಸಿಕ ಬಿಲ್ ಗಳನ್ನು ಕಟ್ಟಿ  ಉಳಿದವನ್ನು  10 ದಿನಗಳ ಕಾಲಾವಧಿಯ 3 ಅವಧಿ ಗಳನ್ನು (Time slots) ಮಾಡಿಕೊಳ್ಳಿ.   ಅಂದರೆ   ಮೊದಲ 10 ದಿನದಲ್ಲಿ  ಕೆಲವು ಕಾರ್ಯಗಳನ್ನು ಮಾಡಿ.  ಉಳಿದ ಕೆಲಸಗಳನ್ನು 10 ದಿನಗಳ  ಇನ್ನು ಎರಡು ಅವಧಿಗಳಲ್ಲಿ  ಹಂಚಿಕೆ ಮಾಡಿ.   ಇದರಲ್ಲಿ ಕಾಯಲಾರದ ಕೆಲಸಗಳನ್ನು  ಮೊದಲ ಸ್ಲಾಟ್ ನಲ್ಲೆ ಮುಗಿಸಿ, ಆತುರವಲ್ಲದ ಕಾಯಬಲ್ಲ ಕೆಲಸಗಳನ್ನು ಉಳಿದ ಇನ್ನೆರಡು ಸ್ಲಾಟ್ ಗಳಲ್ಲಿ  ಮಾಡಬಹುದು.    ಇದರಿಂದ  ತಿಂಗಳ ಮೊದಲ ವಾರದಲ್ಲೇ  ಹಣವೆಲ್ಲ ಖರ್ಚಾಗಿ  ಅಭದ್ರತೆಯಿಂದ  ಚಿಂತೆ ಮಾಡುವುದು ತಪ್ಪುತ್ತದೆ  ಹಾಗೂ  ಮುಂಬರುವ ತುರ್ತು ಪರಿಸ್ಥಿತಿಗಳನ್ನು  ನಿಭಾಯಿಸಲು  ಹಣದ ಅಭಾವ  ಇರುವುದಿಲ್ಲ.   ಹೀಗೆ ಮಾಡುವುದರಿಂದ  ನಿಮ್ಮ ಬ್ಯಾಂಕಿನ ಖಾತೆಯಲ್ಲಿ  ಹಣ ಉಳಿದು  ಮನದ ನೆಮ್ಮದಿಯನ್ನು ಕಾಪಾಡಲು  ಸಹಾಯವಾಗುತ್ತದೆ.    

 ಹೀಗೆ  ಮನೆಯಲ್ಲಿರುವ ದಂಪತಿಗಳು  ಹಾಗೂ ಹಿರಿಯರು  ಎಲ್ಲರೂ ಸೇರಿ  ಚರ್ಚೆಗಳ ಮೂಲಕ  ಹಾಗೂ ಒಪ್ಪಂದದ ಮೂಲಕ  ಮನೆಯನ್ನು ಹಾಗೂ ಹಣಕಾಸನ್ನು ನಿರ್ವಹಿಸಿದರೆ,  ಮನೆಯ  ಮತ್ತು  ಆರ್ಥಿಕ ನಿರ್ವಹಣೆ  ವಾಸ್ತವಿಕತೆಯ ನೆಲೆಗಟ್ಟಿನಲ್ಲಿ  ಸುಸೂತ್ರವಾಗಿ ನಡೆಯುತ್ತದೆ.  ಒಂದು ವೇಳೆ  ಮನೆಯ ಹಿರಿಯ ಸದಸ್ಯರು  ಇದಕ್ಕೆ  ಆಸಕ್ತಿ  ತೋರದಿದ್ದಲ್ಲಿ   ಅವರಿಗೆ   ಇದರ ಮಹತ್ವವನ್ನು  ವಿಸ್ತೃತವಾಗಿ ಹೇಳಿ   ಮನದಟ್ಟು ಮಾಡಬೇಕು  ಮತ್ತು   ಅವರು  ಇದಕ್ಕೆ ಸಹಕಾರ ಕೊಡುವಂತೆ  ಮನವೊಲಿಸಿ  , ಈ ಚಟುವಟಿಕೆಯಲ್ಲಿ   ಸಕ್ರಿಯವಾಗಿ   ಭಾಗವಹಿಸುವಂತೆ  ಮಾಡಬೇಕಾಗುತ್ತದೆ.

  

ಹಣಕ್ಕೆ ಪ್ರತಿಯಾಗಿ ಸಿಗುವ ಮೌಲ್ಯ

 ಹಣಕ್ಕೆ ಪ್ರತಿಯಾಗಿ ಸಿಗುವ  ಮೌಲ್ಯ :


                                
ಹಣವೇ  ಮುಖ್ಯಾನಾ ? ಈ ಪ್ರಶ್ನೆಗೆ  ಸಿಗುವ  ಸರಳವಾದ ಉತ್ತರವೆಂದರೆ   'ಇಲ್ಲ'.   ಹಾಗಿದ್ದರೆ ಹಣ ಯಾಕೆ ಮುಖ್ಯವಲ್ಲ?   ಏಕೆಂದರೆ  ನಮಗೆ ಬೇಕಾದದ್ದು  ಹಣವಲ್ಲ  ಬದಲಾಗಿ  ಹಣವೆಂಬ ವಿನಿಮಯ ಮಾಧ್ಯಮದಿಂದ  ವಿನಿಮಯದಲ್ಲಿ ಸಿಗುವ  ಮೌಲ್ಯ  ಅಂದರೆ  ಉತ್ಪನ್ನಗಳು  ಹಾಗೂ ಸೇವೆಗಳು   ಹಾಗೂ ಅದರ ಮೂಲಕ  ನಮ್ಮ ಅವಶ್ಯಕತೆ  ಹಾಗೂ  ಆಸೆಗಳ  ಈಡೇರಿಕೆ. 

                                          ಚಿತ್ರ ಕೃಪೆ:  ಅಂತರ್ಜಾಲ

ಮೌಲ್ಯಗಳೆಂದರೆ ಯಾವುದು?   ಉತ್ತಮವಾದ ಆರೋಗ್ಯ,  ಆರ್ಥಿಕ ಮತ್ತು ಸಾಮಾಜಿಕ ಭದ್ರತೆ,   ಸುಸಜ್ಜಿತವಾದ ಮನೆ, ಪ್ರಯಾಣಕ್ಕೆ ವಾಹನದಂತಹ ಮೂಲ ಸೌಕರ್ಯ, ಆರೋಗ್ಯಕರ ಮನೋರಂಜನೆ,  ಸ್ನೇಹಿತರೊಡನೆ, ಕುಟುಂಬದೊಡನೆ  ಉಲ್ಲಾಸ ಗೊಳಿಸುವ ಪ್ರವಾಸ, ಆಸೆಗಳ ಈಡೇರಿಕೆ,  ಸ್ವಚ್ಛತೆ,  ಶಾಂತಿ-ನೆಮ್ಮದಿ, ಗುರಿಗಳ ಸಾಧನೆ ಹಾಗೂ  ಅಭಿವೃದ್ಧಿ, ಉತ್ತಮರ ಒಡನಾಟ,   ಮಕ್ಕಳ  ಶ್ರೇಯೋಭಿವೃದ್ಧಿ  ಹಾಗೂ  ಬೌದ್ಧಿಕ ವಿಕಾಸ,  ಸೃಜನಶೀಲತೆ ಹೆಚ್ಚಿಸುವ ಚಟುವಟಿಕೆ,  ಆರೋಗ್ಯಕರ ಕ್ರೀಡೆಗಳು, ಉತ್ತಮ ಹವ್ಯಾಸಗಳು ಇತ್ಯಾದಿ  

   ಮೇಲೆ ತಿಳಿಸಿದ  ಮೌಲ್ಯಗಳನ್ನು  ತಲುಪಲು  ಮಾಧ್ಯಮಗಳು ಬೇಕು ಅದಕ್ಕೆ ಉತ್ತಮವಾದ ಸೇವೆ  ಹಾಗೂ  ಉತ್ಪನ್ನಗಳ ಪಾತ್ರ ಮಹತ್ವದ್ದು. ಅದರಲ್ಲೂ ಉತ್ಪನ್ನಗಳು  ಹೆಚ್ಚು    ಲಾಭದಾಯಕವಾಗಿರುತ್ತದೆ ಅವು ಏಕೆ ಮಹತ್ವದ್ದು ಎಂದರೆ ಒಂದು ಉತ್ಪನ್ನವು ಕೂಡ ಸೇವೆಯನ್ನೇ ಒದಗಿಸುತ್ತದೆ, ಅವುಗಳಿಗೆ  ಒಮ್ಮೆ ಹಣ ಪಾವತಿ ಮಾಡಿಕೊಂಡು ಕೊಂಡರೆ ಅವು ನಮ್ಮ ಮಾಲೀಕತ್ವದಲ್ಲಿ  ಇರುವುದರಿಂದ   ಸೇವೆಗಳನ್ನು  ಪುನರತ್ಮಾಕವಾಗಿ  ಬಳಸಿಕೊಳ್ಳಬಹುದು.  ನಮ್ಮ ಬಳಿ ಇರುವ  ಕುಕ್ಕರ್ ,  ಗಣಕಯಂತ್ರ,   ವಾಹನ ,   ಮೊಬೈಲ್ ಫೋನ್  ಅಥವಾ  ಯಾವುದಾದರೂ ಸಲಕರಣೆಗಳು ಅಂದರೆ ಮನೆಯ ಪಾತ್ರೆಗಳು,  ಸೌಟು, ಚಮಚ ,  ಏಣಿ,  ಕುರ್ಚಿ, ಮೇಜು  ಇವುಗಳನ್ನು ಸಹ ಪುನರ್  ಬಳಕೆ ಮಾಡಿ    ಅವು ಕೊಡುವ  ಸೇವೆಗಳನ್ನು  ಪುನರತ್ಮಾಕವಾಗಿ   ಬಳಸಬಹುದು. ಅಂದರೆ  ಉತ್ಪನ್ನಗಳು  ತಮ್ಮ ಸೇವೆಗಳನ್ನು ಹೆಚ್ಚುವರಿ ಶುಲ್ಕವಿಲ್ಲದೆ  ಸತತವಾಗಿ  ಕೊಡುತ್ತವೆ. 

  ಅದೇ ರೀತಿಯಲ್ಲಿ ಹಣ ಪಾವತಿಸಿ  ಒಮ್ಮೆಲೆ  ಮಾತ್ರ  ಬಳಸಬಹುದಂತ  ಹೋಟೆಲ್  ಆಹಾರ,  ಬಾಡಿಗೆ ವಾಹನ,  ದಿನಸಿ,  ತರಕಾರಿ,  ಇಂಧನ,  ಬ್ಯೂಟಿ ಪಾರ್ಲರ್ ಸೇವೆ,  ಸಮಾರಂಭದ ಖರ್ಚು  ಇತ್ಯಾದಿ  ಸೇವೆಗಳು  ಪಾವತಿಸಿದ ಹಣಕ್ಕೆ ಒಮ್ಮೆ ಮಾತ್ರ ಬಳಸಬಹುದು.  ಇವುಗಳನ್ನು  ಉಪಭೋಗ್ಯ (consumables) ವಸ್ತುಗಳನ್ನಾಗಿ  ಗುರುತಿಸಬಹುದು. ಹೀಗೆ  ಉತ್ಪನ್ನಗಳು ಆಗಿರಲಿ,  ಸಲಕರಣೆಗಳಾಗಿರಲಿ  ಅಥವಾ ಸೇವೆಗಳಾಗಿರಲಿ  ನಮ್ಮ ಜೀವನದಲ್ಲಿ  ಬೇಕಿದ್ದ ಮೌಲ್ಯಗಳನ್ನು ಸೃಷ್ಟಿ ಮಾಡುವುದು.   ಆದುದರಿಂದ  ನಮಗೆ ಬೇಕಿರುವ  ಮೌಲ್ಯಗಳು  ಅಥವಾ ಸೇವೆಗಳ  ಕಡೆಗೆ ಗಮನವಿರಬೇಕೆ ಹೊರತು ಅದರ ಬೆಲೆಗಲ್ಲ ಅಥವಾ ಬರಿ ಹಣದ ಸಂಗ್ರಹಣೆಗಲ್ಲ.

 ಹಣ ಗಳಿಸುತ್ತಾ ಹೋದರೆ  ಅದಕ್ಕೆ ಮಿತಿ ಇರುವುದಿಲ್ಲ ಆದರೆ  ನೀವು ನಿಮ್ಮ ಅವಶ್ಯಕ  ವಸ್ತುಗಳನ್ನು  ಅಥವಾ  ನಿಮ್ಮ ಆಸೆಗಳನ್ನು  ಈಡೇರಿಸಲು ಹೊರಟರೆ ಜೊತೆಗೆ ಅದು ನಿಮ್ಮ ಜೀವನಕ್ಕೆ ಕೊಡುವ  ಮೌಲ್ಯಗಳಿಗೆ ಗಮನಹರಿಸಿದರೆ  ಅದಕ್ಕೊಂದು ಮಿತಿ ಇರುತ್ತದೆ  ಹಾಗೆಯೇ  ತೃಪ್ತಿಯ  ಕೊನೆ ಇರುತ್ತದೆ.   ಆದುದರಿಂದ  ನಿಮಗೇನು ಬೇಕು  ಎಂಬುದು ಸ್ಪಷ್ಟವಾಗಿ   ತಿಳಿದಿರಲಿ  ಆಗ  ನಿಮ್ಮ ಜೀವನದಲ್ಲಿ ಮೌಲ್ಯದ ಕಡೆಗೆ ಗಮನ ಹರಿಸಬಹುದು  ಹಾಗೂ  ಸಂತೃಪ್ತಿಗೆ ಒತ್ತು ಕೊಡಬಹುದು. 

ಒಂದು ವೇಳೆ ಜಗತ್ತನ್ನು  ಮೆಚ್ಚಿಸಬೇಕು  ಎಂಬ ಉದ್ದೇಶದಿಂದ  ಹೊರಟರೆ, ನೀವು ಅನಗತ್ಯವಾದಂತಹ   ಅದ್ದೂರಿ  ಮತ್ತು ಆಡಂಬರದ ವಸ್ತುಗಳನ್ನು,  ನಿಮ್ಮ ಬಳಿ ಇಲ್ಲದ ದುಡ್ಡಿನಿಂದ  (ಸಾಲದ  ಹಣದಿಂದ)  ಖರೀದಿಸಲು ಹೊರಟರೆ, ಆ ಜಗಮೆಚ್ಚುಗೆ ಎಂಬ ಕಾರ್ಯ ಯಾವುದೇ ಮೌಲ್ಯ   ಸೃಷ್ಟಿಸುವುದಿಲ್ಲ.  ನಿಮಗೆ ಹೊರೆಯಾಗಿ ಮಾನಸಿಕ ಹಿಂಸೆಯಾಗಿ  ಪರಿಣಮಿಸುತ್ತದೆ.   ಹಾಗಾಗಿ ಪೊಳ್ಳು ಪ್ರತಿಷ್ಠೆಯನ್ನು ಬಿಟ್ಟು  ಸರಿಯಾದ ಮೌಲ್ಯಗಳನ್ನು ಅರ್ಥೈಸಿಕೊಳ್ಳಿ  ಹಾಗೂ ಅದರ ಈಡೇರಿಕೆಯೊಂದಿಗೆ ತೃಪ್ತಿಯ ಜೀವನ ನಡೆಸಿ.

ಪಾರ್ಕಿನ್ ಸನ್ಸ್ ನಿಯಮ

  ಪಾರ್ಕಿನ್ ಸನ್ಸ್ ನಿಯಮ :


              ಮನೆ ಹಾಗೂ ಹಣವನ್ನು ನಿರ್ವಹಣೆ ಮಾಡುವ  ಯಜಮಾನ  ಪಾರ್ಕಿನ್ ಸನ್ಸ್ ನಿಯಮವನ್ನು ತಿಳಿಯುವುದು ಅತಿ ಮುಖ್ಯ.  ಇಲ್ಲದೆ ಹೋದರೆ  ಮುಂದೊಂದು ದಿವಸ  ಎಷ್ಟೇ ಹಣ ಸಂಪಾದಿಸಿದರು  ಯಾಕೆ ಅದು ಉಳಿಯುವುದಿಲ್ಲ ಎಂಬ  ಪ್ರಶ್ನೆ ಮೂಡುವುದು ಸಹಜ.   ಹಣ ಉಳಿಯದೆ ಇರುವುದಕ್ಕೆ  ಹಲವಾರು ಕಾರಣಗಳಿರುತ್ತವೆ, ಅದರಲ್ಲಿ ಒಂದು ಕಾರಣವನ್ನು  ಪಾರ್ಕಿನ್ ಸನ್ಸ್ ತಮ್ಮ ನಿಯಮದ  ಮೂಲಕ ಹೇಳುತ್ತಾರೆ. ಸಿರಿಲ್  ನಾರ್ತ್ ಕೋಟ್ ಪಾರ್ಕಿನ್ ಸನ್  ಒಬ್ಬ ಬ್ರಿಟಿಷ್  ಮೂಲದ ನೌಕೆಗಳ ಇತಿಹಾಸಗಾರ.  ಇವರು 1958ರಲ್ಲಿ The Parkinson's Law: The Pursuit of progress  ಎನ್ನುವ ಪುಸ್ತಕವನ್ನು  ಪ್ರಕಟಿಸಿದರು.  ಈ ಪುಸ್ತಕದಲ್ಲಿ ಅವರು  ಸಮಯದ ಬಗ್ಗೆ ಒಂದು ನಿಯಮವನ್ನು ಬರೆದಿದ್ದಾರೆ.  ಅದು ಕೆಳಕಂಡಂತೆ ಇದೆ.

                                 ಚಿತ್ರ ಕೃಪೆ:  ಅಂತರ್ಜಾಲ

"ಕೆಲಸವು ಅದರ ಪೂರ್ಣಗೊಳಿಸುವಿಕೆಗೆ ನಿಗದಿಪಡಿಸಿದ ಸಮಯವನ್ನು ತುಂಬಲು ವಿಸ್ತರಿಸುತ್ತದೆ"

ಅಂದರೆ  ನಿಮಗೆ ಕೊಟ್ಟಂತಹ ಸಮಯದ ಗಡುವಿಗೆ ತಕ್ಕಂತೆ  ನಿಮ್ಮ  ಕೆಲಸವು  ವಿಸ್ತರಿಸುತ್ತದೆ.    ಉದಾಹರಣೆಗೆ  ವಿದ್ಯಾರ್ಥಿಗಳು  ವಾರ್ಷಿಕ ಪರೀಕ್ಷೆಯು ಮಾರ್ಚ್ ನಲ್ಲಿ ಇರುವುದರಿಂದ ಇನ್ನೂ ಬೇಕಾದಷ್ಟು ಸಮಯವಿದೆ ಎಂದು ಉದಾಸೀನತೆ ಮಾಡಿ, ಜನವರಿಯಲ್ಲಿ ಗಂಭೀರವಾಗಿ ಓದಲು ಪ್ರಾರಂಭಿಸಬಹುದು  ಅಂದರೆ  ಇನ್ನೂ ಬೇಕಾದಷ್ಟು ಸಮಯವಿದೆ  ಎಂಬ ತಾತ್ಸಾರ  ಕಾಲಹರಣ ಮಾಡುವಂತೆ ಮಾಡುತ್ತದೆ. ಓದುವ ಕಾರ್ಯವನ್ನು ಕೊನೆಯ ತನಕ ಮಾಡುವಂತೆ  ವಿಸ್ತರಿಸುತ್ತದೆ.   

ಇದೇ ರೀತಿ  ಆರ್ಥಿಕತೆ ಬಗ್ಗೆ ಇರುವ ನಿಯಮವೆಂದರೆ

"ಜನರು ಎಷ್ಟೇ ಹಣವನ್ನು ಸಂಪಾದಿಸಿದರೂ,  ಅವರ ಖರ್ಚುಗಳು  ಗಳಿಸಿದ ಆದಾಯಕ್ಕೆ ತಕ್ಕಂತೆ ವಿಸ್ತರಿಸುತ್ತದೆ"

 ಈ ನಿಯಮದ ಮೂಲಕ  ಅವರು ಹೇಳಬಯಸುವುದು ಜನರು  ತಮ್ಮ ವೃತ್ತಿ ಜೀವನದ ಆರಂಭದ ಆದಾಯಕ್ಕಿಂತ (ವೇತನ/ವ್ಯಾಪಾರ/ಉದ್ಯಮದ ಲಾಭ)  ಭವಿಷ್ಯದಲ್ಲಿ ಎಷ್ಟೇ ಪಟ್ಟು ಹಣವನ್ನು ಸಂಪಾದಿಸಿದರು  ಅವರ ಖರ್ಚುಗಳು  ಅವರ ಜೀವನ ಶೈಲಿಯ ತಕ್ಕಂತೆ  ಸಂಪಾದನೆಯ ಸಮಕ್ಕೆ ವಿಸ್ತರಿಸುತ್ತದೆ. 

 ಉದಾಹರಣೆಗೆ ಜನರು  ಒಂದು ದರ್ಶಿನಿ ಹೋಟೆಲ್ ನಲ್ಲಿ ಊಟ ಮಾಡುತ್ತಿದ್ದವರು   ಹಣ ಸಂಪಾದನೆ ಹೆಚ್ಚಾದಂತೆ   ಒಂದು ದುಬಾರಿ ರೆಸ್ಟೋರೆಂಟ್ ನಲ್ಲಿ  ಊಟ ಮಾಡುತ್ತಾರೆ,  ಹಾಗೆಯೆ  ಒಂದು ಸಾಧಾರಣ ಮನೆಯಲ್ಲಿ ವಾಸ ಮಾಡುವವರು  ಹಣ ಗಳಿಸಿದಂತೆ  ದೊಡ್ಡ ಬಂಗಲೆಯಲ್ಲಿ ವಾಸ ಮಾಡಲು ಮುಂದಾಗುತ್ತಾರೆ. ಒಂದು ದ್ವಿಚಕ್ರ ವಾಹನದಲ್ಲಿ ಓಡಾಡುವವರು ಒಂದು ದೊಡ್ಡ ಕಾರನ್ನು  ಹಾಗೆಯೇ ಮುಂದೆ  ಐಷಾರಾಮಿ ಕಾರನ್ನು ಕೊಂಡುಕೊಳ್ಳಲು ಮುಂದಾಗುವರು. ಇದೇ ರೀತಿಯಲ್ಲಿ  ಇಂದು  ಹಲವು ಬಗೆಯ ವಿದ್ಯುನ್ಮಾನ ಉಪಕರಣಗಳು, ಉತ್ಪನ್ನಗಳು  ಲಭ್ಯವಿದೆ.  ಹೀಗೆ ನಾವು  ಹತ್ತು ಹಲವಾರು  ಉತ್ಪನ್ನಗಳ ಬಳಕೆ ಮಾಡುತ್ತೇವೆ ಹಾಗೆಯೇ ವಿವಿಧ ಸೇವೆಗಳನ್ನು  ಬಳಸಿಕೊಳ್ಳುತ್ತೇವೆ .  ಒಂದೊಂದೇ ಇತರ ವೆಚ್ಚಗಳನ್ನು  ಸೇರಿಸುತ್ತಾ ಹೋದರೆ  ಇವುಗಳ ಒಟ್ಟು ಸಮಗ್ರ  ವೆಚ್ಚವು ಜನರ ಆದಾಯದ ಸಮಕ್ಕೆ ಅಥವಾ ಆದಾಯವನ್ನು ಮೀರಿ  ಬೆಳೆಯುತ್ತದೆ. 
                                                                                                                                                                      ಮಾರುಕಟ್ಟೆಯಲ್ಲಿ ಒಂದು ಉತ್ಪನ್ನ ಕಡಿಮೆ ಬೆಲೆಯ ಬ್ರಾಂಡ್ ನಿಂದ  ಹಿಡಿದು  ಕೈಗೆಟುಕಲಾರದ  ಐಶಾರಾಮಿ ಬ್ರಾಂಡ್ ಗಳ ತನಕ ಎಲ್ಲಾ ವಿವಿಧ  ಬೆಲೆಗಳಲ್ಲಿ ಲಭ್ಯವಿದೆ. ಸಾಮಾನ್ಯವಾಗಿ  ಜನರ ಅವಶ್ಯಕತೆಗಳಿಗೆ ಮಿತಿ ಇರುತ್ತದೆ  ಆದರೆ ಆಸೆಗಳಿಗೆ ಮಿತಿ ಇರುವುದಿಲ್ಲ. ಹೀಗಾಗಿ ಜನರು ಎಷ್ಟೇ ಸಂಪಾದನೆ ಮಾಡಿದರು  ಜೀವನ ಶೈಲಿಗೋಸ್ಕರ  ಹಾಗೂ ಪರರ ಮೆಚ್ಚುಗೆಗೋಸ್ಕರ  ತಮ್ಮ ಜೀವನ ಶೈಲಿಯನ್ನು ಮೇಲ್ದರ್ಜೆಗೆ ಏರಿಸಿ ಹಣವನ್ನು ಅಧಿಕವಾಗಿ ಖರ್ಚು ಮಾಡುತ್ತಾರೆ. ಪರಿಣಾಮವಾಗಿ ಹಣದ ಕೊರತೆಯಿಂದ, ಅಭದ್ರತೆಯಿಂದ, ಭವಿಷ್ಯದ  ಅನಿಶ್ಚಿತತೆಗಳಿಂದ  ಕೊರಗುತ್ತಾರೆ. ಹೀಗಾಗಿ  ಭವಿಷ್ಯದಲ್ಲಿ ಬರುವ  ಉದ್ಯೋಗ ಮುಂಬಡ್ತಿ ಮತ್ತು ವೇತನ ಪರಿಷ್ಕರಣೆ  ನಮ್ಮ ಈಗಿನ  ಸಮಸ್ಯೆಗಳನ್ನು ಪರಿಹಾರ ಮಾಡುತ್ತದೆ  ಎಂದು  ಹೇಳಲಾಗದು. ಆದರೆ  ನಮ್ಮ ಈ ತಿಳುವಳಿಕೆಯಿಂದ,  ನಾವು  ಪ್ರಜ್ಞಾಪೂರ್ವಕವಾಗಿ  ಪ್ರಯತ್ನಿಸಿದಲ್ಲಿ   ಖರ್ಚುಗಳನ್ನು  ಮಿತಿಗೊಳಿಸಿ   ಒಂದಷ್ಟರ ಮಟ್ಟಿಗೆ  ನಿಯಂತ್ರಣ ಸಾಧಿಸಿ  ಜೀವನವನ್ನು  ಸುಗಮಗೊಳಿಸಬಹುದು.

ಉಳಿದ ಕಾರಣಗಳು ಯಾವುವು:     

ಕೇವಲ ಪಾರ್ಕಿನ್ ಸನ್ಸ್ ನಿಯಮ ಕೊಟ್ಟ ಕಾರಣ ಮಾತ್ರವಲ್ಲ, ಹಣದ ಕೊರತೆಗೆ ಇನ್ನೂ ಹಲವಾರು ಕಾರಣಗಳಿವೆ.  ಕೆಲವು ನಮ್ಮ ನಿಯಂತ್ರಣದಲ್ಲಿರುತ್ತದೆ,  ಇನ್ನುಳಿದವು ನಮ್ಮ ನಿಯಂತ್ರಣಕ್ಕೆ ಬಾರದು. ಅವುಗಳು ಈ ಕೆಳಕಂಡಂತಿವೆ

ತೆರಿಗೆಗಳು:

 ಭಾರತದಲ್ಲಿ  ಹಲವು ವಿಧದ ತೆರಿಗೆಗಳಿವೆ  ಅವುಗಳಲ್ಲಿ ಪ್ರಮುಖವಾಗಿ ಎರಡು ವಿಧಗಳು.   ಅವುಗಳೆಂದರೆ ನೇರ ತೆರಿಗೆ (Direct Tax)  ಹಾಗೂ  ಪರೋಕ್ಷ ತೆರಿಗೆ (Indirect Tax).    ವೇತನದಾರರಿಗೆ    ಮಾಸಿಕ ವೇತನ ಬರುವುದೇ ತೆರಿಗೆಗಳು ಕಡಿತಗೊಳಿಸಿದ ನಂತರ.  ಇದರಲ್ಲಿ  ವೇತನದಾರನು  ಶೇ. 5ರಿಂದ ಶೇ. 30 ತನಕ ಮಾಸಿಕ ವೇತನವನ್ನು  ಆದಾಯ ತೆರಿಗೆ(Income Tax) ರೂಪದಲ್ಲಿ  ಸರಕಾರಕ್ಕೆ  ಕೊಡಬೇಕಾಗುತ್ತದೆ.   ಇದು ನೇರ  ತೆರಿಗೆ  ಆದರೆ  ತೆರಿಗೆ ಇಲ್ಲಿಗೆ ನಿಲ್ಲುವುದಿಲ್ಲ  ಕೈಗೆ ಬಂದ ಬಾಕಿ ಉಳಿದ ಶೇ. 70ರಷ್ಟು ವೇತನದಲ್ಲಿ ಖರ್ಚು ಮಾಡುವಾಗ ಪರೋಕ್ಷ ತೆರಿಗೆಯನ್ನು ಕಟ್ಟಬೇಕಾಗುತ್ತದೆ.  ಇದರ ಅಡಿಯಲ್ಲಿ  ಪ್ರಮುಖವಾಗಿ  ಸರಕು ಮತ್ತು ಸೇವಾ ತೆರಿಗೆ (ಜಿಎಸ್‌ಟಿ - GST),   ಮೌಲ್ಯವರ್ಧಿತ ತೆರಿಗೆ (ವಿಎಟಿ-VAT),  ಮಾರಾಟ ತೆರಿಗೆ(Sales Tax),  ಸೇವಾ ತೆರಿಗೆಗಳಿವೆ (Service tax).  ಇವುಗಳಲ್ಲಿ  ಹಲವು ಮಟ್ಟದ ಶೇಕಡವಾರು ತೆರಿಗೆಗಳಿವೆ (5%, 12%, 18% ಹಾಗೂ 28%). 

ಇದಷ್ಟೇ ಅಲ್ಲದೆ  ಬಂಡವಾಳ ಹೂಡಿಕೆದಾರರಿಗೆ  ಬಂಡವಾಳ ಲಾಭ ತೆರಿಗೆ (Capital Gains Tax),  ಸ್ವಂತ ಮನೆ ಹೊಂದಿದ್ದರೆ ವಾರ್ಷಿಕ ಆಸ್ತಿ ತೆರಿಗೆ(Property Tax),  ವಾಹನ ಕೊಂಡುಕೊಂಡರೆ ಜೀವಿತಾವಧಿ ರಸ್ತೆ ತೆರಿಗೆ (Lifetime Road Tax),  ನೋಂದಣಿ ಶುಲ್ಕ(Registration fee), ರಸ್ತೆ ಸುಂಕ(Toll Tax),  ಹೆಚ್ಚುವರಿ ಶುಲ್ಕ (Surcharge),  ಸೆಸ್ (cess)  ಹೀಗೆ  ಹಲವು ರೀತಿಯ  ನೇರ, ಪರೋಕ್ಷ ಹಾಗೂ  ಇತರೆ  ತೆರಿಗೆಗಳನ್ನು ನಾಗರಿಕರು  ಸರ್ಕಾರಕ್ಕೆ  ಕಟ್ಟಬೇಕಾಗುತ್ತದೆ.  

     ಒಟ್ಟಾರೆಯಾಗಿ  ಭಾರತದ ನಾಗರಿಕರು  ಸಾಮಾನ್ಯವಾಗಿ   ತಮ್ಮ ಆದಾಯದ  ಶೇ.42 ರಿಂದ  ಶೇ. 50ರವರೆಗೆ   ಆದಾಯವನ್ನು  ತೆರಿಗೆಯ ರೂಪದಲ್ಲಿ  ಸರ್ಕಾರಕ್ಕೆ ಕಟ್ಟುತ್ತಾರೆ.   ಅಂದರೆ  ತಾವು ದುಡಿದ  ಐದರಿಂದ ಆರು ತಿಂಗಳ  ಆದಾಯವನ್ನು  ತೆರಿಗೆ ರೂಪದಲ್ಲಿ  ಸರ್ಕಾರಕ್ಕೆ ಕಟ್ಟುತ್ತಾರೆ.  ಇದು ಸಹ  ಹಣದ ಅಭಾವಕ್ಕೆ  ಕೊಡುಗೆಯನ್ನು ನೀಡುತ್ತದೆ. ಆದರೆ  ತೆರಿಗೆಗಳ ಮೇಲೆ  ಹೆಚ್ಚಿನ ಸಂಶೋಧನೆ ನಡೆಸಿ  ತೆರಿಗೆ ಕಾನೂನು ನಿಯಮಗಳ ತಿಳುವಳಿಕೆಯನ್ನು ಹೆಚ್ಚಿಸಿಕೊಂಡು  ಸರ್ಕಾರ  ಒದಗಿಸಿರುವ  ಅವಕಾಶಗಳ ಸರಿಯಾದ ಬಳಕೆಯಿಂದ  ಅನಗತ್ಯ  ತೆರಿಗೆಯನ್ನು  ಕಟ್ಟದೆ ಒಂದು ಮಟ್ಟಿಗೆ ಹಣವನ್ನು ಉಳಿಸಬಹುದು.    

ಹಣದುಬ್ಬರ:

ಹಣದುಬ್ಬರವೆಂದರೆ  ಸರಕು ಮತ್ತು ಸೇವೆಗಳಲ್ಲಿ ಬೆಲೆಗಳ   ಹೆಚ್ಚಳ.  ಪ್ರತಿ  ವರ್ಷವೂ  ದೇಶದಲ್ಲಿ ಹಣದುಬ್ಬರ ಇದ್ದೇ ಇರುತ್ತದೆ  ಅದರ ಶೇಖಡಾವಾರು ಪ್ರಮಾಣ ವರ್ಷದಿಂದ ವರ್ಷಕ್ಕೆ  ಬದಲಾಗುತ್ತಿರುತ್ತದೆ.  ಹಣದುಬ್ಬರದ ಪ್ರಮಾಣ ಕಡಿಮೆ ಇದ್ದಷ್ಟು  ಬೆಲೆಗಳು ಕಡಿಮೆ ಇರುತ್ತದೆ  ಅದು ಹೆಚ್ಚಿದಷ್ಟು  ವಸ್ತುಗಳು ಮತ್ತು ಸೇವೆಗಳ ಬೆಲೆ  ಹೆಚ್ಚಾಗಿರುತ್ತದೆ.    ಹಣದುಬ್ಬರದಿಂದ ರೂಪಾಯಿಯು ತನ್ನ ಮೌಲ್ಯವನ್ನು ಕಳೆದುಕೊಳ್ಳುತ್ತದೆ.  ಉದಾಹರಣೆಗೆ  ಇಂದು ಹಣದುಬ್ಬರ ಶೇ. 7 ಇದೆ ಎಂದು ತಿಳಿಯೋಣ,  ಈ ವರ್ಷ ಒಂದು ವಸ್ತು  ರೂ.100 ಕ್ಕೆ   ಸಿಕ್ಕರೆ  ಅದೇ ವಸ್ತುವಿನ  ಬೆಲೆ  ಮುಂದಿನ ವರ್ಷಕ್ಕೆ ರೂ.107 ಆಗಿರುತ್ತದೆ.  
           ವೇತನದಾರರ ವಾರ್ಷಿಕ ವೇತನದಲ್ಲಿ ಪರಿಷ್ಕರಣೆಯು  ಹಣದುಬ್ಬರಕ್ಕಿಂತ ಹೆಚ್ಚಿದ್ದರೆ  ಅದು ವೇತನದಲ್ಲಿ ಹೆಚ್ಚಳವಾದಂತೆ,  ಇಲ್ಲದೆ ಹೋದರೆ  ಆ ಪರಿಷ್ಕರಣೆ ಕೇವಲ  ಹಣದುಬ್ಬರಕ್ಕೆ ಹೊಂದಾಣಿಕೆ ಆಗುತ್ತದೆ ಅಥವಾ ವೇತನದ ಮೌಲ್ಯ ಕುಸಿಯುತ್ತದೆ ಹೊರತಾಗಿ  ನಿಮ್ಮ ಆದಾಯದಲ್ಲಿ ಏರಿಕೆಯಾಗುವುದಿಲ್ಲ.  ಹೀಗೆ  ನಾವು ದುಡಿದ ಹಣದ  ಮೌಲ್ಯವು  ಕುಸಿಯುತ್ತಿರುತ್ತದೆ.   ಹೀಗಾಗಿ ಹಣದುಬ್ಬರ ಸಹ  ಹಣದ ಅಭಾವಕ್ಕೆ ದೊಡ್ಡ ಕೊಡುಗೆಯನ್ನು  ಕೊಡುತ್ತದೆ.    

ಹೆಚ್ಚಾಗುವ ಜವಾಬ್ದಾರಿಗಳು:

ಸಾಮಾನ್ಯ ಜೀವನ ನೋಡಿದಾಗ  ವಿದ್ಯಾಭ್ಯಾಸ ಮುಗಿಸಿದ ನಂತರ  ತರುಣ ತರುಣಿಯರು ಸಂಪಾದಿಸಲು  ಆರಂಭಿಸುತ್ತಾರೆ.   ಆ  ಅವಿವಾಹಿತ ಜೀವನದ ಹಂತದಲ್ಲಿ  ಅವರಲ್ಲಿ ಹಣವು ಹೆಚ್ಚಾಗಿರುತ್ತದೆ  ಆದರೆ  ಖರ್ಚುಗಳು ಕಡಿಮೆ ಇರುತ್ತದೆ. ಆಗ ಹಣದ ಕೊರತೆಯು ಕಾಣುವುದಿಲ್ಲ.   

ನಂತರದ ಹಂತಗಳಲ್ಲಿ  ವಿವಾಹಿತರಾಗಿ  ಇನ್ನೊಬ್ಬ ವ್ಯಕ್ತಿಯ ಜವಾಬ್ದಾರಿ ಹೊರುತ್ತಾರೆ. ಸಂಗಾತಿಯ  ಮೂಲಭೂತ ಅವಶ್ಯಕತೆಗಳು  ಹಾಗೂ ಕನಿಷ್ಠ ಆಸೆಗಳು  ಹಣದ ಬೇಡಿಕೆಯನ್ನು  ಹೆಚ್ಚು ಮಾಡುತ್ತದೆ. ಉದ್ಯೋಗಕ್ಕಾಗಿ  ನಗರಕ್ಕೆ ವಲಸೆ ಬಂದವರಾದರೆ  ಸಂಗಾತಿ ಹಾಗೂ ಸಂಸಾರಕ್ಕಾಗಿ  ಹೊಸ ಮನೆಯನ್ನು  ಮಾಡಬೇಕಾಗುತ್ತದೆ.  ಮನೆಗೆ ಅಗತ್ಯ ವಸ್ತುಗಳು  ಹಾಗೂ  ಸೌಕರ್ಯಗಳನ್ನು  ಒದಗಿಸಬೇಕಾಗುತ್ತದೆ. ನಂತರ  ಒಂದು ಅಥವಾ ಎರಡು ಮಕ್ಕಳಾಗುತ್ತಾರೆ ಹಾಗೆಯೇ  ಅವರ  ಅವಶ್ಯಕತೆಗಳು  ಮತ್ತು ಆಸೆಗಳು   ಖರ್ಚುಗಳನ್ನು ಹೆಚ್ಚು ಮಾಡುತ್ತಾ  ಹೋಗುತ್ತದೆ. ಪರಿವಾರಕ್ಕಾಗಿ  ಒಂದು ಕಾರನ್ನು  ಕೊಂಡುಕೊಳ್ಳ ಬೇಕಾಗುತ್ತದೆ.  ಕುಟುಂಬದ ಗಾತ್ರಕ್ಕೆ ತಕ್ಕಂತೆ  ಸ್ವಂತ ನಿವೇಶನ ಕೊಂಡು ನಂತರ ಸುಸಜ್ಜಿತವಾದ ಮನೆಯನ್ನು ಕಟ್ಟಬೇಕಾಗುತ್ತದೆ.  

ಕುಟುಂಬದ ಎಲ್ಲಾ ಸದಸ್ಯರಿಗೆ ಸೌಲಭ್ಯಗಳ ಪೂರೈಸ ಬೇಕಾಗುತ್ತದೆ, ಎಲ್ಲರ ರಕ್ಷಣೆ ಮಾಡಬೇಕು ಹಾಗೂ ಸಣ್ಣಪುಟ್ಟ ಆಸೆಗಳನ್ನು  ಈಡೇರಿಸಬೇಕಾಗುತ್ತದೆ .    ಹೀಗೆಯೇ ಪ್ರಮುಖ ಹಂತಗಳಾದ ಮಕ್ಕಳ ವಿದ್ಯಾಭ್ಯಾಸ,   ವಿವಾಹ  ಹಾಗೂ  ನಿವೃತ್ತಿಯ ಪಿಂಚಣಿಯಂತಹ   ಅನೇಕ ಬೇಡಿಕೆಗಳು ಕಾಲ ಕಾಲಕ್ಕೆ ಉದ್ಭವವಾಗುತ್ತದೆ.  ಈ ಹೊಸ ಬೇಡಿಕೆಗಳು  ಖರ್ಚುಗಳನ್ನು ನಿಮ್ಮ ಆದಾಯದ  ಮಟ್ಟಕ್ಕೆ ತಲುಪಿಸುತ್ತವೆ,   ಎಷ್ಟೋ ಬಾರಿ ಆದಾಯವನ್ನು ಮೀರಿ ಬೇಡಿಕೆಗಳು ಬೆಳೆಯುತ್ತವೆ.   ಹೀಗೆ ಹಂತ ಹಂತವಾಗಿ ಹೆಚ್ಚಾಗುವ ಹಣದ ಬೇಡಿಕೆಗಳು  ಎಷ್ಟೇ ದುಡಿದರು  ಹಣ ಸಾಕಾಗುವುದಿಲ್ಲ ಎಂಬ ಭಾವನೆಯನ್ನು  ತರಿಸುತ್ತದೆ. ಆದರೆ  ನಮ್ಮ ಈ ತಿಳುವಳಿಕೆಯಿಂದ,  ನಾವು  ಪ್ರಜ್ಞಾಪೂರ್ವಕವಾಗಿ  ಸಂಗಾತಿಯೊಡನೆ ಕುಳಿತು  ಪ್ರತಿ ತಿಂಗಳ  ಆಯ- ವ್ಯಯಗಳ ಯೋಜನೆ ಹಾಕಿ  ಸಂಸಾರವನ್ನು  ಬುದ್ಧಿವಂತಿಕೆಯಿಂದ ನಿಭಾಯಿಸದಲ್ಲಿ  ಜೀವನದ ದೋಣಿಯನ್ನು  ಸರಾಗವಾಗಿ ಸಾಗಿಸಬಹುದು.       

 ಸಾರಾಂಶ:

 ಸಾಮಾನ್ಯವಾಗಿ  ಜನರು  ತಾವು  ಗಳಿಸಿದ  ಹಣ  ಎಲ್ಲಾ ಖರ್ಚಾಗಿ  ನಮಗೇನು ಉಳಿಯುವುದಿಲ್ಲ  ಎಂದು  ಚಿಂತಿಸುತ್ತಾರೆ.   ನಮ್ಮ ಹಣದ  ಕೊರತೆಯಲ್ಲಿ  ನಮ್ಮ ಅವಶ್ಯಕತೆ , ಆಸೆಗಳಿಗೆ ಮಾಡುವ ಖರ್ಚುಗಳ         ಹೊರತಾಗಿ   ನಮ್ಮ ನಿಯಂತ್ರಣಕ್ಕೆ  ಬಾರದ  ಹಲವಾರು ಅಂಶಗಳು  ಒಳಗೊಂಡಿರುತ್ತದೆ  ಹೀಗಾಗಿ  ನಮ್ಮ ಖರ್ಚುಗಳ ಹತೋಟಿ  ಸಂಪೂರ್ಣವಾಗಿ ನಮ್ಮಲ್ಲಿ ಇರುವುದಿಲ್ಲ  ಅದಕ್ಕೆ  ಇರುವ   ಕಾರಣಗಳು  ಈ ಕೆಳಕಂಡಂತೆ  ಇವೆ.

ಪಾರ್ಕಿನ್ ಸನ್ಸ್  ನಿಯಮ :   ಆದಾಯಕ್ಕೆ ತಕ್ಕಂತೆ  ಜನರು  ತಮ್ಮ ಜೀವನ ಶೈಲಿಯನ್ನು   ಮೇಲ್ದರ್ಜೆಗೆ ಏರಿಸುತ್ತಾ  ದುಬಾರಿ   ಹಾಗೂ  ಐಷಾರಾಮಿ  ಉತ್ಪನ್ನಗಳು ಹಾಗೂ   ಸೇವೆಗಳನ್ನು ಪಡೆಯುತ್ತಾರೆ. ಇದು  ಹಣದ ಕೊರತೆಗೆ ಕಾರಣವಾಗುತ್ತದೆ.
ಸರ್ಕಾರದ  ತೆರಿಗೆ ಪದ್ಧತಿ:   ನಮ್ಮ  ಆದಾಯದ ಹಣದಲ್ಲಿ  ತೆರಿಗೆ ಮೂಲಕ ದೊಡ್ಡ ಪಾಲು ಮೊತ್ತವನ್ನು ಸರ್ಕಾರಕ್ಕೆ ಕೊಡಲೇಬೇಕಾದಂತ ಅನಿವಾರ್ಯತೆ. ಇದು ಸಹ ನಮ್ಮ  ಹಣದ ಕೊರತೆಗೆ  ಕೊಡುಗೆಯಾಗುತ್ತದೆ 
ಹಣದುಬ್ಬರ:  ಪ್ರತಿ ವರ್ಷ ಇರುವ ಹಣದುಬ್ಬರ  ರೂಪಾಯಿಯ ಮೌಲ್ಯವನ್ನು  ಕುಸಿತಗೊಳಿಸಿ  ನಮ್ಮ ದುಡಿಮೆಯ ಮೌಲ್ಯವನ್ನು ಕಡಿಮೆ ಮಾಡುತ್ತದೆ.
ಕಾಲ ಕಾಲಕ್ಕೆ ಹೆಚ್ಚಾಗುವ ಜವಾಬ್ದಾರಿ: ಮನುಷ್ಯನ  ಜೀವನದಲ್ಲಿ ಹಂತ ಹಂತವಾಗಿ ಬರುವ     ಸಂಗಾತಿ, ಮಕ್ಕಳು,  ಮನೆ,  ವಾಹನ, ನಿವೃತ್ತಿ ಅನೇಕ ಜವಾಬ್ದಾರಿಗಳು ಕೂಡ  ಹಣದ ಕೊರತೆಗೆ  ಕಾರಣವಾಗುತ್ತದೆ.

ಪರಿವಿಡಿ

ಪರಿವಿಡಿ  

 ವೈಯಕ್ತಿಕ ಹಣಕಾಸು:

        ಪಾರ್ಕಿನ್ ಸನ್ಸ್ ನಿಯಮ - Done

        ಹಣಕ್ಕೆ ಪ್ರತಿಯಾಗಿ ಸಿಗುವ  ಮೌಲ್ಯ  - Done

        ಒಬ್ಬರೇ  ನಿರ್ವಹಿಸುವುದು  ಅಸಾಧ್ಯ - Done

        ಹಣದ ಜಾಡು ಹಿಡಿಯುವುದು    - Done

        ವೈಯಕ್ತಿಕ ಹಣಕಾಸು ಯೋಜನೆ 

        ಹಣದ ಗಳಿಕೆ 

        ಉದ್ದೇಶಕ್ಕಾಗಿ ಕೂಡಿಡುವುದು

        ಹಣದ ಉಳಿತಾಯ

        ರಕ್ಷಣೆ

        ಹೂಡಿಕೆ

      (ಹಣ ಗಳಿಸಲು ಹಾಗೂ ಹಣ ಉಳಿಸಲು ಶ್ರಮ ಹಾಗೂ ಬುದ್ಧಿವಂತಿಕೆಯ ಪ್ರಯೋಗ 

      ಬ್ಯಾಂಕ್ ಖಾತೆಯಿಂದ ಇನ್ನೊಂದು ಬ್ಯಾಂಕ್ ಖಾತೆಗೆ ಸಾಲ 

       ಉತ್ಪನ್ನಗಳು ಮತ್ತು ಸೇವೆಗಳು 

       ಆಸೆಗಳನ್ನು ಎಲ್ಲಿ ನಿಲ್ಲಿಸಬೇಕೆಂಬದು ಅರಿವಿರಲಿ (ಆಸೆಯ ಮಿತಿ) 

      ಕಡಿಮೆ ವೇತನ ಅಥವಾ ಆದಾಯ  ಎರಡು ನೌಕರಿಗಳು )

      ಮಿನಿಮಲಿಸಂ 

 ನಡವಳಿಕೆ:

         ಗಣ್ಯ ನಗಣ್ಯ

         ತಡೆಗಟ್ಟುವಿಕೆ / ರಕ್ಷಣೆ  

         ಪರಿಸರ ಅತ್ಯಂತ ಶಕ್ತಿಶಾಲಿ 

         ನಮ್ಮ ನಿಯಂತ್ರಣದಲ್ಲಿ ಇರುವುದರ ಕಡೆಗೆ ಗಮನ 

         ಸ್ಪಷ್ಟವಾಗಿ ಯೋಚಿಸುವುದು

         ಪುಸ್ತಕ ಓದುವ ಅಭ್ಯಾಸ

          ಸಂವಹನದ ಉದ್ದೇಶ

         ಪ್ರತಿ ಗುರಿಗೂ ಅಳತೆ ಇರಬೇಕು  

          ದಿನಚರಿ
        
ಕಾರ್ಪೊರೇಟ್ ಸಂಸ್ಥೆಗಳ ಕಾರ್ಯವೈಕರಿ:

             ಮಾಡಬೇಕಾದ ಕಾರ್ಯಗಳ ಪಟ್ಟಿ    

             ಮೂಲ ಕಾರಣದ ವಿಶ್ಲೇಷಣೆ

             ಕೆಲಸ  ವಿಂಗಡಣೆಯ ಕ್ರಮ

             ಏನು  ತಡೆಯುತ್ತಿದೆ

             ಮೂಲಸೌಕರ್ಯ, ಪರಿಸರ, ಉಪಕರಣಗಳು,  ಪ್ರಕ್ರಿಯೆ

            ನಿರಂತರ ಕಲಿಕೆ

             ಅಡೆತಡೆಗಳು,  ಅಪಾಯ