ಸಾಲಗಳು

 ಸಾಲಗಳು 

      ನಮಗೆ ದಿನನಿತ್ಯವೂ ಎಷ್ಟೋ ಮೊಬೈಲ್ ಕರೆಗಳು ಬರುತ್ತಿರುತ್ತವೆ, ಕ್ರೆಡಿಟ್ ಕಾರ್ಡ್ ತೆಗೆದುಕೊಳ್ಳಿ, ವೈಯಕ್ತಿಕ ಸಾಲ ತೆಗೆದುಕೊಳ್ಳಿ, ಓವರ್ ಡ್ರಾಫ್ಟ್ ಸಾಲ, ಬಂಗಾರದ ಮೇಲಿನ ಸಾಲ ಹೀಗೆ ನಾನಾ ಹೆಸರುಗಳಲ್ಲಿ ಲೋನ್ ಸಂಸ್ಥೆಗಳು, ಬ್ಯಾಂಕ್ ಗಳು, NBFC ಗಳು ಸಾಲವನ್ನು ಕೊಡಲು ನಾ ಮುಂದು ತಾ ಮುಂದು ಎಂದು ಹಾತೊರೆಯುತ್ತಿರುತ್ತವೆ. ಹಾಗಿದ್ದಲ್ಲಿ ಸಾಲ ಎಂದರೇನು ಎಂದು  ಅರ್ಥಮಾಡಿಕೊಳ್ಳೋಣ.

     ಸಾಲವು ನಾವು ಸಂಪಾದಿಸುವ ಮುನ್ನವೇ ಖರ್ಚು ಮಾಡುವ ಹಣವಾಗಿದ್ದು, ಅದನ್ನು ಭವಿಷ್ಯದ  ದಿನಗಳಲ್ಲಿ ಸಂಪಾದಿಸಿ ತೀರಿಸುವೆನು ಎಂಬ ಭರವಸೆಯ ಮೇಲೆ ಹಾಗೂ ಅಡಮಾನದ ಆಧಾರದ   ಮೂಲಕ ಹಣವನ್ನು ಎರವಲು ಪಡೆದು, ಇವತ್ತಿನ ದಿನ ಖರ್ಚು ಮಾಡುತ್ತೇವೆ.  ಆದರೆ ಸಾಲವನ್ನು ತೀರಿಸಲು ನಿಯಮಿತ ದಿನಗಳಿರುತ್ತವೆ ಹಾಗೂ ಅದಕ್ಕೆ ಬಡ್ಡಿ ಮತ್ತು ಶುಲ್ಕಗಳು ಇರುತ್ತದೆ.  ಕೆಲವು ಕಡೆ ಚಕ್ರಬಡ್ಡಿಯು ಸೇರುತ್ತದೆ. 

    ಹಾಗೆ ನೋಡಿದರೆ ಕೇವಲ ಜನಸಾಮಾನ್ಯರು  ಅಷ್ಟೇ ಅಲ್ಲ, ಕಾರ್ಪೊರೇಟ್ ಸಂಸ್ಥೆಗಳು, ಇತರೆ ಸಂಸ್ಥೆಗಳು, ರಾಜ್ಯ ಹಾಗೂ ಕೇಂದ್ರ ಸರ್ಕಾರಗಳು ಕೂಡ ಸಾಲವನ್ನು ಪಡೆಯುತ್ತವೆ.  ಹಾಗಂತ ಸಾಲವು ಒಳ್ಳೆಯದೆಂದು ಸಬೂಬು ಹೇಳುವುದಿಲ್ಲ. ಸಾಲವು ಒಂದು ಬದ್ಧತೆ ಆಗಿದ್ದು, ಕೆಲವು ದೀರ್ಘ ಕಾಲದ್ದು ಆಗಿರುತ್ತದೆ. ಅದು ಅಧಿಕವಾದರೆ ಇತರ ಖರ್ಚುಗಳಿಗೆ ಅಡ್ಡಿಪಡಿಸಿ ಮನೆಯಲ್ಲಿ, ಮನಸ್ಸಿನಲ್ಲಿ, ಜೀವನದಲ್ಲಿ ಇಕ್ಕಟ್ಟನ್ನು ಸೃಷ್ಟಿ ಮಾಡುತ್ತದೆ.  ಈ ಆರ್ಥಿಕ ಇಕ್ಕಟ್ಟಿನಿಂದ ನಮ್ಮ ಇತರೆ ಆರ್ಥಿಕ ಗುರಿಗಳನ್ನು ತಲುಪಲು ಹಣದ ಕೊರತೆಯುಂಟಾಗಿ, ಈ  ಆರ್ಥಿಕ ಇಕ್ಕಟ್ಟು ಮತ್ತೆ ಬೇರೆ  ಸಾಲವನ್ನು ಮಾಡಲು ದಾರಿ ಮಾಡಿಕೊಡುತ್ತದೆ.  ಆದಕಾರಣ ಸಾಲವನ್ನು ಒಂದು ಮಿತಿಯಲ್ಲಿ ತೆಗೆದುಕೊಳ್ಳಬೇಕು. ಅತಿ ಅವಶ್ಯಕತೆ ಇರುವ ಸಂದರ್ಭಗಳಲ್ಲಿ ಮಾತ್ರ ಸಾಲವನ್ನು ಮಾಡಬೇಕು, ಅದು ಕೂಡ ಕಡಿಮೆ ಬಡ್ಡಿ ದರದಲ್ಲಿ,  ಅದರಲ್ಲೂ ನಂಬಲಾರ್ಹ ಬ್ಯಾಂಕ್ /ಸಂಸ್ಥೆಗಳಲ್ಲಿ ಮಾತ್ರ. 

  ಸಾಲ ತೆಗೆದುಕೊಳ್ಳುವುದನ್ನು ತಪ್ಪಿಸುವುದು ಹಾಗೂ ತಾವೇ ಸಂಪಾದಿಸಿದ ಹಣದಲ್ಲಿ ಉತ್ಪನ್ನಗಳನ್ನು, ಸೇವೆಗಳನ್ನು ಕೊಳ್ಳುವುದು ಉತ್ತಮ ಆಯ್ಕೆಯಾದರು ಕೆಲವೊಮ್ಮೆ ಅತಿ ಹೆಚ್ಚು ವೆಚ್ಚದ ಗೃಹ ನಿರ್ಮಾಣ ಅಥವಾ ಹೊಸ ಉದ್ದಿಮೆ / ವ್ಯಾಪಾರದ ಆರಂಭಕ್ಕೆ ಬೇಕಾಗುವಷ್ಟು ಹಣ ಜನರ ಬಳಿ ಇರುವುದಿಲ್ಲ.  ಎಲ್ಲರಲ್ಲಿಯೂ ಅತಿದೊಡ್ಡ ಖರ್ಚಿನ ಕೆಲಸಗಳಿಗೆ ಕೂಡಿಡಲು ಸಾಧ್ಯವಾಗುವುದಿಲ್ಲ,  ಅದು ಅಲ್ಲದೆ ಹಣದುಬ್ಬರದಿಂದ, ಹಾಗೂ ದೀರ್ಘ ಕಾಲದ ಸಮಯಾವಕಾಶ ಬೇಡುವುದರಿಂದ ಸಾಲ ಪಡೆಯುವುದು ಒಳ್ಳೆಯ ನಿರ್ಧಾರವೇ ಆಗಿರುತ್ತದೆ. ಇಂತಹ ರಚನಾತ್ಮಕ ವಿಷಯಗಳಿಗೆ ತೆಗೆದುಕೊಳ್ಳುವ ಸಾಲ ಅನಿವಾರ್ಯವಾಗಿರುತ್ತದೆ ಹಾಗೂ ಅದು ಉತ್ತಮ ಭವಿಷ್ಯಕ್ಕೆ ಲಾಭದಾಯಕವಾಗಿರುತ್ತದೆ. 

ಆದರೆ ಮನೋರಂಜನೆಯ ಉದ್ದೇಶಕ್ಕಾಗಿ, ಮೋಜಿಗಾಗಿ, ಪ್ರವಾಸಕ್ಕಾಗಿ, ಪ್ರತಿಷ್ಠೆಯ ಪ್ರದರ್ಶನಕ್ಕಾಗಿ,  ದುಂದು ವೆಚ್ಚದ ಸಮಾರಂಭಗಳಿಗಾಗಿ, ಅಥವಾ ಯಾವುದೇ ಆರ್ಥಿಕ ಪ್ರಗತಿಯನ್ನು ಸಾಧಿಸದ ಕೆಲಸಗಳಿಗೆ ಸಾಲ ತೆಗೆದುಕೊಳ್ಳುವುದು ನಕಾರಾತ್ಮಕ ಪರಿಣಾಮಗಳನ್ನು ಬೀರುತ್ತವೆ. ಇಂತಹ ಸಾಲಗಳನ್ನು ತೆಗೆದುಕೊಳ್ಳಬಾರದು. 

ಸಾಲದ ಜೊತೆಗೆ ಬರುವ ಸಮಸ್ಯೆಗಳು:  

ಸಾಲವು ನಿಮ್ಮ ಹಲವು ಅಗತ್ಯಗಳು ಆಸೆಗಳನ್ನು ಒದಗಿಸುವ ಕೆಲಸ ಮಾಡುತ್ತವೆ, ತಾತ್ಕಾಲಿಕ ಆರ್ಥಿಕ ನೆರವು ನೀಡುತ್ತವೆ. ಆದರೆ ಜೊತೆಗೆ ಪ್ರತಿಕೂಲತೆಗಳು ಸಹ ತರುತ್ತದೆ. ಸಾಲವನ್ನು ಸರಿಯಾಗಿ ನಿರ್ವಹಿಸದಿದ್ದರೆ ಅದು ಆರ್ಥಿಕ, ಮಾನಸಿಕ, ಸಾಮಾಜಿಕ ಸಂಕಷ್ಟಗಳಿಗೆ ಕಾರಣವಾಗುತ್ತದೆ.  ಅವುಗಳೇನೆಂದು ನೋಡೋಣ 

1. ಉಳಿತಾಯ ಕಡಿಮೆಯಾಗುತ್ತದೆ: ಸಾಲದ ಕಂತು ಪಾವತಿಸಲು ಆದಾಯದ ದೊಡ್ಡ ಭಾಗ 

    ಬಳಸಲ್ಪಡುವುದರಿಂದ ಉಳಿತಾಯ ಕಡಿಮೆಯಾಗುತ್ತದೆ.

2. ಹೂಡಿಕೆ ಮಾಡಲು ಸಾಧ್ಯವಾಗದಿರುವುದು: ಭವಿಷ್ಯದ ಜವಾಬ್ದಾರಿಗಳಿಗೆ, ಯೋಜನೆಗಳಿಗೆ, ಆರ್ಥಿಕ ಗುರಿಗಳಿಗೆ ಹೂಡಿಕೆ ಮಾಡುವುದು ಸಾಧ್ಯವಾಗದಿರಬಹುದು.

3. ಸಾಲದ ಬಲೆ: ಒಂದು ಸಾಲ ತೀರಿಸಲು ಮತ್ತೊಂದು ಸಾಲ ತೆಗೆದುಕೊಳ್ಳುವ ಪರಿಸ್ಥಿತಿ.

4. ಆಸ್ತಿ ಕಳೆದುಕೊಳ್ಳುವ ಅಪಾಯ: ಆಸ್ತಿ ಮೇಲಿನ ಸಾಲ ಅಥವಾ ಚಿನ್ನದ ಮೇಲಿನ ಸಾಲ 

    ತೀರಿಸಲಾಗದಿದ್ದರೆ ಆಸ್ತಿ ಕಳೆದುಕೊಳ್ಳುವ ಸಾಧ್ಯತೆಗಳು. 

5. ಮಾನಸಿಕ ಒತ್ತಡ: ದೊಡ್ಡ ಮೊತ್ತದ ಹಾಗೂ ದೀರ್ಘ ಕಾಲಿನ ಸಾಲದಿಂದಾಗಿ ಮಾನಸಿಕ ಒತ್ತಡ, ನೆಮ್ಮದಿಯ ಹಾಗೂ ಆತ್ಮವಿಶ್ವಾಸದ ಕೊರತೆ ಉಂಟಾಗಬಹುದು. 

6. ಕುಟುಂಬ ಕಲಹ: ಹಣದ ಕೊರತೆಯಿಂದ ಅಗತ್ಯ ಹಾಗೂ ಆಸೆಗಳಲ್ಲಿ ರಾಜಿಮಾಡಿಕೊಂಡು ಕುಟುಂಬದಲ್ಲಿ ಅಸಮಾಧಾನ, ಅಶಾಂತಿ ಹಾಗೂ ಘರ್ಷಣೆ ಉಂಟಾಗಬಹುದು. 

7. ಸಂಬಂಧಗಳಲ್ಲಿ ಒಡಕು: ಸಂಬಂಧಿಕರಲ್ಲಿ, ಸ್ನೇಹಿತರಲ್ಲಿ ಸಾಲದ ಪಾವತಿಯಲ್ಲಿ ಏರುಪೇರಾದರೆ ಸಂಬಂಧಗಳು ಒಡೆಯುವ ಅಥವಾ ಅಪನಂಬಿಕೆಯ ಸಾಧ್ಯತೆ.  

ಹೀಗೆ ಸಾಲವನ್ನು ಸರಿಯಾಗಿ ನಿರ್ವಹಿಸದೆ ಹೋದರೆ ಅನೇಕ ಪ್ರತಿಕೂಲ ಪರಿಣಾಮಗಳನ್ನು ಎದುರಿಸಬೇಕಾಗುತ್ತದೆ. ಇದರಿಂದ ಸಾಲ ಒಂದು ಹೊರೆಯಾಗಿ ಪರಿಣಮಿಸಿ ಮನಸ್ಸಿನ ನೆಮ್ಮದಿಯನ್ನು  ಹಾಳು  ಮಾಡಿ, ಮುಂದಿನ ದಿನಗಳಲ್ಲಿ ಆರ್ಥಿಕ ಬಿಕ್ಕ ಟ್ಟು ಸೃಷ್ಟಿಸಿ , ಕುಟುಂಬದ ಜೀವನ ಮಟ್ಟಕ್ಕೆ ಅಡ್ಡ ಪರಿಣಾಮ ಬೀರುತ್ತದೆ.

 

ಸಾಲವನ್ನು ತಪ್ಪಿಸುವುದು / ತಡೆಗಟ್ಟುವುದು  ಹೇಗೆ

     ಸಾಲದ ಮೂಲಕ ಎರವಲು ಪಡೆದ ಹಣ, ಕೆಲವು ಅಗತ್ಯಗಳು, ಆಸೆಗಳನ್ನು ಈಡೇರಿಸಬಹುದು ಆದರೆ ಅದು ಹೆಚ್ಚಿನ ಹೊರೆಯಾಗಿ ಅನೇಕ ವ್ಯತಿರಿಕ್ತ ಪರಿಣಾಮಗಳನ್ನು ಬೀರುತ್ತದೆ. ಆದುದರಿಂದ ನಾವು ನಮ್ಮ ಅವಶ್ಯಕತೆಗಳ, ಆಸೆಗಳ ಈಡೇರಿಕೆಗಾಗಿ ಬೇಕಾಗುವ ಹಣವನ್ನು ಒಂದು ಪ್ರಕ್ರಿಯೆಗೆ ಒಳಪಡಿಸಿ  ಸಮರ್ಥವಾಗಿ ಸಂಪಾದಿಸಿ, ಕೂಡಿಟ್ಟು, ಹೂಡಿಕೆಯಿಂದ ಹೆಚ್ಚಿನ ಹಣ ಗಳಿಸುವುದರ ಮೂಲಕ ಬೇಕಾದ ಸೇವೆಗಳನ್ನು, ಉತ್ಪನ್ನಗಳನ್ನು ಸ್ವಂತ ಹಣದಿಂದ ಪಡೆದರೆ, ಸಾಲ ಮಾಡುವ ಸಂದರ್ಭವು ಬರುವುದಿಲ್ಲ ಅದು ಹೇಗೆಂದು ಕೆಳಗೆ ನೋಡೋಣ.

1.   ಜವಾಬ್ದಾರಿಗಳು ಹಾಗೂ ಘಟ್ಟಗಳನ್ನು ಗುರುತಿಸಿ: ನಿಮ್ಮ ಜೀವನದ ಘಟ್ಟವನ್ನು ಗುರುತಿಸಿ ನಂತರ ನಿಮ್ಮ ಜೀವನದ ಪ್ರಮುಖ ಜವಾಬ್ದಾರಿಗಳು, ಅನಿವಾರ್ಯ ಕಾರ್ಯಗಳನ್ನು ಪಟ್ಟಿ ಮಾಡುತ್ತಾ ಹೋಗಿ.

ಉದಾಹರಣೆಗೆ: ಶಿಕ್ಷಣ, ಮನೆ ನಿರ್ಮಾಣ, ಮಕ್ಕಳ ಅಭಿವೃದ್ಧಿ, ನಿವೃತ್ತಿ

2. ಯೋಜನೆ ರೂಪಿಸಿ:  ಮುಂಬರುವ ಜವಾಬ್ದಾರಿಗಳನ್ನು ನಿಭಾಯಿಸಲು ನೀವು ಆ ಜವಾಬ್ದಾರಿಯನ್ನು  ಅರ್ಥಮಾಡಿಕೊಂಡು, ಆರ್ಥಿಕವಾಗಿ ಸಂಪನ್ಮೂಲಗಳ ಅವಶ್ಯಕತೆಗಳನ್ನು ಕ್ರೂಢೀಕರಿಸುವ ಬಗ್ಗೆ ಸ್ಪಷ್ಟ ಯೋಜನೆ ರೂಪಿಸಿ. 

3. ಆರ್ಥಿಕ ಗುರಿ: ಗುರಿ ತಲುಪುವ ಅವಧಿಯನ್ನು ಗುರುತಿಸಿ, ಅವಧಿಗೆ ತಕ್ಕಂತೆ ಉಳಿತಾಯ ಮತ್ತು ಹೂಡಿಕೆ ಗುರಿಗಳನ್ನು ನಿಗದಿ ಮಾಡಿ ಆರ್ಥಿಕ ಗುರಿಯನ್ನು ಹಮ್ಮಿಕೊಳ್ಳಿ.  

ಸಾಮಾನ್ಯವಾಗಿ ಸಾಲ ತೆಗೆದುಕೊಳ್ಳುವ ಕಾರಣಗಳೆಂದರೆ ಮನೆ ನಿರ್ಮಾಣ, ಕಾರ್, ದ್ವಿಚಕ್ರ ವಾಹನ ಕೊಳ್ಳುವುದು, ದುಬಾರಿ ಉತ್ಪನ್ನಗಳ ಮೊಬೈಲ್, ಟಿವಿ, ಫ್ರಿಡ್ಜ್ ಇತ್ಯಾದಿ. 

 

  ಹೀಗೆ ಗುರಿಗಳ ಮೂಲಕ ನಾವು ನಮ್ಮ ಖರ್ಚು ವೆಚ್ಚದ ಅವಶ್ಯಕತೆಗಳನ್ನು ಈಡೇರಿಸಿ ಕೊಂಡು ಸಾಲವನ್ನು ತಪ್ಪಿಸಬೇಕು. 

ಸಾಲ ಪಡೆಯುವ ಮುನ್ನ ಗಮನದಲ್ಲಿ ಇರಿಸಬೇಕಾದ ಅಂಶಗಳು:

    ಸಾಲವು ಕೆಲವೊಮ್ಮೆ ಅನಿವಾರ್ಯವಾಗಿರುತ್ತದೆ ಆದರೆ ಅನಿವಾರ್ಯವೆಂದು ನಾವು ಅದರ ವ್ಯತಿರಿಕ್ತ ಪರಿಣಾಮಗಳಿಂದ ರಕ್ಷಿಸಿ ಕೊಳ್ಳಬೇಕು. ಅದಕ್ಕಾಗಿ ಈ ಕೆಳಕಂಡ ಅಂಶಗಳನ್ನು ಗಮನದಲ್ಲಿ ಇರಿಸಬೇಕು.  

1. ಅಗತ್ಯಕ್ಕೆ ಮಾತ್ರ ಸಾಲ: ಸಾಲವನ್ನು ಕೇವಲ ಅಗತ್ಯಗಳಿಗೆ ಮಾತ್ರ ತೆಗೆದುಕೊಳ್ಳಿ 

2. ಬ್ಯಾಂಕ್ ಮತ್ತು ಸಾಲದ ಬಗ್ಗೆ ಮಾಹಿತಿ: ಬ್ಯಾಕ್ ಬಡ್ಡಿ ದರ, ಬಡ್ಡಿ ದರ ನಿಯಮಗಳು, ಮರು ಪಾವತಿಯ ನಿಯಮಗಳು, ಸಾಲ ಪ್ರಕ್ರಿಯೆ ಶುಲ್ಕ, ಕಾನೂನು ಮತ್ತು ಮೌಲ್ಯಮಾಪನ ಶುಲ್ಕ, MODT ಶುಲ್ಕ, ವಿಮಾ ಶುಲ್ಕ, GST ತೆರಿಗೆ ಹೀಗೆ  ಎಲ್ಲಾ ವಿಷಯಗಳ ಬಗ್ಗೆ ಮಾಹಿತಿ ಸಂಗ್ರಹಿಸಿ. 

3.  ಸುಲಭ ಮರು ಪಾವತಿ:  ಸಾಲದ ಮರುಪಾವತಿಯ ನಿಯಮಗಳು ಸುಲಭ ಮರುಪಾವತಿಗೆ ಅವಕಾಶ ಕೊಡುವಂತೆ ಇರಲಿ 

4. ಸಾಲದ ಕಂತಿನ ಮಿತಿ: ಸಾಲದ ಕಂತು ನಿಮ್ಮ ಆದಾಯದ ಶೇಕಡಾ 30% ಅನ್ನು ಮೀರಬಾರದು. 

5. ಸಾಲದ ಅವಧಿ: ಸಾಲದ ಅವಧಿ ಆದಷ್ಟು ಕಡಿಮೆ ಇರಲಿ, ಇದರಿಂದ ಬಡ್ಡಿ ಕಡಿಮೆಯಾಗಿ ಹಣದ  ಉಳಿತಾಯವಾಗುತ್ತದೆ. 

6. ಹೆಚ್ಚುವರಿ ಮರುಪಾವತಿಗೆ ಹಣ:  ಸಾಲದ ಹೊರೆ ತಪ್ಪಿಸಲು ಭಾಗಶಃ ಮರು ಪಾವತಿಗೆ ಪ್ರತ್ಯೇಕ ಬಜೆಟ್ ಎತ್ತಿಡಿ. 

 

ವೇಗವಾಗಿ ಸಾಲ ತೀರಿಸುವ ವಿಧಾನ:  

ವಿವಿಧ ರೀತಿಯ ಸಾಲಗಳು:     

  

  

 

       

ಆರ್ಥಿಕ ಗುರಿಗಳು

ಆರ್ಥಿಕ ಗುರಿಗಳು 

     ಮನುಷ್ಯನ ಜೀವನವು ಹುಟ್ಟಿನಿಂದ ಸಾವಿನವರೆಗೂ ಅನೇಕ ಸಂದರ್ಭಗಳು ಮತ್ತು ಘಟ್ಟಗಳಿಂದ ಕೂಡಿದೆ. ಪ್ರತಿಯೊಂದು ಹಂತವೂ ತನ್ನದೇ ಆದ ಆರ್ಥಿಕ ಹೊರೆಗಳನ್ನು ತರುತ್ತದೆ. ನಾವು ಗಮನಿಸಿದರೆ, ಜೀವನದ ಕಾಲಮಾನದಲ್ಲಿ ಎದುರಾಗುವ ಪ್ರಮುಖ ಘಟನೆಗಳು — ಉನ್ನತ ಶಿಕ್ಷಣ, ನಿಶ್ಚಿತಾರ್ಥ ಮತ್ತು ವಿವಾಹ, ಹೊಸ ಕುಟುಂಬಕ್ಕೆ ಮನೆ, ಸೀಮಂತ ಮತ್ತು ಹೆರಿಗೆ, ನಾಮಕರಣ, ಮಗುವಿನ ಹುಟ್ಟುಹಬ್ಬ, ವಾಹನ ಖರೀದಿ (ಸ್ಕೂಟರ್, ಕಾರು), ಸ್ವಂತ ಮನೆ ನಿರ್ಮಾಣ, ನಿವೃತ್ತಿ ಪಿಂಚಣಿ, ಆರ್ಥಿಕ ಸಂಕಷ್ಟಗಳು, ಅನಾರೋಗ್ಯ, ಹಾಗೂ ಪೂಜೆ-ಹಬ್ಬಗಳು — ಇವೆಲ್ಲವೂ ದೊಡ್ಡ ಮಟ್ಟದ ಖರ್ಚುಗಳನ್ನು ಮುಂದಿರಿಸುತ್ತವೆ.

ಈ ಖರ್ಚುಗಳನ್ನು ನಿಭಾಯಿಸುವುದು ಕೇವಲ ಆಯ್ಕೆಯಲ್ಲ, ಅದು ನಮ್ಮ ಅನಿವಾರ್ಯ ಕರ್ತವ್ಯ ಮತ್ತು ಗುರಿ. ಆದ್ದರಿಂದ, ಇಂತಹ ದೊಡ್ಡ ಮೊತ್ತದ ವೆಚ್ಚಗಳನ್ನು ಹೇಗೆ ಯೋಜಿಸಿ, ಕಾರ್ಯತತ್ಪರವಾಗಿ ನಿಭಾಯಿಸಬೇಕು ಎಂಬುದನ್ನು ತಿಳಿದುಕೊಳ್ಳುವುದು ಅತ್ಯಂತ ಮುಖ್ಯ.

ಪೂರ್ವಸಿದ್ಧತೆ ಮತ್ತು ಪ್ರಜ್ಞೆ:

ಜೀವನದಲ್ಲಿ ಈ ಹಂತಗಳು ಹೊಸದಲ್ಲ. ನಾವು ಪ್ರತಿದಿನ ನಮ್ಮ ಸುತ್ತಮುತ್ತಲಿನ ಜಗತ್ತಿನಲ್ಲಿ ಇಂತಹ ಘಟನೆಗಳನ್ನು ನೋಡುತ್ತೇವೆ, ಕೇಳುತ್ತೇವೆ. ನಮ್ಮ ಜೀವನದಲ್ಲೂ ಅವು ಬರುವುದನ್ನು ಅರಿತಿದ್ದೇವೆ. ಆದ್ದರಿಂದ, ಇದು ಕೇವಲ ಸಾಮಾನ್ಯ ಪ್ರಜ್ಞೆ ಮಾತ್ರವಲ್ಲ, ಆರ್ಥಿಕ ಪೂರ್ವಸಿದ್ಧತೆ ಅಗತ್ಯವಿರುವ ವಿಷಯ.

• ಘಟನೆಗಳನ್ನು ಗುರುತಿಸುವುದು: ಜೀವನದಲ್ಲಿ ಎದುರಾಗುವ ಪ್ರಮುಖ ಹಂತಗಳನ್ನು ಸ್ಪಷ್ಟವಾಗಿ ಗುರುತಿಸಬೇಕು.

• ಗುರಿಗಳಾಗಿ ಪರಿಗಣಿಸುವುದು: ಇವುಗಳನ್ನು ಕೇವಲ ಸಂದರ್ಭಗಳೆಂದು ನೋಡದೆ, ಆರ್ಥಿಕ ಗುರಿಗಳಾಗಿ ಪರಿಗಣಿಸಬೇಕು.

• ಪೂರ್ವಸಿದ್ಧತಾ ಕಾರ್ಯಕ್ರಮ: ಪ್ರತಿಯೊಂದು ಹಂತಕ್ಕೂ ಮುಂಚಿತವಾಗಿ ಯೋಜನೆ ರೂಪಿಸಿ, ಸಂಪನ್ಮೂಲಗಳನ್ನು ಒಗ್ಗೂಡಿಸಿ, ಕಾರ್ಯಪ್ರವೃತ್ತರಾಗಬೇಕು.

ಆರ್ಥಿಕ ಗುರಿಗಳ ವರ್ಗೀಕರಣ ಮತ್ತು ಯೋಜನೆ: 

ಜೀವನದ ವಿವಿಧ ಹಂತಗಳಲ್ಲಿ ಎದುರಾಗುವ ಆರ್ಥಿಕ ಗುರಿಗಳನ್ನು ಸಾಧಿಸಲು ಅವುಗಳನ್ನು ಸಮಯಾವಧಿ ಆಧಾರಿತವಾಗಿ ಮೂರು ವರ್ಗಗಳಲ್ಲಿ ವಿಂಗಡಿಸಬಹುದು:

1. ಅಲ್ಪಾವಧಿಯ ಆರ್ಥಿಕ ಗುರಿಗಳು

2. ಮಧ್ಯಾವಧಿಯ ಆರ್ಥಿಕ ಗುರಿಗಳು

3. ದೀರ್ಘಾವಧಿಯ ಆರ್ಥಿಕ ಗುರಿಗಳು

ಪ್ರತಿಯೊಂದು ಗುರಿಯನ್ನು ರೂಪಿಸುವಾಗ ಈ ಕೆಳಗಿನ ಅಂಶಗಳನ್ನು ಸ್ಪಷ್ಟವಾಗಿ ಗುರುತಿಸಬೇಕು:

• ಗುರಿಯ ಹೆಸರು

• ತಿಂಗಳ ಹೂಡಿಕೆಯ ಮೊತ್ತ

• ಸಾಧಿಸಬೇಕಾದ ಒಟ್ಟು ಹಣದ ಮೊತ್ತ

• ಬಳಸುವ ಆರ್ಥಿಕ ಸಾಧನ

• ಗುರಿ ಸಾಧಿಸುವ ಕಾಲಾವಧಿ

• ಗುರಿ ಸಾಧಿಸಬೇಕಾದ ನಿಖರ ದಿನಾಂಕ

1. ಅಲ್ಪಾವಧಿಯ ಆರ್ಥಿಕ ಗುರಿಗಳು (1–3 ವರ್ಷ)

ಈ ವರ್ಗದಲ್ಲಿ ಒಂದರಿಂದ ಮೂರು ವರ್ಷಗಳೊಳಗೆ ಸಾಧಿಸಬಹುದಾದ ಗುರಿಗಳು ಬರುತ್ತವೆ.

• ಉದಾಹರಣೆಗಳು: ದುಬಾರಿ ಉತ್ಪನ್ನಗಳ ಖರೀದಿ ಅಥವಾ ದುರಸ್ತಿ, ತುರ್ತು ನಿಧಿ (Emergency Fund), ಚಿಕ್ಕ ಸಾಲದ ಮರುಪಾವತಿ, ಮಕ್ಕಳ ಶಾಲಾ ಶುಲ್ಕ, ವಿಮೆ ಪ್ರೀಮಿಯಂ ಪಾವತಿ, ಪೂಜೆಗಳು ಮತ್ತು ಕುಟುಂಬ ಸಮಾರಂಭಗಳು.

• ಹೂಡಿಕೆ ಸಾಧನಗಳು:

  • ಬ್ಯಾಂಕ್ ರಿಕರಿಂಗ್ ಡೆಪಾಸಿಟ್ ( ಆರ್ ಡಿ )

  • ಅಲ್ಪಾವಧಿಯ ಮ್ಯೂಚುಯಲ್ ಫಂಡ್ SIP

2. ಮಧ್ಯಾವಧಿಯ ಆರ್ಥಿಕ ಗುರಿಗಳು (3–10 ವರ್ಷ)

ಈ ವರ್ಗದಲ್ಲಿ ಮೂರು ವರ್ಷಗಳಿಂದ ಹತ್ತು ವರ್ಷಗಳೊಳಗೆ ಸಾಧಿಸಬಹುದಾದ ಗುರಿಗಳು ಬರುತ್ತವೆ.

• ಉದಾಹರಣೆಗಳು: ವಿವಾಹ ವೆಚ್ಚ, ಮನೆ ಅಥವಾ ನಿವೇಶನ corpus (down payment), ಕಾರು ಖರೀದಿ, ದೇಶ/ವಿದೇಶ ಪ್ರವಾಸ, ವ್ಯಾಪಾರ ಅಥವಾ ವ್ಯವಹಾರದ ಆರಂಭ.

• ಹೂಡಿಕೆ ಸಾಧನಗಳು:

  • ಮ್ಯೂಚುಯಲ್ ಫಂಡ್ SIP

  • ಬ್ಯಾಂಕ್ ರಿಕರಿಂಗ್ ಡೆಪಾಸಿಟ್ ( ಆರ್ ಡಿ )

  • ಬ್ಯಾಂಕ್ ಫಿಕ್ಸೆಡ್ ಡೆಪಾಸಿಟ್ ( ಎಫ್ ಡಿ )

3. ದೀರ್ಘಾವಧಿಯ ಆರ್ಥಿಕ ಗುರಿಗಳು (10–30 ವರ್ಷ)

ಈ ವರ್ಗದಲ್ಲಿ ಹತ್ತು ವರ್ಷಗಳಿಂದ ಮೂವತ್ತು ವರ್ಷಗಳೊಳಗೆ ಸಾಧಿಸಬಹುದಾದ ಗುರಿಗಳು ಬರುತ್ತವೆ.

• ಉದಾಹರಣೆಗಳು: ನಿವೃತ್ತಿ ನಿಧಿ, ಮಕ್ಕಳ ಉನ್ನತ ವಿದ್ಯಾಭ್ಯಾಸ , ಗೃಹ ಸಾಲದ ಮರುಪಾವತಿ.

• ಹೂಡಿಕೆ ಸಾಧನಗಳು:

  • ಇಕ್ವಿಟಿ ಮ್ಯೂಚುಯಲ್ ಫಂಡ್ 

  • ಉದ್ಯೋಗಿ ಭವಿಷ್ಯ ನಿಧಿ ( ಇಪಿಎಫ್ )

  • ಸಾರ್ವಜನಿಕ ಭವಿಷ್ಯ ನಿಧಿ ( ಪಿಪಿಎಫ್ )

  • ನ್ಯಾಷನಲ್ ಪೆನ್ಶನ್ ಸಿಸ್ಟಮ್ (ಎನ್ ಪಿ ಎಸ್)

  • ಜೀವ ವಿಮೆಯ ಆನ್ಯೂಟಿ ಪ್ಲಾನ್ಸ್

  • ಸಿಸ್ಟಮ್ಯಾಟಿಕ್ ವಿತ್ ಡ್ರಾವಲ್ ಪ್ಲಾನ್ ( ಎಸ್ ಡಬ್ಲ್ಯೂ ಪಿ )

.

ವೈಯಕ್ತಿಕ ಹಣಕಾಸು ಯೋಜನೆ

  ವೈಯಕ್ತಿಕ ಹಣಕಾಸು ಯೋಜನೆ


 

  

    ಜೀವನದಲ್ಲಿ ಅತಿ ಪ್ರಮುಖ ವಿಷಯಗಳ ಭದ್ರತೆಗಾಗಿ, ರಕ್ಷಣೆಗಾಗಿ ಹಾಗೂ ನಮ್ಮ ಅಭಿವೃದ್ಧಿಗಾಗಿ ನಾವು ಯೋಜನೆಗಳನ್ನು ಹಾಕಿಕೊಳ್ಳಬೇಕಾಗುತ್ತದೆ. ಹಣಕಾಸು ಯೋಜನೆಗಳನ್ನು ಹಾಕಿಕೊಳ್ಳದೇ ಹೋದರೆ ನಮ್ಮ ಜೀವನದಲ್ಲಿ ಆರ್ಥಿಕ ಸಂಕಷ್ಟಗಳು ಎದುರಾಗಿ ಸಾಲಗಳ ಸರಣಿ ಶುರುವಾಗುತ್ತದೆ. ಮನೆಯಲ್ಲಿಯೇ ಅವಶ್ಯಕತೆಗಳಿಗೆ ಅಸಮಾಧಾನ, ಮನಸ್ತಾಪ, ಸಂಘರ್ಷಗಳು ನಡೆದು ಹೋಗುತ್ತದೆ. ನಿಮ್ಮ ಅವಶ್ಯಕತೆಗಳು ಆಸೆಗಳು ಅದನ್ನು ಪೂರೈಸುವ ಆರ್ಥಿಕತೆಯನ್ನು ನಿಭಾಯಿಸಲು ಹಣಕಾಸು ಯೋಜನೆಗಳು ಅತ್ಯಗತ್ಯ . ಇದರ ಅಡಿಯಲ್ಲಿ ಒಂದು ವೈಯಕ್ತಿಕ ಹಣಕಾಸು ಯೋಜನೆ ಹಾಕಿಕೊಳ್ಳುವುದು ಬಹುಮುಖ್ಯವಾದ ವಿಷಯ ವಾಗುತ್ತದೆ. ಆದುದರಿಂದ ನಾವು ಕೆಳಕಂಡಂತೆ ಒಂದು ಹಣಕಾಸು ಯೋಜನೆಯನ್ನು ಹಮ್ಮಿಕೊಳ್ಳಬೇಕು ಹಾಗೂ ಹಂತ ಹಂತವಾಗಿ ಅದನ್ನು ಸಾಧಿಸಬೇಕು. ಇದರಿಂದ ಆರ್ಥಿಕ ಸಂಘರ್ಷಗಳು ಕಡಿಮೆಯಾಗಿ ಜೀವನವು ಸುಲಲಿತವಾಗಿ ಸಾಗುತ್ತದೆ.

1. ಉಳಿತಾಯ:  

       ಈಗಿನ ಕಾಲದಲ್ಲಿ ಮನೆಯಲ್ಲಿ ಹಲವು ಗೃಹಪಯೋಗಿ ವಸ್ತುಗಳು ಬಳಕೆಯಾಗುತ್ತದೆ. ಇಂತಹ ಹಲವು ಉತ್ಪನ್ನಗಳು ದುಬಾರಿಯಾಗಿದ್ದು, ಅಷ್ಟೇ ಅಲ್ಲದೆ ಅವುಗಳ ದುರಸ್ತಿ ಕೂಡ ದುಬಾರಿಯಾಗಿರುತ್ತವೆ. ಇಂತಹ ಉತ್ಪನ್ನಗಳು ನಮ್ಮನ್ನು ಸಾಲಕ್ಕೆ ದೂಡುತ್ತವೆ. ಎಷ್ಟೋ ಬಾರಿ ಖರೀದಿ ಮಾಡಲು ಹೋದಾಗ ಕಂತಿನ ಮೇಲೆ ಸಾಲವನ್ನು ಮಾಡುತ್ತೇವೆ.  ಅದನ್ನು ಒಂದರಿಂದ ಮೂರು ವರ್ಷಗಳ ತನಕ ಸಮಯ ಕಳೆದುಕೊಂಡು ತೀರಿಸುತ್ತೇವೆ. ಹೀಗೆ ನಮ್ಮ ಅನುಭವದಿಂದ ಹಾಗೂ ನಾವು ಕಂಡ ಪ್ರಪಂಚದಲ್ಲಿ ದುಬಾರಿ ವಸ್ತುಗಳಾದ ಮೊಬೈಲ್ ಫೋನ್, ಫ್ರಿಡ್ಜ್, ಟಿವಿ, ದ್ವಿಚಕ್ರ ವಾಹನಗಳು, ಲ್ಯಾಪ್ ಟಾಪ್ ಹೀಗೆ ಹಲವು ವಸ್ತುಗಳಿಗೆ ನಾವು ಸಾಲವನ್ನು ತೆಗೆದುಕೊಳ್ಳುತ್ತೇವೆ. ಈ ಸನ್ನಿವೇಶಗಳು ನಮಗೆ ತಿಳಿದಿರುವುದರಿಂದ, ಇವುಗಳನ್ನು ನಿಭಾಯಿಸುವ ಬುದ್ಧಿವಂತಿಕೆಯನ್ನು  ಪ್ರದರ್ಶಿಸಬೇಕು. ಇದನ್ನು ತಡೆಗಟ್ಟಲು ನಾವು ಕನಿಷ್ಠ ಎರಡು ಲಕ್ಷದವರೆಗೆ ಹಣವನ್ನು ಉಳಿತಾಯ ಮಾಡಿ ಸಂಗ್ರಹಿಸಬೇಕು. 

    ಸಂದರ್ಭಕ್ಕೆ ಅನುಸಾರವಾಗಿ ಹಲವು ಬಾರಿ  ಖರೀದಿಗಳು ನಡೆಯುತ್ತಿರುತ್ತದೆ, ಜೊತೆಗೆ  ಖರೀದಿಸಿದ ಹಳೆಯ ಉತ್ಪನ್ನಗಳ ದುರಸ್ತಿಯನ್ನು ಮಾಡಿಸುತ್ತಿರಬೇಕು ಹಾಗಾಗಿ ಈ ಹಣದ ಮೊತ್ತವನ್ನು ಖರ್ಚು ಆದಂತೆ ಪುನಃ ಭರ್ತಿ ಮಾಡುತ್ತಿರಬೇಕು. ಇದು ತೀರಾ ದೊಡ್ಡ ಮೊತ್ತ ಆಗಿಲ್ಲವಾದ್ದರಿಂದ ನೀವು ಬ್ಯಾಂಕ್ ನಲ್ಲಿ ರಿಕರಿಂಗ್ ಡೆಪೋಸಿಟ್ (ಆರ್ ಡಿ)  ಮಾಡುವುದರ ಮೂಲಕ ಸಂಗ್ರಹಿಸಬಹುದು. 

2. ತುರ್ತು ನಿಧಿ ( ಎಮರ್ಜೆನ್ಸಿ ಫಂಡ್ ):

        ಜೀವನ ಎಂದಿಗೂ ಅನಿಶ್ಚಿತತೆಯಿಂದ ಕೂಡಿರುತ್ತದೆ, ನಾವು ಯಾರು ಭವಿಷ್ಯವನ್ನು ನೋಡಿಲ್ಲ. ಆದರೆ ಸುತ್ತಮುತ್ತಲಿನ ಸಮಾಜದಲ್ಲಿರುವ ನಡೆದಿರುವ  ಸಮಸ್ಯೆಗಳನ್ನು ನೋಡಿದ್ದೇವೆ, ನಮ್ಮದೇ ವೈಯಕ್ತಿಕ ಜೀವನದಲ್ಲೂ ಕೂಡ ಹಲವು ಪ್ರಮುಖ ಸಮಸ್ಯೆಗಳನ್ನು ಅನುಭವಿಸಿದ್ದೇವೆ.  ಉದ್ಯೋಗ ನಷ್ಟ, ಆದಾಯದಲ್ಲಿ ಏರುಪೇರು ಆಗಿರುವುದನ್ನು ನಾವು ನೋಡಿದ್ದೇವೆ, ಅನುಭವಿಸಿದ್ದೇವೆ. ವೇತನ ಪಡೆಯುವ ಉದ್ಯೋಗಿಗಳು, ವ್ಯಾಪಾರಸ್ಥರು, ಉದ್ಯಮಿಗಳು ಎಲ್ಲರೂ ಆದಾಯದಲ್ಲಿ ನಷ್ಟವನ್ನು  ಅನುಭವಿಸಿರುವುದನ್ನು  ನೋಡಿರುತ್ತೇವೆ. ಇದೇ ರೀತಿಯಲ್ಲಿ ಆರೋಗ್ಯದಲ್ಲಿ ಏರುಪೇರಾಗುತ್ತದೆ ಹೀಗೆ   ಅನಿರೀಕ್ಷಿತ ದುರ್ಘಟನೆ ಗಳಿಂದ ತುರ್ತುಪರಿಸ್ಥಿತಿ ಬರಬಹುದು ಹೀಗಾಗಿ ಎದುರಿಸಲು ನಾವು ಒಂದು ತುರ್ತು ನಿಧಿಯನ್ನು ಕೂಡಿಡುವುದು ಅತ್ಯವಶ್ಯಕ.  

         ಖಾಸಗಿ ಸಂಸ್ಥೆಗಳಲ್ಲಿ ಪಿಂಕ್ ಸ್ಲಿಪ್ ಕೊಟ್ಟು ಉದ್ಯೋಗಿಗಳನ್ನು ಕೆಲಸದಿಂದ ವಜಾ ಮಾಡುವುದನ್ನು ಹಲವಾರು ಬಾರಿ ದಿನಪತ್ರಿಕೆಗಳಲ್ಲಿ ಓದಿ ತಿಳಿದುಕೊಂಡಿದ್ದೇವೆ. ಇಂತಹ ಕ್ಲಿಷ್ಟಕರ ಸಂದರ್ಭಗಳನ್ನು ಎದುರಿಸಲು ಉತ್ತಮವಾದ ಸಿದ್ಧತೆ ಬಹುಮುಖ್ಯ. ತುರ್ತು ನಿಧಿ ದೊಡ್ಡ ಮೊತ್ತದ್ದಾಗಿರಬೇಕು ಅಂದರೆ  ನಿಮಗೆ ಉದ್ಯೋಗ ನಷ್ಟವಾದರೆ ಮತ್ತೆ ಉದ್ಯೋಗ ಪಡೆಯಲು ಹಲವಾರು ತಿಂಗಳುಗಳು ತೆಗೆದುಕೊಳ್ಳಬಹುದು. ಆದ್ದರಿಂದ ನಿಮ್ಮ ಮನೆಯಲ್ಲಿ ಇರುವ ಆದಾಯಗಳ ಸಂಖ್ಯೆಗಳ ಅನುಸಾರವಾಗಿ ನೀವು ತುರ್ತು ನಿಧಿಯ ಮೊತ್ತವನ್ನು ನಿರ್ಧರಿಸಬೇಕಾಗುತ್ತದೆ.  ಒಮ್ಮೆ ಮನೆಯಲ್ಲಿ ಗಂಡ ಹೆಂಡತಿ ಇಬ್ಬರು ಸಂಪಾದಿಸುತ್ತಿದ್ದರೂ ಕನಿಷ್ಠ ಪಕ್ಷ 6 ತಿಂಗಳ ಖರ್ಚಿಗೆ  ಬೇಕಾಗುವಷ್ಟು ಹಣವನ್ನು ತುರ್ತು ನಿಧಿಯಲ್ಲಿ ಕೂಡಿಡಬೇಕು. ಇದರಲ್ಲಿ ಯಾವುದಾದರೂ ಸಾಲದ ಕಂತು ಗಳಿದ್ದಲ್ಲಿ, ಹಾಗೂ ಬೇರೆಲ್ಲಾ ಖರ್ಚುಗಳನ್ನು ಒಳಗೊಂಡು ನಿಮಗೆ ಒಂದು ತಿಂಗಳಲ್ಲಿ ಎಷ್ಟು ಖರ್ಚಾಗುತ್ತದೆ  ಅಷ್ಟನ್ನೂ ತಪ್ಪದೆ ಲೆಕ್ಕ ಹಾಕಿ ಒಂದು ತಿಂಗಳ ಮೊತ್ತವನ್ನು ಗುರುತಿಸಬೇಕು. ಆ ಮೊತ್ತದ ಆರು  ತಿಂಗಳಿಗಾಗುವಷ್ಟು ಒಟ್ಟು ವೆಚ್ಚವನ್ನು ಲೆಕ್ಕ ಹಾಕಿ ಕೂಡಿಡಬೇಕು. ನೀವು ಮನೆಯಲ್ಲಿ ಒಬ್ಬರೇ ದುಡಿಯುತ್ತಿದ್ದರೆ ಒಂದು ವರ್ಷದ ತನಕ ಖರ್ಚಿಗೆ ಬೇಕಾಗುವ ಮೊತ್ತವನ್ನು ಕೂಡಿಡುವುದು ಅತ್ಯಂತ ಸೂಕ್ತ.   

   ತುರ್ತು ನಿಧಿ ಖರ್ಚು ಆದಂತೆಲ್ಲ ಅದನ್ನು ಪುನಃ ಭರ್ತಿ ಮಾಡಬೇಕು. ಈ ನಿಧಿ ಯಾವಾಗಲೂ ಲಭ್ಯವಿರಬೇಕು ಏಕೆಂದರೆ ಕಷ್ಟಗಳು ಹೇಳಿ ಕೇಳಿ ಬರುವುದಿಲ್ಲ, ಆದುದರಿಂದ ನಾವು ಸದಾ ಸಿದ್ಧರಿರಬೇಕು.  ಹೀಗೆ ಕೂಡಿಟ್ಟ ಹಣವನ್ನು ಬ್ಯಾಂಕಿನಲ್ಲಿ ಎಫ್ ಡಿ ಮಾಡಿಸ ಬಹುದು, ಅಥವಾ ಲಿಕ್ವಿಡ್ ಮ್ಯೂಚುವಲ್ ಫಂಡ್ ನಲ್ಲೂ ಕೂಡಿಡಬಹುದು. 

3. ಆರೋಗ್ಯ ವಿಮೆ: 

ಮನುಷ್ಯ ಜೀವನದಲ್ಲಿ ಮಗು ಹುಟ್ಟಿದಾಗಿನಿಂದ, ಹಣ್ಣು ಹಣ್ಣು ಮುದುಕರಾಗಿ ಸಾಯುವವರಿಗೆ ಎಲ್ಲಾ ಹಂತಗಳಲ್ಲೂ ಮನುಷ್ಯನಿಗೆ ಒಂದಲ್ಲ ಒಂದು ರೀತಿಯ ಅನಾರೋಗ್ಯದ ಸಮಸ್ಯೆಗಳು ಕಾಡುತ್ತಿರುತ್ತದೆ, ಆರೋಗ್ಯ ಪ್ರಮುಖ ವಿಷಯವಾಗಿರುವುದರಿಂದ ಜನರು ಹಿಂಜರಿಯದೆ ವೈದ್ಯರ ಬಳಿ ಹೋಗಿ ಸಮಸ್ಯೆಗಳ ಪರಿಹಾರವನ್ನು ಕೇಳುತ್ತಾರೆ. ಆಸ್ಪತ್ರೆ ಖರ್ಚು ಹೆಚ್ಚು ಇರುವುದರಿಂದ ಪದೇ ಪದೇ ದೊಡ್ಡ ಮಟ್ಟದಲ್ಲಿ ಹಣವನ್ನು ಕೂಡಿಡುವುದು ಕಷ್ಟ ಸಾಧ್ಯ ಆದುದರಿಂದ ಪ್ರತಿಯೊಂದು ಮನೆಯ ಯಜಮಾನ ತನ್ನ ಕುಟುಂಬಕ್ಕೆ ಒಂದು ಉತ್ತಮವಾದ ಆರೋಗ್ಯ ವಿಮೆಯನ್ನು ಮಾಡಿಸಲೇಬೇಕು. ಆರೋಗ್ಯ ವಿಮೆಯು ದೊಡ್ಡ ಮೊತ್ತದ್ದೆ ಆಗಿರಲಿ. ಎಷ್ಟೋ ಬಾರಿ ಆಸ್ಪತ್ರೆಯ ಬಿಲ್ಲುಗಳು ನಿಮ್ಮ ಉಳಿತಾಯವನ್ನು ಖಾಲಿ ಮಾಡಿ ಸಾಲಕ್ಕೂ ದೂಡುತ್ತದೆ. ಇದಲ್ಲದೆ ಕುಟುಂಬದಲ್ಲಿ ನಾಲ್ಕು ಸದಸ್ಯರು ಇದ್ದಾರೆ ಎಂದರೆ ಪ್ರತಿಯೊಬ್ಬರಿಗೂ ಬೇರೆ ಬೇರೆ ಹಂತದಲ್ಲಿ, ಬೇರೆ ಬೇರೆ ಕಾಲಮಾನದಲ್ಲಿ ಆರೋಗ್ಯ ಸಮಸ್ಯೆಗಳು ಕಾಡಬಹುದು, ವಿಶೇಷವಾಗಿ ವಯಸ್ಸಾದಂತೆ ದೊಡ್ಡ ಮೊತ್ತದ ಖರ್ಚುಗಳು ತಗಲುವ ಶಸ್ತ್ರ ಚಿಕಿತ್ಸೆಗಳು ಎದುರಿಸಬೇಕಾಗುತ್ತದೆ. ಇದಕ್ಕೆ ಪೂರ್ವ ಸಿದ್ಧತೆಯಾಗಿ ನಾವು ಆರೋಗ್ಯ ವಿಮೆಯನ್ನು ಮಾಡಿಸುವುದು ಉತ್ತಮ ನಿರ್ಧಾರ. ಇದಕ್ಕಾಗಿ ಕನಿಷ್ಠ 10 ಲಕ್ಷದಿಂದ 15 ಲಕ್ಷದವರೆಗೆ ಕವರ್ ಆಗುವ ಆರೋಗ್ಯ ವಿಮೆಯನ್ನು ಖರೀದಿಸುವುದು ಉತ್ತಮವಾದಂತಹ ಆಯ್ಕೆ.    

      ಆರೋಗ್ಯ ವಿಮೆಯನ್ನು ನೀವು ದುಡಿಯಲು ಆರಂಭಿಸಿದಾಗ ಮಾಡಿಸಿಕೊಳ್ಳಿ ಅಂದರೆ ಯುವಕರು ಇದ್ದಾಗಲೇ ಮಾಡಿಸುವುದು ಸೂಕ್ತ. ಏಕೆಂದರೆ ವಿಮೆ ಮಾಡಿಸುವಾಗ ನೀವು ವೈದ್ಯಕೀಯ ಪರೀಕ್ಷೆಗಳಿಗೆ ಒಳಪಡಬೇಕಾಗುತ್ತದೆ, ನಿಮ್ಮಲ್ಲಿ ಕಾಯಿಲೆಗಳು ಇದ್ದಲ್ಲಿ ಅದು ತಿರಸ್ಕೃತ ಗೊಳ್ಳುವ ಸಾಧ್ಯತೆಗಳು ಇರುತ್ತದೆ ಆದುದರಿಂದ ಯುವಕರಿದ್ದಾಗಲೇ, ಉತ್ತಮ ಆರೋಗ್ಯವಿದ್ದಾಗಲೇ ಮಾಡಿಸಿಕೊಳ್ಳುವುದು ಸೂಕ್ತ.    

ಒಂದು ಉತ್ತಮ ಆರೋಗ್ಯ ವಿಮೆಯನ್ನು ಗುರಿತಿಸಲು ಈ ಕೆಳಗಿನ ಗುಣಲಕ್ಷಣಗಳನ್ನು ಪರಿಶೀಲಿಸಿ:

1. ಹೊರರೋಗಿಗಳ ವೈದ್ಯರ ಸಮಾಲೋಚನೆ ಶುಲ್ಕವನ್ನು ಇದು ಬರಿಸುತ್ತದೆಯ 

2. ನಿಮ್ಮ ಸ್ಥಳದ ಬಗ್ಗೆ ಹೆಚ್ಚಿನ ಸಂಖ್ಯೆಯ ನೆಟ್ವರ್ಕ್ ಆಸ್ಪತ್ರೆಗಳನ್ನು ಹೊಂದಿರುವ ವಿಮೆದಾರರು ಆರಿಸಿ 

3. ನಗದುರಹಿತ ( ಕ್ಯಾಶ್ ಲೆಸ್ ) ಚಿಕಿತ್ಸೆಯು ಲಭ್ಯವಿದೆಯೇ ಎಂಬುದನ್ನು ಖಾತ್ರಿಪಡಿಸಿಕೊಳ್ಳಿ 

4. ಚಿಕಿತ್ಸೆ ನಂತರ ಬರುವ ಮರು ಪಾವತಿ (ರೀ ಅಂಬರ್ಸ್ ಮೆಂಟ್ ) ನಿಯಮಗಳನ್ನು ತಿಳಿದುಕೊಳ್ಳಿ 

5. ಹಿರಿಯ ನಾಗರಿಕರ  ಚಿಕಿತ್ಸೆಯ ಮಿತಿಗಳನ್ನು, ನಿಯಮಗಳನ್ನು ತಿಳಿದುಕೊಳ್ಳಿ 

6.  ವಿಮೆ ಪಾಲಿಸಿ ಯಲ್ಲಿ ಕೋ ಪೇಮೆಂಟ್ ಶೇಕಡ ಎಷ್ಟು ಇದೆ ಎಂಬುದನ್ನು ತಿಳಿದುಕೊಳ್ಳಿ ಹಿರಿಯ ನಾಗರಿಕರಿಗೆ ಕೋ ಪೇಮೆಂಟ್ ಪ್ರಮಾಣ ಎಷ್ಟಿರುತ್ತದೆ ಎಂದು ತಿಳಿದುಕೊಳ್ಳಿ 

7. ಪಾಲಿಸಿಯಲ್ಲಿ ಅಸ್ತಿತ್ವದಲ್ಲಿರುವ ಕಾಯಿಲೆಗಳ ಕಾಯುವಿಕೆಯ ಅವಧಿಯನ್ನು ತಿಳಿದುಕೊಳ್ಳಿ 

4.    ಟರ್ಮ್ ವಿಮೆ (ಜೀವ ವಿಮೆ): 

          ಹಣದ ಒಳಹರಿವು ಬಹಳ ಮುಖ್ಯ, ಒಂದು ವೇಳೆ ಹಣ ಸಂಪಾದಿಸುವ ಮನೆಯ ಯಜಮಾನ ಅಥವಾ ಮನೆಗೆ ಆದಾಯ ತರುವ ವ್ಯಕ್ತಿ ಸಾವಿಗೀಡಾದಾಗ ಮನೆಯ ಆದಾಯ ನಿಂತು ಹೋಗುತ್ತದೆ. ಇದರಿಂದ ಅವಲಂಬಿತರ ಜೀವನ  ಒಟ್ಟಾರೆ ನಿಂತು ಹೋಗುತ್ತದೆ, ಆದುದರಿಂದ ಆದಾಯ ತರುವ ವ್ಯಕ್ತಿಗೆ ಅಥವಾ ಆದಾಯಕ್ಕೆ ಒಂದು ಬ್ಯಾಕಪ್ ಅವಶ್ಯಕತೆ ಇರುತ್ತದೆ ಅದಕ್ಕಾಗಿ ನಾವು ಜೀವ ವಿಮೆಯನ್ನು ಮಾಡಿಸುತ್ತೇವೆ. 

    ಟರ್ಮ್ ವಿಮೆ ಇರುವ ವಿಮೆ ಉತ್ಪನ್ನಗಳಲ್ಲಿ ಅತಿ ಕಡಿಮೆ ದರದ್ದು, ಹಾಗೂ ಇದೆ ಮೂಲ ಹಾಗೂ ಶುದ್ಧ ವಿಮೆ. ಜನರು ಕನಿಷ್ಠ 1 ಕೋಟಿಯಿಂದ ಹಿಡಿದು ನಿಮ್ಮ ಶಕ್ತಿಗೆ  ಅನುಸಾರವಾಗಿ ಹಲವು ಕೋಟಿಗಳಲ್ಲಿ ಟರ್ಮ್ ವಿಮೆ ಮಾಡಿಸಬೇಕು. ಈ ವಿಮೆ ಒಂದು ಪವರ್ ಜನರೇಟರ್ ಗೆ ಸಮ. ಅಂದರೆ ಇದು ಜೀವನ ಪರ್ಯಂತ ಬೇಕಾದಷ್ಟು ಹಣವನ್ನು ಒದಗಿಸುವುದಿಲ್ಲ ಆದರೆ ನೀವು ಮಾಡಿಸಿದ ವಿಮೆಯ ಮೊತ್ತ ಎಷ್ಟು ದಿನದ ವರೆಗೂ ಬರುತ್ತದೆಯೋ ಅಲ್ಲಿಯ ತನಕ ಇದರ ಮೇಲೆ ಅವಲಂಬಿಸಬಹುದು, ನಂತರ ನಿಮ್ಮ ಸ್ವಂತ ದುಡಿಮೆಯಿಂದಲೇ ನೀವು ಜೀವನವನ್ನು ನಡೆಸಬೇಕಾಗುತ್ತದೆ. ಅಂದರೆ ವಿಮೆಯ ಹಣ ಖರ್ಚಾಗುವ ಮುನ್ನ ನೀವು ದುಡಿಮೆಯ ದಾರಿಯನ್ನು ಕಂಡುಕೊಳ್ಳಬೇಕು ಅದರಿಂದಲೇ ನಿಮ್ಮ ಆದಾಯವನ್ನು ಭವಿಷ್ಯದಲ್ಲಿ ಸಂಪಾದಿಸಬಹುದು. ಆದುದರಿಂದ ಇದನ್ನು ತಾತ್ಕಾಲಿಕ ಬ್ಯಾಕಪ್ ಹಣವೆಂಬ ದೃಷ್ಟಿಯಲ್ಲಿ ನೋಡಬೇಕು. ಜನರೇಟರ್ ಎಂದಿಗೂ ಶಾಶ್ವತವಾಗಿ ವಿದ್ಯುತ್ತನ್ನು ಒದಗಿಸುವುದಿಲ್ಲ ಹಾಗೆಯೇ ವಿಮೆ ಕೂಡ ಶಾಶ್ವತವಾಗಿ ಆದಾಯಕ್ಕೆ ಪರ್ಯಾಯ ಆಗಲಾರದು. 

   ವಿಮೆಗೆ ಅವಲಂಬಿತರು ಇರುವುದು ಅತಿ ಮುಖ್ಯ. ಆದುದರಿಂದ ಒಂಟಿ ವ್ಯಕ್ತಿಗಳಿಗೆ ಇದು ಸೂಕ್ತವಲ್ಲ ಆದುದರಿಂದ ನಿಮಗೆ ಅವಲಂಬಿತರು ಇದ್ದರೆ ಮಾತ್ರ ವಿಮೆ ಮಾಡಿಸಿ. 

      ಟರ್ಮ್ ವಿಮೆಯನ್ನು ಯುವಕರು ಇದ್ದಾಗಲೇ ಮಾಡಿಸುವುದು ಸೂಕ್ತ. ಏಕೆಂದರೆ ವಿಮೆ ಮಾಡಿಸುವಾಗ ನೀವು ವೈದ್ಯಕೀಯ ಪರೀಕ್ಷೆಗಳಿಗೆ ಒಳಪಡಬೇಕಾಗುತ್ತದೆ, ನಿಮ್ಮಲ್ಲಿ ಕಾಯಿಲೆಗಳು ಇದ್ದಲ್ಲಿ ಅದು ತಿರಸ್ಕೃತ ಗೊಳ್ಳುವ ಸಾಧ್ಯತೆಗಳು ಇರುತ್ತದೆ ಆದುದರಿಂದ ಯುವಕರಿದ್ದಾಗಲೇ, ಉತ್ತಮ ಆರೋಗ್ಯವಿದ್ದಾಗಲೇ ಮಾಡಿಸಿಕೊಳ್ಳುವುದು ಸೂಕ್ತ.   

 
  ವರ್ಷದಲ್ಲಿ ಪದೇ ಪದೇ ವಿಮಾ ಪ್ರೀಮಿಯಂ ಕಟ್ಟುವ ಬದಲು ವರ್ಷಕ್ಕೆ ಒಂದೇ ಸಲ ಕಟ್ಟುವ ಹಾಗೆ ಮಾಡಿಕೊಂಡರೆ ಕೆಲಸ ಸುಲಭ.    

ಒಂದು ಉತ್ತಮ ಟರ್ಮ್  ವಿಮೆಯನ್ನು ಆಯ್ಕೆ ಮಾಡುವಾಗ ಕೆಳಕಂಡ ವಿಷಯಗಳ ಆಧಾರದ ಮೇಲೆ ಆಯ್ಕೆ ಮಾಡಿಕೊಳ್ಳಿ 

1. ಭವಿಷ್ಯದ ಹಣದುಬ್ಬರ ಹಾಗೂ ಜವಾಬ್ದಾರಿಗಳನ್ನು ಗಮನದಲ್ಲಿ ಇರಿಸಿ ಕನಿಷ್ಠ ವೆಂದರು ನಿಮ್ಮ ಆದಾಯದ 10 ರಿಂದ 15 ಪಟ್ಟು ಹಣವನ್ನು ಒಟ್ಟು ವಿಮಾ ಮೊತ್ತವಾಗಿ ಆಯ್ಕೆ ಮಾಡಿ. ಇದು ಕೆಲ ಕೋಟಿಗಳಲ್ಲಿ ಇದ್ದರೆ ಒಳ್ಳೆಯದು.

2. ಪಾಲಿಸಿ ಅವಧಿ ನಿಮ್ಮ ಜವಾಬ್ದಾರಿಗಳು ಮುಗಿಯುವ ತನಕ ಇರಬೇಕು 

3. ಕ್ಲೈಮ್ ಸೆಟಲ್ಮೆಂಟ್ ಅನುಪಾತ (Claim Settlement Ratio - CSR) ಉತ್ತಮ ಆಗಿರುವಂತಹ ಸಂಸ್ಥೆ ಇಂದನೆ ವಿಮೆಯನ್ನು ತೆಗೆದುಕೊಳ್ಳಿ. 

4. ಉತ್ತಮವಾದ ರೈಡರ್ ಗಳ ಆಯ್ಕೆಗಳನ್ನು ಮಾಡಿಕೊಳ್ಳಿ 


ನಿವೃತ್ತಿ ನಿಧಿ :

           ನಿವೃತ್ತಿ ನಿಧಿ ಅತಿ ಹೆಚ್ಚಿನ ಹಣವನ್ನು ಬೇಡುವ ಯೋಜನೆ ಅಥವಾ ನಿಧಿ. ಇದು ಅತಿ ಪ್ರಮುಖವಾದಂತಹ ಹಣಕಾಸು ಯೋಜನೆ ಏಕೆಂದರೆ, ಇದು ದೊಡ್ಡ ಮೊತ್ತದ ಹಣವನ್ನು ಕೇಳುತ್ತದೆ ಹಾಗೂ ಇದನ್ನು ಸಾಧಿಸಿದರೆ ನಿಮಗೆ ಆರ್ಥಿಕ ಸ್ವಾತಂತ್ರ್ಯ ದೊರೆಯುತ್ತದೆ. ಈ ಸ್ವಾತಂತ್ರ್ಯ ಎಲ್ಲರಿಗೂ ಅತಿ ಪ್ರಿಯವಾದದ್ದು ಹಾಗೂ ನಿರ್ಣಾಯಕ ವಾದದ್ದು ಆದುದರಿಂದ ಈ ನಿಧಿಗೆ ಮಹತ್ವ ಹೆಚ್ಚು.
     

        

ಕನಿಷ್ಠ ತಾವಾದ (Minimalism)

ಕನಿಷ್ಠ ತಾವಾದ   (Minimalism)

        ಚಿತ್ರ ಕೃಪೆ: ಅಂತರ್ಜಾಲ 


ಹಣದ ಕೊರತೆ ಹಾಗೂ ಅದರ ಚಿಂತೆ ಇವುಗಳನ್ನೆಲ್ಲಾ ಕಡಿಮೆ ಮಾಡಲು ಸರಿಯಾದ ಜೀವನ ಶೈಲಿ ಆಯ್ಕೆ ಪ್ರಮುಖ ಪಾತ್ರ ವಹಿಸುತ್ತದೆ. ಇವುಗಳಿಗೆ ಮಿನಿಮಲಿಸಂ ( ಕನಿಷ್ಠ ತಾವಾದ ) ಜೀವನಶೈಲಿ ಅತಿದೊಡ್ಡ ಕೊಡುಗೆ ನೀಡುತ್ತದೆ, ಅದೇನೆಂದು  ತಿಳಿಯೋಣ. 

ಕನಿಷ್ಠ ತಾವಾದ ಅಥವಾ ಮಿನಿಮಲಿಸಂ ಎಂದರೆ ಏನು 
              ಜೀವನದಲ್ಲಿ ನಮಗೆ ಅವಶ್ಯಕತೆ ಇರುವ ವಸ್ತು, ಸೇವೆಗಳನ್ನು ಗುರುತಿಸಿ ಅವುಗಳನ್ನು ಮಾತ್ರ ಇಟ್ಟುಕೊಳ್ಳುವುದು, ಬಳಕೆ ಮಾಡುವುದು ಇದನ್ನು ಹೊರತುಪಡಿಸಿ ಉಳಿದಿದ್ದೆಲ್ಲ ಅನಾವಶ್ಯಕ ಎಂದು ಮನಗಂಡು ಅವುಗಳನ್ನು ನಮ್ಮ ಜೀವನದಿಂದ ಹೊರಗೆ ಇಡುವುದೇ ಕನಿಷ್ಠ ತಾವಾದ ಅಥವಾ ಮಿನಿಮಲಿಸಂ 

ನಾವು ಹಿಂದಿನ ಲೇಖನಗಳಲ್ಲಿ ಓದಿದಂತೆ ನಾವು ಬಳಸುವ ಸೇವೆಗಳ ಮತ್ತು ಉತ್ಪನ್ನಗಳ  ದೊಡ್ಡ ಪಟ್ಟಿಯೇ ಇದೆ. ಇವುಗಳಲ್ಲಿ ನಿಜವಾಗಲೂ ಯಾವುದು ಅವಶ್ಯಕತೆ ಇದೆಯೋ, ನಿಜವಾಗಲೂ ಯಾವುವನ್ನು ಬಳಸುತ್ತೇವೆಯೋ ಅಂತಹ ಉತ್ಪನ್ನಗಳನ್ನು, ವಸ್ತುಗಳನ್ನು ಮಾತ್ರ ನಾವು ಇಟ್ಟುಕೊಳ್ಳಬೇಕು, ಉಳಿದವೆಲ್ಲವು ನಮ್ಮ ಮನೆಯಲ್ಲಿ ಕಸವಾಗಿ ಉಳಿದುಬಿಡುತ್ತವೆ, ಹೌದು ಕಸವಾಗಿ ಹೆಚ್ಚಿನ ಸ್ಥಳಾವಕಾಶವನ್ನು ಕೇಳುತ್ತಾ, ಧೂಳು ಹಿಡಿದು ಕುಳಿತುಕೊಳ್ಳುತ್ತವೆ, ಅವುಗಳ ದುರಸ್ತಿ, ಸ್ವಚ್ಛತೆ, ನಿರ್ವಹಣೆ ನಮಗೆ ಅನಗತ್ಯ ವೆಚ್ಚದ ಹೊರೆಯನ್ನು ತಂದುಕೊಡುತ್ತವೆ. ಇದರಿಂದ ಹಣದ ದುಂದು ವೆಚ್ಚ, ಅದುವೇ ಬೇಡದ ಕಸವಾಗಿ ಕೂರುವ ವಸ್ತುಗಳಿಗಾಗಿ. ಇವುಗಳಿಂದ ಶ್ರಮ ಹೆಚ್ಚಾಗುತ್ತದೆ, ಸಮಯ ಹಾಳಾಗುತ್ತದೆ, ಹಣದ  ವ್ಯರ್ಥ.  ಹೀಗಾಗಿ ಈ ಎಲ್ಲಾ ಸಮಸ್ಯೆಗಳಿಂದ ಮುಕ್ತಿ ಹೊಂದಲು ನಾವು ಪ್ರಜ್ಞಾಪೂರ್ವಕವಾಗಿ ಮಿನಿಮಲಿಸಂ (ಕನಿಷ್ಠ ತಾವಾದ ) ಅನ್ನು ಅನುಸರಿಸಬೇಕು. ಇದರಿಂದ ಪ್ರಜ್ಞಾಪೂರ್ವಕವಾಗಿ ಮನೆಗೆ ಬರುವ ಪ್ರತೀ ವಸ್ತುವಿನ ಅವಶ್ಯಕತೆಗಳನ್ನು ಅರ್ಥಮಾಡಿಕೊಂಡು ನಾವುಗಳು ತರುವುದು ಬಿಡುವುದು ನಿರ್ಧರಿಸಬಹುದು.

       ಮಿನಿಮಲಿಸಂ ಕೇವಲ ಭೌತಿಕ ವಸ್ತುಗಳಿಗೆ ಅನ್ವಯಿಸುವುದಿಲ್ಲ ಜೊತೆಗೆ ಡಿಜಿಟಲ್ ಜಗತ್ತಿನಲ್ಲೂ ಈ ಕನಿಷ್ಠತಾವಾದವನ್ನು  ನಾವು ಅಳವಡಿಸಿಕೊಳ್ಳಲೇಬೇಕು. ನಾವು ಹಲವಾರು ವಾಟ್ಸಾಪ್ ಗುಂಪುಗಳಲ್ಲಿ ಸದಸ್ಯರಾಗಿ ಜನರು ಕಳಿಸುವ ನಮ್ಮ ಜೀವನದಲ್ಲಿ ವ್ಯತ್ಯಾಸ ಮಾಡದ, ಪ್ರಭಾವ ಬೀರದ, ಅನಗತ್ಯ ಚಿತ್ರಗಳು, ಉಕ್ತಿಗಳು, ವಿಡಿಯೋಗಳು ಬರುತ್ತಲೇ ಇರುತ್ತವೆ. ಇವುಗಳು ನಮ್ಮ ಡಿಸ್ಕ್ ನಲ್ಲಿ  ಅನಗತ್ಯವಾದ ಸಂಖ್ಯೆಯಲ್ಲಿ  ಕುಳಿತು  ಬಿಡುತ್ತದೆ. ಇವುಗಳ ಮಧ್ಯದಲ್ಲಿ ನಾವು ಉಪಯೋಗಿಸುವ ಪ್ರಮುಖವಾದ ಕಡತಗಳು ಯಾವುದೋ ಮೂಲೆಯಲ್ಲಿ ಕುಳಿತಿರುತ್ತದೆ. ಅವುಗಳನ್ನು ಹುಡುಕುವುದು ದುಸ್ತರವಾಗುತ್ತದೆ, ಬೇಕೆಂದಾಗ ತಕ್ಷಣ ಸಿಗುವುದಿಲ್ಲ. ಇದರಿಂದ ಅನಗತ್ಯ ಆತಂಕ, ಹಾಗಾಗಿ ಡಿಜಿಟಲ್ ಲೋಕದಲ್ಲಿ ನಾವು ಅನಗತ್ಯ ಕಡತಗಳನ್ನು, ಚಿತ್ರಗಳನ್ನು, ವಿಡಿಯೋಗಳನ್ನು ಅಳಿಸಿ ಹಾಕಿ  ಕೇವಲ ಉಪಯೋಗಿಸುವ ಕಡತಗಳನ್ನು ಮಾತ್ರ ಉಳಿಸಿಕೊಂಡು ಬೇಕಾಗಿದ್ದನ್ನು ಹುಡುಕುವ ಅನಗತ್ಯ ಶ್ರಮದಿಂದ ತಪ್ಪಿಸಿ ಕೊಳ್ಳಬಹುದು. ಸಮಯ ವ್ಯರ್ಥ ದಿಂದ ಹಾಗೂ ಡಿಸ್ಕ್ ನಲ್ಲಿ ಸ್ಥಳಾವಕಾಶದ ಕೊರತೆಯಿಂದ  ಕಾಪಾಡಿಕೊಳ್ಳಬಹುದು.  

ಸಂಗ್ರಹಣೆ:

    ಸಂಗ್ರಹಣೆ ಹೇಗೆ ಶುರುವಾಗುತ್ತದೆ ಎಂಬುದನ್ನು ಅರಿಯೋಣ. ಮೊದಲು ನಾವು ಒಂಟಿಯಾಗಿ ಇರುತ್ತೇವೆ ನಂತರ ವಿವಾಹವಾಗಿ ಸಂಗಾತಿಯ ಒಬ್ಬಳು/ನು ಬರುತ್ತಾಳೆ/ನೆ . ನಾವು ಮನೆ ಮಾಡಬೇಕಾಗುತ್ತದೆ, ಮನೆಗೆ ಒಂದೊಂದಾಗಿ ವಸ್ತುಗಳು ಸಂಗ್ರಹವಾಗುತ್ತದೆ, ಮಕ್ಕಳಾಗುತ್ತಾರೆ, ನಂತರ ಓಡಾಡಲಿಕ್ಕೆ ಸ್ಕೂಟರ್ ಗಳು, ಕಾರ್, ಮಕ್ಕಳಿಗಾಗಿ ಸೈಕಲ್ ಗಳು ಕೊಂಡುಕೊಳ್ಳುತ್ತೇವೆ, ಒಂದು ಕುಟುಂಬವಾಗಿ ನಾವು ಬದಲಾದಾಗ, ನಮಗೆ ವಾಸಿಸಲು ಮನೆ ಬೇಕಾಗುತ್ತದೆ. ಹೀಗೆ ಸಂಗ್ರಹಣೆ ಶುರುವಾಗಿ ಮುಂದುವರೆಯುತ್ತಾ ಹೋಗುತ್ತದೆ. ಹಾಗೆ ನೋಡಿದರೆ ಮನೆಯಲ್ಲಿ ಸಾವಿರಾರು ವಸ್ತುಗಳು ಇರುತ್ತವೆ ಅವುಗಳನ್ನು ಹಿಂದಿನ ವಿಷಯಗಳಲ್ಲಿ ತಿಳಿಸಿದ್ದೇನೆ.  
    ಬಹುಮುಖ್ಯವಾಗಿ ಕುಟುಂಬದಲ್ಲಿ ಸದಸ್ಯರ ಸಂಖ್ಯೆ ಹೆಚ್ಚುತ್ತಾ ಹೋದಂತೆ ಬೇಡಿಕೆಗಳ ಸಂಖ್ಯೆ ಹೆಚ್ಚುತ್ತದೆ. ಎಲ್ಲರಿಗೂ ತಮ್ಮದೇ ಆದ ಅವಶ್ಯಕತೆಗಳು, ಆಸೆಗಳು ಇರುತ್ತವೆ. ಅವುಗಳನ್ನು ಪೂರೈಸುತ್ತ ಹೋದಂತೆ ಸೇವೆಗಳ ಹಾಗೂ ಉತ್ಪನ್ನಗಳ ಸಂಗ್ರಹಣೆ ಹೆಚ್ಚಾಗುತ್ತಿರುತ್ತದೆ. ನಾವು ಪ್ರಜ್ಞಾಪೂರ್ವಕವಾಗಿ, ಶಿಸ್ತುಬದ್ಧವಾಗಿ ಅವುಗಳ ಅಗತ್ಯತೆಯನ್ನು ಅರ್ಥೈಸಿಕೊಂಡು, ಅವುಗಳು ಹೊರೆಯಾಗದಂತೆ, ಮಿನಿಮಲಿಸಂ ಅನ್ನು ಪಾಲಿಸುತ್ತಾ ಬುದ್ಧಿವಂತಿಕೆಯಿಂದ ಬದುಕಬೇಕು. 

ಅಗತ್ಯ ಮತ್ತು ಆಸೆ:

     ಸಾಮಾನ್ಯವಾಗಿ ಒಂದು ಉತ್ಪನ್ನವನ್ನು ತಯಾರಿಸುವಾಗ, ಅವುಗಳ ಹಲವು ರೂಪಾಂತರಗಳನ್ನು ಉತ್ಪಾದಿಸುತ್ತಾರೆ. ಉದಾಹರಣೆಗೆ ನೀವು ಕಾರು ಖರೀದಿಸಲು ಹೋದರೆ ಬೇಸಿಕ್ ಮಾಡೆಲ್ ನಂತರ ಐಷಾರಾಮಿಯ ಹಲವು ರೂಪಾಂತರ ಮಾಡೆಲ್ ಗಳು ನಮಗೆ ನೋಡಲು ದೊರೆಯುತ್ತದೆ. ಆದರೆ ಕಾರು ಒಂದೇ ಆಗಿರುತ್ತದೆ ಅಂದರೆ ಬೇಸಿಕ್ ಮಾಡೆಲ್ ನ ಕಾರು ನಿಮ್ಮ ಅವಶ್ಯಕತೆಗಳನ್ನು ಪೂರೈಸಿದರೆ, ಮೇಲ್ದರ್ಜೆಯ ಮಾಡೆಲ್ ಕಾರ್ ಗಳು ನಿಮ್ಮ ಆಸೆ ಹಾಗೂ ಅವಶ್ಯಕತೆ ಎರಡನ್ನು ಪೂರೈಸುತ್ತದೆ ಅಂದರೆ ನೋಡಲು ಆಕರ್ಷಕವಾಗಿರುತ್ತದೆ, ಐಷಾರಾಮಿ ವೈಶಿಷ್ಟ್ಯಗಳನ್ನು ಹೊಂದಿರುತ್ತದೆ. ಹೀಗಾಗಿ ಅವಶ್ಯಕತೆಯ ವಸ್ತುವೇ ಬೇರೆ, ಆಸೆ ಪಟ್ಟ ವಸ್ತುವೇ ಬೇರೆ ಇರುವುದಿಲ್ಲ, ಒಂದೇ ಉತ್ಪನ್ನದಲ್ಲಿ ನಾವು ಅವಶ್ಯಕತೆ ತಕ್ಕಂತೆ ಬೇಸಿಕ್ ಮಾಡೆಲ್ ನ ತಯಾರಿಸಬಹುದು ಅಥವಾ ಐಷಾರಾಮಿ ಉತ್ಪನ್ನವಾಗಿ ಉತ್ಪಾದಿಸಬಹುದು.  
     ಈ ಮೇಲಿನ ಸ್ಪಷ್ಟತೆಯಿಂದ ನಾವು ತಿಳಿದುಕೊಂಡ ವಿಷಯವೇನೆಂದರೆ ಮನೆಯಲ್ಲಿರುವ ವಸ್ತುಗಳ ಸಂಖ್ಯೆಯನ್ನು ಹೆಚ್ಚಿಸದೆ ನಾವು ಬಯಸಿದಂತಹ ವಸ್ತುಗಳನ್ನು ಮಾತ್ರ ಕೊಂಡು ಕನಿಷ್ಠತಾವಾದವನ್ನು ಅಳವಡಿಸಿಕೊಳ್ಳಬಹುದು. 

     ಮಿನಿಮಲಿಸಂನಿಂದ ಈ ಕೆಳಗಿನ ಲಾಭಗಳನ್ನು ನಾವು ಪಡೆಯಬಹುದು:

1. ಅನಗತ್ಯ ವಸ್ತುಗಳು ಕಡಿಮೆಯಾಗಿ ಮನೆಯಲ್ಲಿನ ಸ್ವಚ್ಛತೆ ಹೆಚ್ಚಾಗುತ್ತದೆ  

2. ಗೊಂದಲಗಳು ಕಡಿಮೆಯಾಗಿ ಮನಸು ಶಾಂತವಾಗಿರುತ್ತದೆ 

3. ವಸ್ತುಗಳ ಹುಡುಕಾಟದ ಸಮಸ್ಯೆ ಇರುವುದಿಲ್ಲ 

4. ಮನೆಯ ಉತ್ಪನ್ನಗಳನ್ನು ಮೇಲ್ದರ್ಜೆಗೇರಿಸುವ, ನಿರ್ವಹಣೆ ಮಾಡುವ, ದುರಸ್ತಿ ಮಾಡಿಸುವ ಖರ್ಚು     ವೆಚ್ಚಗಳು ಗಣನೀಯವಾಗಿ ಕಡಿಮೆಯಾಗಿ ಹಣದ ಉಳಿತಾಯವಾಗುತ್ತದೆ. 

5. ನಿಮ್ಮನ್ನು ನೀವು ಅರ್ಥಮಾಡಿಕೊಳ್ಳಲು ನೆರವಾಗುತ್ತದೆ 

6. ಬೇಡ ಅಥವಾ ಸಾಕು ಎಂದು ಹೇಳಲು ಕಲಿಯುತ್ತೀರಿ 

7. ಜೀವನದಲ್ಲಿ ಅರ್ಥಪೂರ್ಣತೆ  ಹಾಗೂ ತೃಪ್ತಿಗೆ ಮಹತ್ವದ ಕೊಡುಗೆ ನೀಡುತ್ತದೆ 

8. ಜೀವನ ಸರಳ ಹಾಗೂ ಸುಲಭ ಎಂಬ ವಾಸ್ತವ ಅರ್ಥವಾಗುತ್ತದೆ 

9. ಮನೆ ಬದಲಾಯಿಸಿದಾಗ ಮನೆ ವಸ್ತುಗಳ ಸಾಗಾಣೆ ಸುಲಭವಾಗುತ್ತದೆ 

10. ಪ್ರಕೃತಿಗೆ ಕಸ ಹಾಕದೆ ಪರಿಸರ ಸ್ನೇಹಿಯಾಗಿರುತ್ತದೆ.

11. ಡಿಜಿಟಲ್ ಮಿನಿಮಲಿಸಂ ನಿಮಗೆ ಗಮನ-ಭಂಗ ಕಡಿಮೆ ಮಾಡುತ್ತದೆ. 

12. ಉಳಿತಾಯ ಹೆಚ್ಚಾಗಿ  ವಸ್ತುಗಳ ಖರೀದಿಗೆ ಸಾಲದ ಅಗತ್ಯ ಇರುವುದಿಲ್ಲ

13. ಸಾಮಾನ್ಯ ಪ್ರಜ್ಞೆ ಹಾಗೂ ಬುದ್ಧಿವಂತಿಕೆಯ ಪ್ರಯೋಗ ಹೆಚ್ಚಾಗುತ್ತದೆ 

ವೆಚ್ಚಗಳ ಸ್ಪಷ್ಟತೆ ಹಾಗೂ ನಿರ್ವಹಣಾ ಯೋಜನೆಗಳು

ವೆಚ್ಚಗಳ ಸ್ಪಷ್ಟತೆ ಹಾಗೂ ನಿರ್ವಹಣಾ ಯೋಜನೆಗಳು  

 ನೀವು ನಿಮ್ಮ ಖರ್ಚು ವೆಚ್ಚಗಳ ಅನುಸರಣೆ ಮಾಡಿದ್ದಲ್ಲಿ, ನಿಮಗೆ ನಿಮ್ಮ ಮಾಲೀಕತ್ವದಲ್ಲಿ ಇರುವ ವ್ಯಕ್ತಿಗಳು, ಉತ್ಪನ್ನಗಳ  ಬಗ್ಗೆ ಸ್ಪಷ್ಟವಾದ ತಿಳುವಳಿಕೆ ಮೂಡುತ್ತದೆ ಹಾಗೆಯೇ  ನೀವು ಪಡೆಯುವ ಸೇವೆಗಳ ಬಗ್ಗೆ ನಿಮ್ಮ ತಿಳುವಳಿಕೆ ಸ್ಪಷ್ಟವಾಗುತ್ತಾ ಹೋಗುತ್ತದೆ. ಈಗ ನಿಮ್ಮ ಬಳಿಯಲ್ಲಿ ಲಭ್ಯವಿರುವ ದತ್ತಾಂಶಗಳನ್ನು ರಚನಾತ್ಮಕವಾಗಿ  ರಚಿಸಿ  ವಿಶ್ಲೇಷಣೆ ಮಾಡಿದರೆ ಮನೆಯ ಸದಸ್ಯರ ಹಾಗೂ ಮನೆಯಲ್ಲಿರುವ ಪ್ರತಿ ಉತ್ಪನ್ನಗಳ ಸ್ವಭಾವಗಳು, ಅವುಗಳ ಆರೋಗ್ಯ, ಆಯಸ್ಸು, ಅದರ ನಿರ್ವಹಣೆಯ ಅವಶ್ಯಕತೆಗಳು ಅರ್ಥವಾಗುತ್ತದೆ. 

ನಾವು ಮಾಡುವ ವಿಶ್ಲೇಷಣೆಯಲ್ಲಿ ಈ ಕೆಳಕಂಡ ವಿಷಯಗಳು ನಮಗೆ ಸ್ಪಷ್ಟವಾಗಿ ತೋರುತ್ತವೆ. ಅವುಗಳೆಂದರೆ

1. ಪ್ರತಿ ತಿಂಗಳು ಸೇವೆಗಳ ಬಿಲ್ ಜೊತೆಗೆ ಹೊಸ ಉತ್ಪನ್ನಗಳ ಖರೀದಿ ಇದ್ದೆ ಇರುತ್ತದೆ, ಜೊತೆಗೆ ಇರುವ ಉತ್ಪನ್ನಗಳ ದುರಸ್ತಿ ಹಾಗೂ ನಿರ್ವಹಣಾ ವೆಚ್ಚ ಇದ್ದೆ ಇರುತ್ತದೆ. 

2. ಪ್ರತಿ ತಿಂಗಳು ಬರುವ ಸೇವಾ ಬಿಲ್ ಗಳು  ಖರ್ಚಿನ ನಿಶ್ಚಿತ ರೂಪ ಕೊಡಬಹುದು ಆದರೆ ವಸ್ತುಗಳ ಅಥವಾ ಉತ್ಪನ್ನಗಳ ಖರೀದಿ ಹಾಗೂ ದುರಸ್ತಿ ಎಂದಿಗೂ ಅನಿಶ್ಚಿತ ವಾಗಿರುತ್ತದೆ.

3. ಯಾವುದೇ ದುಬಾರಿ ಉತ್ಪನ್ನಗಳು ಉದಾಹರಣೆಗೆ ಮನೆ, ವಾಹನಗಳು  ಹಾಗೂ ಇತರೆ ದುಬಾರಿ  ಗೃಹಪಯೋಗಿ ವಸ್ತುಗಳು ಸಾಲಕ್ಕೆ ಎಡೆಮಾಡಿಕೊಟ್ಟಿವೆ.

4. ಭವಿಷ್ಯದ ಅಭಿವೃದ್ಧಿ ಯೋಜನೆಗಳಿಗೆ ಹಾಗೂ ಖರ್ಚುಗಳಿಗೆ ಉಳಿತಾಯದ ಅವಕಾಶಗಳಿವೆಯೇ ಹಾಗೂ ವೃದ್ಧಿಗಾಗಿ ಹೂಡಿಕೆ ಸಾಧ್ಯವೇ 

5. ಮನೆಯಲ್ಲಿ ಆಗುವ ಖರ್ಚುಗಳನ್ನು ಅತಿ ಹೆಚ್ಚು ಮಾಡುವವರು ಯಾರು, ಅದರಲ್ಲಿ ದುಂದು ವೆಚ್ಚ ಏನಾದರೂ ಇದೆಯೇ.  

6. ಮನೆಯ ಸದಸ್ಯರಲ್ಲಿ ಯಾರಿಗೆ ಯಾವ ತರಹದ ಆರೋಗ್ಯ ಸಮಸ್ಯೆಗಳಿವೆ ಹಾಗೂ ಅವುಗಳ ಚಿಕಿತ್ಸೆ, ನಿರ್ವಹಣೆ. 

7. ಮನೆಯಲ್ಲಿನ ಹಣದ ಬೇಡಿಕೆ ಮತ್ತು ಪೂರೈಕೆ

8. ಸೇವಾ ವಲಯಗಳಿಗಿಂತ ಉತ್ಪನ್ನಗಳು ಹೆಚ್ಚಿನ ಹತೋಟಿ,  ಸ್ವಾತಂತ್ರ್ಯ,  ಹಾಗೂ ಸೇವೆಗಳನ್ನು ನೀಡುತ್ತವೆ. 

9. ಉತ್ಪನ್ನಗಳ ನಿರ್ವಹಣೆ ಅವುಗಳ ದುರಸ್ತಿಗಿಂತ ಅಗ್ಗವಾಗಿರುತ್ತದೆ 

10. ಉತ್ಪನ್ನಗಳ ದುರಸ್ತಿಯು ಅವುಗಳ ಖರೀದಿಗಿಂತ ಅಗ್ಗವಾಗಿರುತ್ತದೆ 


ಸುಧಾರಣಾ ಕ್ರಮಗಳು 

ನಾವು ವಿಶ್ಲೇಷಿಸಿ ಗಮನಿಸಿದ ಸಮಸ್ಯೆಗಳನ್ನು ಅಥವಾ ಪರಿಹರಿಸಬಹುದಾದ ಅವಕಾಶಗಳನ್ನು ತಿಳಿದುಕೊಂಡಾಗ ಅವುಗಳ ಸುಧಾರಣೆಗೆ ಕ್ರಮಗಳನ್ನು ಕಂಡುಕೊಳ್ಳಬಹುದು. ಅವುಗಳು ಹೇಗೆ ಮಾಡಬಹುದೆಂದು ಕೆಳಗಿನ ಉದಾಹರಣೆಗೆ ಕೊಟ್ಟ ಪರಿಹಾರಗಳನ್ನು ತಿಳಿಯೋಣ.

ಮೊದಲನೆಯದಾಗಿ ಉತ್ಪನ್ನಗಳ ಬಳಕೆಯಿಂದ ಸಿಗುವ ಅನುಕೂಲ, ಲಾಭಗಳನ್ನು ಬಳಸಿಕೊಳ್ಳಬಹುದು. ಸೇವಾ ವಲಯವು ಒದಗಿಸುವ ಸೇವೆಗಳಿಗಿಂತ, ನಾವು ಹೇಗೆ ಅದೇ ಸೇವೆಗಳನ್ನು ಒದಗಿಸುವ ಉತ್ಪನ್ನಗಳನ್ನು ಖರೀದಿಸಿ, ಬಳಕೆ ಮಾಡಿಕೊಳ್ಳಬಹುದು ಎಂಬುದನ್ನು ಅರಿತು. ಆ ಉತ್ಪನ್ನಗಳನ್ನು ತಂದು ಪ್ರತಿಷ್ಠಾಪಿಸಿ, ಅದರ ಸೇವೆಯನ್ನು ಬಳಕೆ ಮಾಡುವುದರಿಂದ ಸೇವೆದಾರರ ಮೇಲೆ ಅವಲಂಬನೆ ತಪ್ಪಿಸಬಹುದು ಹಾಗೂ ಖರ್ಚುಗಳನ್ನು ಗಣನೀಯವಾಗಿ ತಗ್ಗಿಸಬಹುದು.  

ಉದಾಹರಣೆಗೆ ಸೌರಶಕ್ತಿಯಿಂದ ವಿದ್ಯುಚ್ಛಕ್ತಿ ನಾವೇ ಉತ್ಪಾದಿಸಿ ಅದನ್ನು ಬಳಕೆ ಮಾಡಬಹುದು, ಹಾಗೂ ವಿದ್ಯುತ್ ಸಂಸ್ಥೆಗೆ ಮಾರಾಟವು ಮಾಡಬಹುದು.

ವಿದ್ಯುತ್ ಚಾಲಿತ ವಾಹನಗಳಿಂದ, ವಾಹನಕ್ಕೆ ಬೇಕಾಗುವ ಶಕ್ತಿಯನ್ನು ನಾವೇ  ಮನೆಯಲ್ಲೇ ಪೂರೈಕೆ ಮಾಡಬಹುದು  ಹಾಗೂ  ಇಂಧನಗಳ ಖರೀದಿಯನ್ನು  ತಪ್ಪಿಸಬಹುದು.
 
ಮನೆಯಲ್ಲಿ ದಿನನಿತ್ಯದ ಸ್ವಚ್ಛತಾ ಕಾರ್ಯಗಳನ್ನು ವಾಷಿಂಗ್ ಮಷೀನ್, ಡಿಶ್ ವಾಶರ್ ಹಾಗೂ ರೋಬೋ ಯಂತ್ರಗಳ ಸಹಾಯದಿಂದ ನಿಭಾಯಿಸಬಹುದು ಇದರಿಂದ ಸಹಾಯಕರನ್ನು  ನೇಮಿಸಿ, ಸಂಬಳ ಕೊಡುವ ಖರ್ಚನ್ನು ತಪ್ಪಿಸಬಹುದು ಇತ್ಯಾದಿ. 

 ಚಿಕಿತ್ಸೆಗಿಂತ ತಡೆಗಟ್ಟುವಿಕೆ ಉತ್ತಮ: (Prevention is better than cure)

ನಮ್ಮ ಮನೆಯ ಸದಸ್ಯರು ಹಾಗೂ ನಮ್ಮ ಬಳಿ ಇರುವ ಮನೆ ಕಟ್ಟಡ, ಮನೆಯ ಗೃಹಪಯೋಗಿ ವಸ್ತುಗಳು, ವಾಹನಗಳು ಇವೆಲ್ಲವಕ್ಕೂ ಕಾಲ ಕಾಲಕ್ಕೆ ಸಮಸ್ಯೆಗಳು ಕಾಡುತ್ತಿರುತ್ತವೆ ಹಾಗಾಗಿ ನಮ್ಮ ಜನರ ಹಾಗೂ ವಸ್ತುಗಳ, ಉತ್ಪನ್ನಗಳ ಆರೋಗ್ಯದ ಸ್ಥಿರತೆ ಹಾಗೂ ಸುಸ್ಥಿತಿಯನ್ನು ಕಾಪಾಡಿಕೊಳ್ಳಲು ನಿರ್ವಹಣೆ ಅತ್ಯಗತ್ಯ. ಏಕೆಂದರೆ ನಿರ್ವಹಣೆ ದುರಸ್ತಿಗಿಂತ ಅಗ್ಗವಾಗಿರುತ್ತದೆ ಹಾಗೂ ದುರಸ್ತಿಯು  ಖರೀದಿಗಿಂತ ಅಗ್ಗವಾಗಿರುತ್ತದೆ. ಹಾಗೆಯೇ ನಿರ್ವಹಣೆಯಿಂದ ಎಲ್ಲದರ ಆಯಸ್ಸು, ಬಾಳಿಕೆ ಹೆಚ್ಚಾಗುತ್ತದೆ. ಅದೇ ರೀತಿಯಲ್ಲಿ ಖರ್ಚು, ಶ್ರಮ, ಆತಂಕ ಗಣನೀಯವಾಗಿ ತಗ್ಗುತ್ತದೆ. ಆದುದರಿಂದ ಈ ಪ್ರಕ್ರಿಯೆ, ವ್ಯವಸ್ಥೆ ಅತಿ ಪ್ರಮುಖ ಪಾತ್ರ ವಹಿಸುತ್ತದೆ.

        ನಮ್ಮಲ್ಲಿರುವ ಯಾವುದೇ ಉತ್ಪನ್ನಗಳ ಆಗಲಿ ಅವು ವಿದ್ಯುತ್ ಅಥವಾ ವಿದ್ಯುನ್ಮಾನ ಸಾಧನಗಳು,  ಸ್ವಯಂ ಚಾಲಿತ ಯಂತ್ರಗಳು, ಉಪಕರಣಗಳು, ಪರಿಕರಗಳು  ಹೀಗೆ ಮನೆಯ ಸಾಧನಗಳು ಕೆಟ್ಟು ದುರಸ್ತಿಗೆ ಬರುವ ಸಾಧ್ಯತೆಗಳು ಸದಾ ಇರುತ್ತದೆ. ಆದುದರಿಂದ ಕೆಡುವುದನ್ನು ತಡೆಗಟ್ಟಬೇಕಾದರೆ ನಾವು ಅವುಗಳ ನಿರ್ವಹಣೆ ಮಾಡುವುದು ಅತಿ ಮುಖ್ಯವಾಗಿರುತ್ತದೆ. ಏಕೆಂದರೆ ಕಾಲ ಕಾಲಕ್ಕೆ ನಿರ್ವಹಣೆ ಮಾಡುವುದರಿಂದ  ಉತ್ಪನ್ನಗಳು ಕೆಡುವುದನ್ನು ತಡೆಗಟ್ಟಬಹುದು, ಇದರಿಂದ ದುರಸ್ತಿಯ ಅನಗತ್ಯ ಶ್ರಮ, ಖರ್ಚು ಹಾಗೂ ಸಮಯದ ಉಳಿತಾಯವಾಗುತ್ತದೆ. ಉತ್ಪನ್ನಗಳು ದೀರ್ಘಕಾಲ ಬಾಳಿಕೆ ಬರುತ್ತವೆ. ಇದರಿಂದ ದೊಡ್ಡ ಪ್ರಮಾಣದಲ್ಲಿ ಹಣ ಖರ್ಚಾಗುವದನ್ನು ತಡೆಯಬಹುದು ಹಾಗೂ ಉಳಿತಾಯ ಹೆಚ್ಚು ಮಾಡಬಹುದು . 

ಉದಾಹರಣೆಗೆ ಜಲ ಶುದ್ಧೀಕರಣ ಯಂತ್ರವನ್ನು ಕಾಲಕಾಲಕ್ಕೆ ಸ್ವಚ್ಛಗೊಳಿಸಿ ಅದರ ಕ್ಯಾಂಡಲ್ ಗಳನ್ನು ಬದಲಾಯಿಸಿ ನಿರ್ವಹಣೆ ಮಾಡಬೇಕು. 

ಇದೇ ರೀತಿಯಲ್ಲಿ ಗಡಸು ನೀರನ್ನು ಮೆದು ನೀರಾಗಿ ಪರಿವರ್ತಿಸುವ ಯಂತ್ರಕ್ಕೆ ಸರಿಯಾದ ಉಪ್ಪನ್ನು ಹಾಕಿ ಕಾಲ ಕಾಲಕ್ಕೆ ತಂತ್ರಜ್ಞರಿಗೆ ತೋರಿಸಿ ಅದನ್ನು ಕಾಪಾಡಿಕೊಳ್ಳಬೇಕು. 

ನಿಮ್ಮ ವಾಹನಗಳನ್ನು ಕಾಲ ಕಾಲಕ್ಕೆ ಸರ್ವಿಸ್ ಮಾಡಿಸಿ, ಆಯಿಲ್ ಬದಲಾಯಿಸಿ, ಸ್ವಚ್ಛಗೊಳಿಸಿ ಕಾಪಾಡಿಕೊಳ್ಳಬೇಕು    

   ಮನೆಯ ಸದಸ್ಯರ ಅಥವಾ ನಿಮ್ಮ ಆರೋಗ್ಯ ಸಮಸ್ಯೆಗಳು ಚಿಕ್ಕದಿದ್ದಾಗ, ಪ್ರಾಥಮಿಕ ಹಂತದಲ್ಲಿ ಇದ್ದಾಗಲೇ ಅದನ್ನು ಗುರುತಿಸಿ ಅದಕ್ಕೆ ಸೂಕ್ತ ಚಿಕಿತ್ಸೆ ಕೊಡುವುದರಿಂದ ಅದು ಮುಂದೆ ಉಲ್ಬಣಗೊಳ್ಳುವ ದರಿಂದ ತಡೆಯಬಹುದು.  ಜನರು ತಮ್ಮ ಆರೋಗ್ಯವನ್ನು ಮುಂಜಾಗ್ರತೆಯಿಂದ ನೋಡಿಕೊಳ್ಳಬೇಕು ಅಂದರೆ ಪೌಷ್ಟಿಕ ಆಹಾರದ ಸೇವನೆ, ಸರಿಯಾದ ಶಿಸ್ತುಬದ್ಧ ವ್ಯಾಯಾಮ, ಕಾಲಕಾಲಕ್ಕೆ ಆರೋಗ್ಯ ತಪಾಸಣೆ ಹೀಗೆ ಮಾಡುವುದರಿಂದ ನಿಮ್ಮ ಆರೋಗ್ಯದ ಬಗ್ಗೆ ಅರಿವು ಹೆಚ್ಚಾಗಿರುತ್ತದೆ. ಇದು ಆರೋಗ್ಯವನ್ನು ಸುಸ್ಥಿತಿಯಲ್ಲಿ ಕಾಪಾಡಬಹುದು. 

ಹಲ್ಲುಗಳನ್ನು ಸ್ವಚ್ಛವಾಗಿಡಬೇಕು, ಊಟವಾದ ತಕ್ಷಣ ಬಾಯನ್ನು ಮುಕ್ಕಳಿಸಿ ಸ್ವಚ್ಛವಾಗಿಡುವ ಮೂಲಕ ಹಲ್ಲು ಜುಮ್ ಜುಮ್ ಅನ್ನುವುದನ್ನು ತಪ್ಪಿಸಬಹುದು.

ದಿನದಲ್ಲಿ ಯಥೇಚ್ಛವಾಗಿ ನೀರನ್ನು ಕುಡಿಯಬೇಕು ಇದರಿಂದ ಕಿಡ್ನಿಯ ಕಲ್ಲುಗಳನ್ನು  ತಡೆಗಟ್ಟಬಹುದು 

 

ಹಣದ ಜಾಡು ಹಿಡಿಯುವುದು

 ಹಣದ ಜಾಡು ಹಿಡಿಯುವುದು

ಚಿತ್ರ ಕೃಪೆ:  ಅಂತರ್ಜಾಲ

 ನಾವು ಸಂಪಾದಿಸಿದ ಹಣ  ಎಲ್ಲಿ ಹೋಗುತ್ತದೆ,  ಯಾವುದಕ್ಕಾಗಿ ಬಳಸಲಾಗುತ್ತದೆ, ಎಲ್ಲಾದರೂ ಹಣದ ಸೋರಿಕೆ ಆಗುತ್ತಿದೆಯಾ  ಹಾಗೂ  ಇದರ ಮೂಲಕ ನಮ್ಮ ಸ್ವಭಾವವನ್ನು  ಅರಿತುಕೊಳ್ಳಲು  ಹಣದ ಜಾಡನ್ನು ಹಿಡಿಯಬೇಕಾಗುತ್ತದೆ.  ಇದಕ್ಕಾಗಿ  ನಾವು ಮಾಡುವ  ಖರ್ಚು ವೆಚ್ಚಗಳನ್ನು  ಬರೆಯಬೇಕು.   ಅದು  ನಿರ್ದಿಷ್ಟವಾಗಿರಲಿ  ಅಂದರೆ  ಈ  ದಿನಾಂಕದಂದು,  ಇಂತಿಷ್ಟು ಮೊತ್ತದ ಹಣವನ್ನು ಈ ಉದ್ದೇಶಕ್ಕಾಗಿ  ಖರ್ಚು ಮಾಡಲಾಗಿದೆ ಎಂದು ನಿರ್ದಿಷ್ಟವಾಗಿ ನಮೂದಿಸಬೇಕು.  ಇದನ್ನು  ಒಂದು ಪುಸ್ತಕದಲ್ಲಿ ಬರೆಯುವುದರ ಮೂಲಕ  ಅಥವಾ   ನಿಮ್ಮ ಮೊಬೈಲ್ ನಲ್ಲಿ   ಖರ್ಚುಗಳಿಗೆ ಸಂಬಂಧಪಟ್ಟ  ಮೊಬೈಲ್ ಅಪ್ಲಿಕೇಶನ್ ನಲ್ಲಿ  ಸೇರಿಸುವುದರ ಮೂಲಕವಾದರೂ ಮಾಡಬಹುದು.  ನಿಮ್ಮ ಖರ್ಚು ವೆಚ್ಚಗಳನ್ನು ಅರ್ಥ ಮಾಡಿಕೊಳ್ಳಬೇಕಾದರೆ   ಕನಿಷ್ಠಪಕ್ಷ  ಮೂರು ತಿಂಗಳಾದರೂ ಬರೆಯಬೇಕು. ಆದರೆ  ವರ್ಷಪೂರ್ತಿ ಪ್ರತಿನಿತ್ಯ ಬರೆಯುವ ಅಗತ್ಯವಿರುವುದಿಲ್ಲ.  ಖರ್ಚು ವೆಚ್ಚಗಳನ್ನು ಬರೆದಾಗ ಅವುಗಳ ವರ್ಗೀಕರಣ ಮಾಡಬೇಕು. ಈ ವರ್ಗೀಕರಣದಿಂದ ನಾವು ಯಾವ ಉದ್ದೇಶಕ್ಕಾಗಿ ಖರ್ಚುಗಳನ್ನು ಮಾಡುತ್ತೇವೆ ಎಂದು ತಿಳಿದು ಬರುತ್ತದೆ.

 ಇಂದಿನ ದಿನಗಳಲ್ಲಿ  ಖರ್ಚಿನ ಲೆಕ್ಕ ಬರೆಯುವುದು ತಂತ್ರಜ್ಞಾನದ ಸಹಾಯದಿಂದ ಇನ್ನೂ ಸುಲಭವಾಗಿದೆ.    ನೀವು  ಡಿಜಿಟಲ್ ಪಾವತಿ ಮೂಲಕ  ಆಗುವ ವೆಚ್ಚಗಳು  ನೆಟ್ ಬ್ಯಾಂಕಿಂಗ್  ನಲ್ಲಿ   ಸುಲಭವಾಗಿ  ನೋಡಿ  ಲೆಕ್ಕವನ್ನು ಬರೆಯುವುದು.   ಮೊಬೈಲ್ ಅಪ್ಲಿಕೇಶನ್ ನಲ್ಲಿ   ಖರ್ಚು ಆದ ತಕ್ಷಣ   ಖರ್ಚನ್ನು ದಾಖಲಿಸಬಹುದು.   ಇದಲ್ಲದೆ   ಖರ್ಚಿನ  ಸಮಗ್ರ ವರದಿಯನ್ನು  ಅದೇ ಅಪ್ಲಿಕೇಶನ್  ಸಿದ್ಧ ಮಾಡಿಕೊಡುತ್ತದೆ.  ಇದರಿಂದ   ನಿಮಗೆ   ಏತಕ್ಕಾಗಿ,   ಎಷ್ಟು,   ಎಲ್ಲಿ,   ಯಾವತ್ತು   ಖರ್ಚುಗಳನ್ನು ಮಾಡಿದ್ದೇವೆ   ಎಂಬ ವರದಿ  ನಿಮ್ಮ ಮುಂದೆ ಬರುತ್ತದೆ.    ಈ ವರದಿಯಿಂದ   ನೀವು   ವಿಷಯಗಳನ್ನು ಅರ್ಥೈಸಿಕೊಂಡು  ಮುಂದೆ  ಯಾವ ಕ್ರಮವನ್ನು ಕೈಗೊಳ್ಳಬೇಕೆಂದು  ನಿರ್ಧರಿಸಬಹುದು.

 ವರ್ಗಿಕರಣವನ್ನು ಕ್ಲಿಷ್ಟಗೊಳಿಸದೆ ಸರಳವಾಗಿ ಕೇವಲ ಕೆಳಕಂಡಂತೆ  ಪ್ರಮುಖ ಎರಡು ವರ್ಗಗಳಾಗಿ ವಿಂಗಡಿಸಬಹುದು.

1. ಉಪಭೋಗ್ಯಗಳು / ಮಾಸಿಕ ಖರ್ಚು

2.  ಉತ್ಪನ್ನಗಳ ಖರೀದಿ / ದುರಸ್ತಿ / ಸ್ವಚ್ಛತೆ.

 ನೀವು ಮಾಡುವ ಖರ್ಚುಗಳನ್ನು ಈ ಕೆಳಕಂಡಂತೆ ವರ್ಗಗಳಲ್ಲಿ ಸೇರಿಸುತ್ತಾ ಹೋದರೆ ಖರ್ಚುಗಳ   ಜಾಡು ಹಿಡಿಯಬಹುದು.  ಇದು ಕೇವಲ ಉದಾರಣೆಯಾಗಿದ್ದು ನೀವು ನಿಮ್ಮದೇ ಪಟ್ಟಿಗಳನ್ನು ಅಥವಾ ವರ್ಗಗಳನ್ನು ಸೃಷ್ಟಿ ಮಾಡಿಕೊಂಡು ನಿಮ್ಮ ಖರ್ಚುಗಳನ್ನು  ದಾಖಲಿಸುತ್ತ ಹೋಗಬಹುದು.

1. ಉಪಭೋಗ್ಯಗಳು / ಮಾಸಿಕ ಖರ್ಚು

 ಈ ವರ್ಗೀಕರಣದಲ್ಲಿ ಉಪಭೋಗ್ಯಗಳು (Consumables) ಅಂದರೆ ನೀವು ಬಳಸಿ ಮುಗಿಸುವ ಸೇವೆಗಳು ಅಂದರೆ ಇವುಗಳು ಒಮ್ಮೆ ಖರೀದಿಸಿ ಪುನಃ ಪುನಃ ಉಪಯೋಗಿಸಬಲ್ಲ ಉತ್ಪನ್ನಗಳಾಗಿರುವುದಿಲ್ಲ,  ಆದರೆ ಒಮ್ಮೆ ಬಳಸಿದರೆ ಮುಗಿದು ಹೋಗುವ ಸೇವೆಗಳು. ಉದಾಹರಣೆಗೆ ದಿನಸಿ ಸಾಮಗ್ರಿಗಳು, ಹಾಲು, ತರಕಾರಿ, ಮನೆ ಬಾಡಿಗೆ, ಔಷಧಿಗಳು, ವಿದ್ಯುತ್ ಬಿಲ್, ಅಂತರ್ಜಾಲದ ಬಿಲ್ ಹಾಗು ಇತರೆ ಈ ತೆರನಾದ ಸೇವೆಗಳು.  ಇವುಗಳನ್ನು ಈ ಕೆಳಗಿನಂತೆ ಪಟ್ಟಿ ಮಾಡಲಾಗಿದೆ.      

  2.  ಉತ್ಪನ್ನಗಳ ಖರೀದಿ / ದುರಸ್ತಿ / ಸ್ವಚ್ಛತೆ.   

ಈ ಎರಡನೆಯ ವರ್ಗೀಕರಣದಲ್ಲಿ ಉತ್ಪನ್ನಗಳ ಖರೀದಿ, ಅವುಗಳ ದುರಸ್ತಿ(Repair) ಹಾಗೂ ಅವುಗಳ ಸ್ವಚ್ಛತೆ, ಇವುಗಳ ಖರ್ಚನ್ನು ಬರೆಯುತ್ತಾ ಹೋಗಬೇಕು. ಅಂದರೆ ಉತ್ಪನ್ನಗಳನ್ನು ನಾವು ಒಮ್ಮೆ ಹಣ ಪಾವತಿ ಮಾಡಿ ಖರೀದಿ ಮಾಡಿರುತ್ತೇವೆ ಅವುಗಳು ನಮ್ಮ ಮಾಲೀಕತ್ವದಲ್ಲಿ ಇರುತ್ತವೆ, ಇವುಗಳು ಯಂತ್ರಗಳು ಆಗಿರಬಹುದು ಉಪಕರಣ, ಸಲಕರಣೆಗಳು ಆಗಿರಬಹುದು. ಇವುಗಳನ್ನು ಅದರ ಆಯುಷ್ಯ ಇರುವ ತನಕ ನಾವು ಪುನರ್ ಬಳಕೆ ಮಾಡಬಹುದು. ಆದುದರಿಂದ ನಾವು ಅದನ್ನು ಕಾಪಾಡಿಕೊಳ್ಳಲು ದುರಸ್ತಿಯ ಖರ್ಚು ಮಾಡಬೇಕಾಗುತ್ತದೆ ಹಾಗೂ ಸ್ವಚ್ಛತೆಗೆ ಆದ್ಯತೆ ನೀಡಬೇಕಾಗುತ್ತದೆ  ಇವುಗಳಿಂದ  ಅದರದ್ದೆ ಆದ ಖರ್ಚುಗಳು ಸೃಷ್ಟಿ ಆಗಿರುತ್ತವೆ. ಉದಾಹರಣೆಗೆ ಆ ಉತ್ಪನ್ನಗಳನ್ನು ಈ ಕೆಳಗಿನಂತೆ ಪಟ್ಟಿ ಮಾಡಲಾಗಿದೆ.      

      ಎಲ್ಲಾ ಸೇವೆಗಳಿಗೆ ಹಾಗೂ ಉತ್ಪನ್ನಗಳಿಗೆ ತನ್ನದೇ ಆದಂತ ಜೀವಮಾನವಿರುತ್ತದೆ ಅಂದರೆ ಬಾಳಿಕೆಯ ಅವಧಿ. ಉದಾಹರಣೆಗೆ ಒಂದು ಮನೆಯು ನೂರು ವರ್ಷ ಬಾಳುತ್ತದೆ, ಒಂದು ದ್ವಿಚಕ್ರ ಹಾಗೂ ಚತುರ್ಚಕ್ರ ವಾಹನ  ಹದಿನೈದರಿಂದ ಇಪ್ಪತ್ತು ವರ್ಷ ಬಾಳುತ್ತದೆ, ಒಂದು ಮೊಬೈಲ್ ಫೋನ್ ಐದರಿಂದ ಏಳು ವರ್ಷ ಬಾಳುತ್ತದೆ, ಹೀಗೆ ತನ್ನ ಆಯಸ್ಸು ಮುಗಿದ ಉತ್ಪನ್ನಗಳ ಪುನರ್ ಖರೀದಿ ಮಾಡಬೇಕಾಗುತ್ತದೆ, ಅದು ಬಾಳುವ ತನಕ ಅದರ ದುರಸ್ತಿ ಖರ್ಚು, ಸ್ವಚ್ಛತೆಯ ಖರ್ಚು ಮಾಡಬೇಕಾಗುತ್ತದೆ. ನಾವು ಗಮನಿಸಿದರೆ ಎಷ್ಟೋ ಸೇವೆಗಳು ಅಲ್ಪ ಕಲಿಕಾ ಉದಾಹರಣೆಗೆ ಆಹಾರ ಪದಾರ್ಥಗಳು, ಗ್ರಂಥಿಗೆ ಸಾಮಾನುಗಳು, ಹೂಗಳು, ಅನಿಲದ ಸಿಲಿಂಡರ್ ಗಳು, ಆಟೋದಲ್ಲಿ ಪ್ರಯಾಣ,   ವಿದ್ಯುತ್ ಬಿಲ್, ನೀರಿನ ಬಿಲ್  ಇತ್ಯಾದಿ.  ಹೀಗೆ ನಾವು ಬಳಸುವ ಸೇವೆಗಳ ಹಾಗೂ ಉತ್ಪನ್ನಗಳ ಆಯಸ್ಸನ್ನು, ಬಾಳಿಕೆ ಅವಧಿಯನ್ನು ಅರ್ಥಮಾಡಿಕೊಳ್ಳಬೇಕು. ಇದು ಮುಂದಿನ ದಿನಗಳಲ್ಲಿ  ನಿರ್ಧಾರಗಳನ್ನು ಕೈಗೊಳ್ಳಲು  ಸಹಾಯಕಾರಿಯಾಗುತ್ತದೆ.  ಉದಾಹರಣೆಗೆ ನೀವು ನಿಮ್ಮ 30ನೇ ವಯಸ್ಸಿನಲ್ಲಿ ಮೊದಲ ಕಾರು ಕೊಂಡಿದ್ದರೆ, ನಿಮಗೆ ನಿಮ್ಮ ಜೀವಮಾನದಲ್ಲಿ ಮೂರು ಅಥವಾ ನಾಲ್ಕು ಕಾರುಗಳನ್ನು ಕೊಳ್ಳಬೇಕಾಗುತ್ತದೆ. ಇದೇ ರೀತಿಯಲ್ಲಿ ಎಂಟರಿಂದ ಹತ್ತು ಮೊಬೈಲ್ ಫೋನ್ ಗಳನ್ನು ಖರೀದಿ ಮಾಡಬೇಕಾಗುತ್ತದೆ. ಒಂದು ಮನೆಯ ನೂರು ವರ್ಷ ಬಾಳುವುದರಿಂದ ನಮ್ಮ ಜೀವನದಲ್ಲಿ ಒಂದು ಮನೆ  ಕಟ್ಟಿದರೆ  ಸಾಕಾಗುತ್ತದೆ. ಹೀಗೆ ನೀವು ಕೊಳ್ಳುವ ಉತ್ಪನ್ನಗಳ ಆಯಸ್ಸಿನ ಮೇಲೆ ಭವಿಷ್ಯದಲ್ಲಿ ಇದೇ ಉತ್ಪನ್ನಗಳನ್ನು ಎಷ್ಟು ಬಾರಿ ಕೊಳ್ಳಬೇಕಾಗುತ್ತದೆ ಎಂಬ ಅಂದಾಜು ನಮಗೆ ಸಿಗುತ್ತಿದೆ. 

ಅನುಸರಣೆಯ  ಉದ್ದೇಶ (Tracking)

 ಇಷ್ಟು ಶ್ರಮವಹಿಸಿ ಖರ್ಚುಗಳನ್ನೆಲ್ಲಾ ಬರೆದು ಪಟ್ಟಿ ಮಾಡಿ, ಅವುಗಳನ್ನು ವರ್ಗೀಕರಿಸಿ, ದತ್ತಾಂಶವನ್ನು ರಚನಾತ್ಮಕ ಸ್ವರೂಪದಲ್ಲಿ ರಚಿಸಿ, ಸಂಗ್ರಹಿಸಲು  ಉದ್ದೇಶಗಳು ಇರಬೇಕಲ್ಲವೇ.  ಹಾಗಿದ್ದಲ್ಲಿ ಆ ಉದ್ದೇಶಗಳು ಏನೆಂದು ತಿಳಿಯೋಣ.  

1.  ಖರ್ಚು ವೆಚ್ಚಗಳ ವಿಶ್ಲೇಷಣೆ  ಮಾಡಲು.

2.  ಬೇಡಿಕೆ ಹಾಗೂ ಪೂರೈಕೆಯನ್ನು ಅರ್ಥ ಮಾಡಿಕೊಳ್ಳಲು.

3.  ಎಲ್ಲಾದರೂ ಅನಗತ್ಯ ದುಂದು ವೆಚ್ಚವಿದೆಯೇ ಎಂದು ಗುರುತಿಸಲು.

4.  ನಮ್ಮ ಹಾಗೂ ಕುಟುಂಬದವರ  ಹಣಕಾಸಿನ ಸ್ವಭಾವವನ್ನು  ಅರಿಯಲು.

5.  ಆರ್ಥಿಕ ಸುಧಾರಣೆ ಮಾಡುವ ಅವಕಾಶಗಳನ್ನು ಗುರುತಿಸಲು. 

6.  ಆರ್ಥಿಕ ಸಂಕಷ್ಟದ ಪೂರ್ವಸಿದ್ಧತೆಗಾಗಿ.

7.  ನಿವೃತ್ತಿ ಜೀವನದ  ಪೂರ್ವಸಿದ್ಧತೆಯ ಭಾಗವಾಗಿ.

8.  ಭವಿಷ್ಯದ ಗುರಿಗಳನ್ನು ಹಮ್ಮಿಕೊಳ್ಳಲು.

            ಹೀಗೆ ಖರ್ಚುಗಳ ಅನುಸರಣೆಯಿಂದ ನಮಗೆ ನಮ್ಮ ಹಣ ಖರ್ಚಾಗುವ ಕಾರಣಗಳು   ಮಾತ್ರವಲ್ಲದೆ ಭವಿಷ್ಯದ ಜೀವನದ ಸಿದ್ಧತೆಗೆ ಹಾಗೂ ವಿವಿಧ ಸಂದರ್ಭಗಳನ್ನುಎದುರಿಸಲು ಸಹಾಯವಾಗುತ್ತದೆ. ಇದಲ್ಲದೆ ನಾವು ಮಾಡುವ ಖರ್ಚುಗಳು ಎಷ್ಟು ಅವಶ್ಯಕತೆಗೆ ಮಾಡುವ ಖರ್ಚುಗಳಾಗಿವೆ, ಎಷ್ಟು ಹಣವನ್ನು ನಮ್ಮ ಆಸೆಯ ಈಡೇರಿಕೆಗಾಗಿ ಮಾಡುವ ಖರ್ಚುಗಳಾಗಿವೆ ಎಂದು ತಿಳಿದು ಬರುತ್ತದೆ. ಹೀಗೆ ಅನುಸರಣೆ ಮಾಡಿದ್ದ ದತ್ತಾಂಶದಿಂದ  ಹಲವಾರು ವಿಷಯಗಳು ತಿಳಿದು ಬರುತ್ತದೆ ಹಾಗೂ ಭವಿಷ್ಯದ  ಜೀವನವನ್ನು ನಿರ್ವಹಿಸಲು ಸಹಕಾರಿಯಾಗುತ್ತದೆ.

          ವಿಶ್ಲೇಷಣೆಯಿಂದ ಎಲ್ಲಿಯಾದರೂ ಸುಧಾರಣೆಗೆ ಅವಕಾಶಗಳಿವೆಯಾ ಎಂದು ಗುರುತಿಸಬೇಕು. ಇದ್ದಲ್ಲಿ ಅವುಗಳನ್ನು ಒಂದು ಅಥವಾ ಎರಡು ಚಟುವಟಿಕೆಯಾಗಿ ಅಥವಾ  ಒಂದು ಯೋಜನೆಯಾಗಿ ಕೈಗೆತ್ತಿಕೊಳ್ಳಬೇಕು.   ಉದಾಹರಣೆಗೆ ಸೌರ ಫಲಕಗಳ ಸಹಾಯದಿಂದ ವಿದ್ಯುತ್ ಉತ್ಪಾದಿಸಬಹುದೇ ಅದರ ಮೂಲಕ ಮನೆಯ ವಿದ್ಯುತ್ ಬಿಲ್ಲನ್ನು ಕಡಿತಗೊಳಿಸಬಹುದು ಎಂಬುದೊಂದು ಯೋಜನೆಯನ್ನು ಹಾಕಿಕೊಳ್ಳಬಹುದು. ಉತ್ಪಾದಿಸಿದ ವಿದ್ಯುತ್ತನ್ನು  ವಿದ್ಯುತ್ ಪ್ರಸರಣ ಸಂಸ್ಥೆಗೆ ಮಾರಬಹುದು. 

       ವಿದ್ಯುತ್ ಚಾಲಿತ ದ್ವಿಚಕ್ರ ವಾಹನಗಳು, ಚತುರ್ಚಕ್ರ ವಾಹನಗಳನ್ನು ಕೊಂಡು ಅದರ ಮೂಲಕ ವಾಹನಗಳ ಇಂಧನದ ಖರ್ಚನ್ನು ಉಳಿಸಬಹುದು, ಅದು ಅಲ್ಲದೆ ವಿದ್ಯುತ್ತನ್ನು ನಾವೇ ಉತ್ಪಾದಿಸುವುದರಿಂದ ವಾಹನಗಳ ಚಾರ್ಜ್ ಮಾಡುವ ಚಿಕ್ಕ ಖರ್ಚನ್ನು ಉಳಿಸಿ ಸಂಪೂರ್ಣವಾಗಿ ಉಚಿತವಾಗಿ  ಮಾಡಿಕೊಳ್ಳಬಹುದಾಗಿದೆ.  

           ಹಾಗೆಯೇ ದಿನಪತ್ರಿಕೆಗಳು ಬೇಕೆ? ಏಕೆಂದರೆ ದೂರದರ್ಶನದಲ್ಲಿ, ಅಂತರ್ಜಾಲಗಳಲ್ಲಿ ಸಾಕಷ್ಟು ಸುದ್ದಿಗಳು ಲಭ್ಯವಿರುವುದರಿಂದ ಅಲ್ಲಿಯೇ ಸುದ್ದಿಯನ್ನು ತಿಳಿದು ದಿನಪತ್ರಿಕೆಯ  ಬಿಲ್ಲನ್ನು  ಉಳಿಸಬಹುದು. 

    ಜೀವ ವಿಮೆಯ ಪಾಲಿಸಿ ಇದ್ದಲ್ಲಿ ಅದರ ಅವಶ್ಯಕತೆ ಇದೆಯೇ ಅದರ ಬದಲಿ ಉತ್ತಮವಾದ ಟರ್ಮ್ ವಿಮೆಯನ್ನು ಕೊಳ್ಳಬಹುದಲ್ಲವೇ.

ನಿಮ್ಮ ಮಾಸಿಕ ಔಷಧಿಗಳ ಬಿಲ್ ಹೆಚ್ಚಾಗಿದ್ದಲ್ಲಿ ನಿಮ್ಮ ಆರೋಗ್ಯವನ್ನು ಹೇಗೆ ಸುಧಾರಿಸಬಹುದು ಎಂಬುದರ ಕಡೆಗೆ ಗಮನ ಹರಿಸಿ ಆರೋಗ್ಯವನ್ನು ಸುಧಾರಿಸುವ ಕ್ರಮಗಳನ್ನು ಕೈಗೊಳ್ಳಬಹುದು. 

 ಯಾವುದಾದರೂ ಸೇವೆಗಳು ಅಥವಾ ಉತ್ಪನ್ನಗಳು ಅನಗತ್ಯವೆನಿಸಿದರೆ ಅವುಗಳನ್ನು ನಿಲ್ಲಿಸಬಹುದು ಅಥವಾ ನಿವೃತ್ತಗೊಳಿಸಬಹುದು, ಈ ಮೂಲಕ ಕೇವಲ ಬೇಕಾಗಿರುವ ಸೇವೆ ಹಾಗೂ ಸಾಮಗ್ರಿಗಳಿಂದ ಜೀವನವನ್ನು ಸರಳ ಹಾಗೂ ಸ್ವಚ್ಛವಾಗಿರಿಸಬಹುದು. 

 ಹೀಗೆ ಇದೇ ರೀತಿಯಲ್ಲಿ ನೀವು ಬಳಸುವ ಎಲ್ಲಾ ಸೇವೆಗಳು ಹಾಗೂ ಉತ್ಪನ್ನಗಳ ಸುಧಾರಣಾ ಸಾಧ್ಯತೆಗಳನ್ನು ವಿಶ್ಲೇಷಿಸಿ ಕ್ರಮಗಳನ್ನು ಕೈಗೊಳ್ಳಬಹುದು.

  ಹಣದ ಜಾಡು ಹಿಡಿಯುವ ಹಾಗೂ ಅನುಸರಿಸುವ ಚಟುವಟಿಕೆ ಈ ರೀತಿಯಲ್ಲಿ ನಮ್ಮ ವೈಯಕ್ತಿಕ ಜೀವನದ ಸುಧಾರಣೆಗೆ ಸಹಾಯಕಾರಿಯಾಗುತ್ತದೆ.  ಜೀವನವನ್ನು ಸರಳಗೊಳಿಸುವ ಮೂಲಕ ನೆಮ್ಮದಿಯನ್ನು ಕಂಡುಕೊಳ್ಳಬಹುದು.  

   ಕಳೆದ ಅಧ್ಯಾಯದಲ್ಲಿ ತಿಳಿಸಿದಂತೆ ಈ ಸುಧಾರಣಾ ಕೆಲಸಗಳನ್ನು ಗಂಡ ಹೆಂಡತಿ ಇಬ್ಬರೂ ಕುಳಿತು ಚರ್ಚಿಸಿ ನಿರ್ಧಾರ ತೆಗೆದುಕೊಳ್ಳುವುದು ಸೂಕ್ತ. ಇದಕ್ಕಾಗಿ  ಇಬ್ಬರೂ ಪ್ರಗತಿಪರ  ಚಿಂತನೆಯ ಮನಸ್ಥಿತಿಯನ್ನು ಹೊಂದಿರಬೇಕು. ಇದರ ಮೂಲಕ ಜೀವನವನ್ನು ಅರ್ಥೈಸಿ,  ಸರಳಿಕರಣಗೊಳಿಸಿ , ನೆಮ್ಮದಿಯ ಜೀವನವನ್ನು ನಡೆಸಲು ಸಹಕಾರಿಯಾಗುತ್ತದೆ. 

ಒಬ್ಬರೇ ನಿರ್ವಹಿಸುವುದು ಅಸಾಧ್ಯ

ಒಬ್ಬರೇ  ನಿರ್ವಹಿಸುವುದು  ಅಸಾಧ್ಯ:

ಚಿತ್ರ ಕೃಪೆ:  ಅಂತರ್ಜಾಲ 

    ವೈಯಕ್ತಿಕ  ಹಣಕಾಸು ನಿರ್ವಹಣೆ    ಹೆಸರೇ ಸೂಚಿಸುವಂತೆ  ವೈಯಕ್ತಿಕ ಆದರೂ  ಅದು  ನಿಜ ಅರ್ಥದಲ್ಲಿ ಕೌಟುಂಬಿಕ.   ಅಂದರೆ  ಮನೆಯ ಹಣಕಾಸು ನಿರ್ವಹಣೆ  ಕೇವಲ  ಮನೆಯ  ಯಜಮಾನನದಲ್ಲ ಅದರಲ್ಲಿ  ಸಂಗಾತಿಯ ಪಾತ್ರ ಬಹಳ ಮಹತ್ವದ್ದಾಗಿರುತ್ತದೆ ಹಾಗೂ ಕೌಟುಂಬಿಕ   ಮಟ್ಟದಲ್ಲಿ ನಡೆಯಬೇಕು.    ಹಣಕಾಸಿನ  ಎಲ್ಲಾ  ಆಯವ್ಯಯಗಳ  ಚರ್ಚೆ  ಮನೆಯಲ್ಲಿ ನಡೆಯಬೇಕು  ಸಂಗಾತಿಗಳು ಇಬ್ಬರು ಕುಳಿತು  ಚರ್ಚಿಸಿ  ತೀರ್ಮಾನಗಳನ್ನು ತೆಗೆದುಕೊಳ್ಳಬೇಕು.   ಇಲ್ಲದೆ ಹೋದರೆ   ಎತ್ತು ಏರಿಗೆ  ಎಳೆದರೆ ಕೋಣ  ನೀರಿಗೆ ಎಳೆದಂತೆ.  ಇದರಿಂದ  ಬದುಕಿನ ಬಂಡಿ  ಎಲ್ಲೂ ಸಾಗುವುದಿಲ್ಲ. 

 ಇಂತಹ ಅವ್ಯವಸ್ಥೆಯಿಂದ ಸೋಲುಗಳು, ನಿರಾಶೆಗಳು, ಹತಾಶೆಗಳು ಸಾಮಾನ್ಯವಾಗಿ ಬಿಡುತ್ತವೆ. ಅತೃಪ್ತಿ, ಅಸಮಾಧಾನ, ಕೋಪ  ಹೊಗೆಯಾಡುತ್ತಿರುತ್ತದೆ ಇದರಿಂದ ಕೌಟುಂಬಿಕ ವ್ಯವಸ್ಥೆಗೆ  ಅಡ್ಡ ಪರಿಣಾಮ ಬೀರುತ್ತದೆ.  ಆದ್ದರಿಂದ  ಪರಿಹಾರವಾಗಿ ಕುಟುಂಬದಲ್ಲಿ  ಆರ್ಥಿಕ ವ್ಯವಸ್ಥೆಯನ್ನು  ಸೃಷ್ಟಿಸಿಕೊಳ್ಳಬೇಕು  ಒಂದು ಪ್ರಕ್ರಿಯೆಯನ್ನು  ರೂಪಿಸಬೇಕು,   ಅದಕ್ಕಾಗಿ   ಮೂಲಸೌಕರ್ಯದ  ವ್ಯವಸ್ಥೆಯನ್ನು ಮಾಡಿರಬೇಕು ಹಾಗೆ ಅದಕ್ಕೆ ಸಾಧನಗಳನ್ನು ಕಂಡುಕೊಳ್ಳಬೇಕು.    

     ಈ ವ್ಯವಸ್ಥೆಯ ಭಾಗವಾಗಿ  ಕನಿಷ್ಠಪಕ್ಷ  ತಿಂಗಳಿಗೆ ಒಂದು  ದಿನ ಕುಳಿತು  ಆಯವ್ಯಯಗಳ  ಚರ್ಚೆ ನಡೆಸಬೇಕು.  ಇದರಲ್ಲಿ  ಮುಂದಿನ ಕೆಲಸ ಕಾರ್ಯಗಳು,  ಎದುರಿಸುತ್ತಿರುವ ಸಮಸ್ಯೆಗಳು,  ಅದರ  ಪರಿಹಾರಗಳು  ಹಾಗೂ ಭವಿಷ್ಯದ ಯೋಜನೆಗಳನ್ನು ಚರ್ಚಿಸಬೇಕು.   ಎಲ್ಲದಕ್ಕೂ ಎಷ್ಟು ಖರ್ಚಾಗುತ್ತದೆ,  ಅವುಗಳನ್ನು ಹೇಗೆ ನಿಭಾಯಿಸಬೇಕು  ಎಂಬುದರ ಚರ್ಚೆ ನಡೆಸಬೇಕು  ಹಾಗೆಯೇ ಮುಂದಿನ ತಿಂಗಳ  ಬಜೆಟ್  ಅನ್ನು ಸಿದ್ಧಪಡಿಸಬೇಕು. ಈ ಚರ್ಚೆಯು  ಒಂದು ಕಚೇರಿಯಲ್ಲಿ ಕಾರ್ಯವು ನಡೆಯುವಂತೆ  ವ್ಯವಸ್ಥಿತವಾಗಿ  ಇರಬೇಕು   ಅದಕ್ಕಾಗಿ  ನೀವು ಮನೆಯಲ್ಲಿ  ಕುರ್ಚಿ ಮೇಜುಗಳ  ವ್ಯವಸ್ಥೆ ಇರಬೇಕು ಅಥವಾ  ನಿಮ್ಮ ಮನೆಯ  ಡೈನಿಂಗ್ ಟೇಬಲ್ ಮೇಲೆ  ಕೂಡ ನಡೆಸಬಹುದು.   ಇದಕ್ಕಾಗಿ    ಗಣಕಯಂತ್ರದಲ್ಲಿ   ಎಂಎಸ್ ಎಕ್ಸೆಲ್  ನಂತಹ  ಸಾಧನಗಳನ್ನು  ಬಳಸುವುದು  ಅತಿ ಮುಖ್ಯ.   ಜೊತೆಗೆ   ಅವಶ್ಯಕತೆ   ಬಂದಲ್ಲಿ  ಸಂಬಂಧಪಟ್ಟ  ಮೊಬೈಲ್ ಅಪ್ಲಿಕೇಶನ್ ಗಳನ್ನು  ಬಳಸಬಹುದು.         

     ಈ ರೀತಿಯಲ್ಲಿ  ಇಬ್ಬರೂ ಚರ್ಚೆ ನಡೆಸುವುದರಿಂದ ಮನೆಯಲ್ಲಿನ ಬೇಡಿಕೆಗಳನ್ನು ಅರ್ಥೈಸಿಕೊಂಡು ಅದರ ಪೂರೈಕೆ ಹೇಗೆ,  ಯಾವಾಗ  ಮಾಡಬೇಕು ಎಂಬುದನ್ನು ನಿರ್ಧರಿಸಬಹುದು. ಇದರಿಂದ ಇಬ್ಬರಲ್ಲೂ ಸಮನ್ವಯತೆ  ಮೂಡಿ ಬರುತ್ತದೆ  ಜೊತೆಗೆ ಕೆಲಸಗಳು ಸರಾಗವಾಗಿ ಸಾಗುತ್ತವೆ.   ಇಲ್ಲದೆ ಹೋದರೆ ಮನೆಯಲ್ಲಿರುವ ಇತರೆ ಸದಸ್ಯರುಗಳು ಬೇಡಿಕೆಗಳನ್ನು ಇಡುವುದು,  ಒಬ್ಬರು ಮಾತ್ರ  ಅವುಗಳನ್ನು ನಿರ್ವಹಿಸುವುದು, ಪೂರೈಸುವುದು   ಸಾಧ್ಯವಾಗದ ಮಾತು.   ಅದಕ್ಕೆ   ಮನೆಯ ಎಲ್ಲಾ ಸದಸ್ಯರು   ಬೇಡಿಕೆ ಹಾಗೂ ಪೂರೈಕೆಗಳನ್ನು ಅರ್ಥಮಾಡಿಕೊಳ್ಳಬೇಕು. ಬಜೆಟ್ ಗೆ ಎಲ್ಲರೂ ಸ್ಪಂದಿಸಬೇಕು  ಆಗಲೇ  ಮನೆಯಲ್ಲಿ  ಸಮತೋಲನವಿರುತ್ತದೆ.

     ಸಾಮಾನ್ಯವಾಗಿ  ಮನೆಯಲ್ಲಿ  ಮಾಡಬೇಕಾದ ಕೆಲಸಗಳ ಪಟ್ಟಿಯನ್ನು (To-Do List) ಸಿದ್ಧಪಡಿಸುತ್ತಾ ಹೋಗಬೇಕು.     ಈ ಪಟ್ಟಿ  ನಿಮ್ಮ  ಕೆಲಸಗಳನ್ನು  ಮರೆಯದೆ  ಮಾಡಲು  ಸಹಕಾರಿಯಾಗುತ್ತದೆ ಅಲ್ಲದೆ ನಿಮ್ಮ ಚರ್ಚೆಗೆ  ವಿಷಯಗಳಾಗಿ  ಪ್ರಸ್ತುತವಾಗುತ್ತದೆ.   ಇದಲ್ಲದೆ  ನೀವು ಮಾಡುವ ಖರ್ಚುಗಳನ್ನು  ಒಂದು ಪುಸ್ತಕದಲ್ಲಿ  ಬರೆಯಿರಿ, ಅದಕ್ಕಿಂತಲೂ ಉತ್ತಮವಾದ  ಉಪಾಯವೆಂದರೆ  ಒಂದು ಮೊಬೈಲ್ ಅಪ್ಲಿಕೇಶನ್ ನಲ್ಲಿ  ದಾಖಲಿಸುತ್ತಾ ಹೋಗಬೇಕು.  ಇದು  ನೀವು ಮಾಡುವ  ಖರ್ಚುಗಳ ವೈಕರಿಯನ್ನು  ತೋರಿಸುತ್ತದೆ  ಇದರಿಂದ  ನೀವು ಚರ್ಚೆ  ಹಾಗೂ ವಿಶ್ಲೇಷಣೆ ಮಾಡಲು  ಅನುಕೂಲವಾಗುತ್ತದೆ.   ಇದು ಒಂದು ತ್ರಾಸದಾಯಕವಾದ ಕೆಲಸ  ಆದುದರಿಂದ  2 ರಿಂದ 3 ತಿಂಗಳು ಮಾಡಿದರು  ನಿಮಗೆ  ಒಂದು ಅಂದಾಜು ಲೆಕ್ಕ ಸಿಗುತ್ತದೆ.      

 ಸಾಕಷ್ಟು ಮನೆಗಳಲ್ಲಿ  ವೇತನ ಬಂದ  ಒಂದು ವಾರ ಅಥವಾ 15 ದಿವಸಗಳಲ್ಲಿ   ಹಣವೆಲ್ಲ ಮುಕ್ಕಾಲು ಪಾಲು ಖಾಲಿಯಾಗುತ್ತದೆ ಎಂದು ಹೇಳುವವರು ಹೆಚ್ಚು.    ನೀವು ಬಕಪಕ್ಷಿಗಳಂತೆ  ಕಾದು ಕುಳಿತು ನಿಮ್ಮ ವೇತನ ಅಥವಾ ಆದಾಯ ಬರುತ್ತಿದ್ದಂತೆ   ಎಲ್ಲವನ್ನು ಒಟ್ಟಿಗೆ ಖರ್ಚು ಮಾಡದಿರಿ.   ಅದರ ಬದಲಾಗಿ  ಕೇವಲ ಮಾಸಿಕ ಬಿಲ್ ಗಳನ್ನು ಕಟ್ಟಿ  ಉಳಿದವನ್ನು  10 ದಿನಗಳ ಕಾಲಾವಧಿಯ 3 ಅವಧಿ ಗಳನ್ನು (Time slots) ಮಾಡಿಕೊಳ್ಳಿ.   ಅಂದರೆ   ಮೊದಲ 10 ದಿನದಲ್ಲಿ  ಕೆಲವು ಕಾರ್ಯಗಳನ್ನು ಮಾಡಿ.  ಉಳಿದ ಕೆಲಸಗಳನ್ನು 10 ದಿನಗಳ  ಇನ್ನು ಎರಡು ಅವಧಿಗಳಲ್ಲಿ  ಹಂಚಿಕೆ ಮಾಡಿ.   ಇದರಲ್ಲಿ ಕಾಯಲಾರದ ಕೆಲಸಗಳನ್ನು  ಮೊದಲ ಸ್ಲಾಟ್ ನಲ್ಲೆ ಮುಗಿಸಿ, ಆತುರವಲ್ಲದ ಕಾಯಬಲ್ಲ ಕೆಲಸಗಳನ್ನು ಉಳಿದ ಇನ್ನೆರಡು ಸ್ಲಾಟ್ ಗಳಲ್ಲಿ  ಮಾಡಬಹುದು.    ಇದರಿಂದ  ತಿಂಗಳ ಮೊದಲ ವಾರದಲ್ಲೇ  ಹಣವೆಲ್ಲ ಖರ್ಚಾಗಿ  ಅಭದ್ರತೆಯಿಂದ  ಚಿಂತೆ ಮಾಡುವುದು ತಪ್ಪುತ್ತದೆ  ಹಾಗೂ  ಮುಂಬರುವ ತುರ್ತು ಪರಿಸ್ಥಿತಿಗಳನ್ನು  ನಿಭಾಯಿಸಲು  ಹಣದ ಅಭಾವ  ಇರುವುದಿಲ್ಲ.   ಹೀಗೆ ಮಾಡುವುದರಿಂದ  ನಿಮ್ಮ ಬ್ಯಾಂಕಿನ ಖಾತೆಯಲ್ಲಿ  ಹಣ ಉಳಿದು  ಮನದ ನೆಮ್ಮದಿಯನ್ನು ಕಾಪಾಡಲು  ಸಹಾಯವಾಗುತ್ತದೆ.    

 ಹೀಗೆ  ಮನೆಯಲ್ಲಿರುವ ದಂಪತಿಗಳು  ಹಾಗೂ ಹಿರಿಯರು  ಎಲ್ಲರೂ ಸೇರಿ  ಚರ್ಚೆಗಳ ಮೂಲಕ  ಹಾಗೂ ಒಪ್ಪಂದದ ಮೂಲಕ  ಮನೆಯನ್ನು ಹಾಗೂ ಹಣಕಾಸನ್ನು ನಿರ್ವಹಿಸಿದರೆ,  ಮನೆಯ  ಮತ್ತು  ಆರ್ಥಿಕ ನಿರ್ವಹಣೆ  ವಾಸ್ತವಿಕತೆಯ ನೆಲೆಗಟ್ಟಿನಲ್ಲಿ  ಸುಸೂತ್ರವಾಗಿ ನಡೆಯುತ್ತದೆ.  ಒಂದು ವೇಳೆ  ಮನೆಯ ಹಿರಿಯ ಸದಸ್ಯರು  ಇದಕ್ಕೆ  ಆಸಕ್ತಿ  ತೋರದಿದ್ದಲ್ಲಿ   ಅವರಿಗೆ   ಇದರ ಮಹತ್ವವನ್ನು  ವಿಸ್ತೃತವಾಗಿ ಹೇಳಿ   ಮನದಟ್ಟು ಮಾಡಬೇಕು  ಮತ್ತು   ಅವರು  ಇದಕ್ಕೆ ಸಹಕಾರ ಕೊಡುವಂತೆ  ಮನವೊಲಿಸಿ  , ಈ ಚಟುವಟಿಕೆಯಲ್ಲಿ   ಸಕ್ರಿಯವಾಗಿ   ಭಾಗವಹಿಸುವಂತೆ  ಮಾಡಬೇಕಾಗುತ್ತದೆ.