ಉದ್ಯೋಗ ನಷ್ಟ ಮತ್ತು ನಿರ್ವಹಣೆ

ಉದ್ಯೋಗ ನಷ್ಟ, ಸಿದ್ಧತೆ  ಮತ್ತು ನಿರ್ವಹಣೆ 

           ಜೀವನದಲ್ಲಿ ನಮಗೆ, ನಮ್ಮ ಕುಟುಂಬಕ್ಕೆ ಬೇಕಾದ ಎಲ್ಲಾ ಅಗತ್ಯ ವಸ್ತುಗಳು, ಸೇವೆಗಳು, ನಾವು ಈಡೇರಿಸುವ ಆಸೆಗಳು ಪ್ರತಿಯೊಂದಕ್ಕೂ ಹಣ ಬೇಕೇ ಬೇಕು. ಸಾಮಾನ್ಯವಾಗಿ ಕುಟುಂಬಕ್ಕೆ ಒಂದು ಅಥವಾ ಎರಡು ಆದಾಯದ ಮೂಲಗಳು ಇರುತ್ತವೆ. ಒಂದು ವೇಳೆ ಒಂದೇ ಆದಾಯದ ಮೂಲವಿದ್ದು ಅದು ನಿಂತು ಹೋದರೆ, ಆ ಇಡೀ ಕುಟುಂಬ ಆರ್ಥಿಕ ಸಂಕಷ್ಟಕ್ಕೆ ಒಳಗಾಗಿ ಯಾವುದೇ ಅಗತ್ಯ ಸೇವೆಗಳು, ಉತ್ಪನ್ನಗಳನ್ನು ಬಳಸಲಾಗದೆ  ನರಳುತ್ತಾರೆ. ಇದು ತುಂಬಾ ಆತಂಕಕಾರಿ ಪರಿಸ್ಥಿತಿ ಹಾಗೂ ಇದು ನೋವಿನಿಂದ ಕೂಡಿರುತ್ತದೆ. ಅಲ್ಲದೆ ಇದರಿಂದ ಅನೇಕ ತರಹದ ಸಮಸ್ಯೆಗಳನ್ನು ಕುಟುಂಬವು ಎದುರಿಸಬೇಕಾಗುತ್ತದೆ. ಹೀಗಾಗಿ ಯಾವ ರೀತಿಯ ಸಮಸ್ಯೆಗಳು ತಲೆದೋರುತ್ತವೆ, ಈ ಸಮಸ್ಯೆಗಳನ್ನು ತಡೆಯಲು ಸಾಧ್ಯವೇ, ಈ ಸಮಸ್ಯೆಗಳನ್ನು ಬಂದಾಗ ಹೇಗೆ ನಿಭಾಯಿಸಬಹುದು ಎಂದು ತಿಳಿಯೋಣ. 

ಸಾಮಾನ್ಯವಾಗಿ ಉದ್ಯೋಗ ಕಳೆದುಕೊಂಡರೆ ಜನರು ಈ ಕೆಳಗಿನ ಸಮಸ್ಯೆಗಳನ್ನು ಅನುಭವಿಸುತ್ತಾರೆ.

1.  ದೊಡ್ಡ ಆಘಾತವಾಗುತ್ತದೆ ಹಾಗೂ ಭವಿಷ್ಯದ ಬಗ್ಗೆ ಆತಂಕ,  ಭಯ ಮನೆ ಮಾಡುತ್ತದೆ 

2.  ಮನೆಯವರಲ್ಲಿಯೂ ಚಿಂತೆ ಶುರುವಾಗುತ್ತದೆ  ಹಾಗೂ ಮನಸ್ಸು ದುರ್ಬಲಗೊಳ್ಳುತ್ತದೆ. 

3.  ನಿಮ್ಮ ಬಂಧುಮಿತ್ರರು ನೀವು ಎಲ್ಲಿ ದುಡ್ಡು ಕೇಳುತ್ತೀರೋ ಎಂದು ಅಂತರ ಕಾಪಾಡಿಕೊಳ್ಳುತ್ತಾರೆ.

4.  ಸಾಲಕೊಟ್ಟ ಬ್ಯಾಂಕ್ ಗಳು, ಸಾಲದಾತರು ಮನೆಗೆ ಬಂದು ಒತ್ತಡ ಹೇರುವ ಆತಂಕ.  

5.  ಉಳಿತಾಯದ ಹಣವೆಲ್ಲ ಕಳೆದುಕೊಂಡು ಹಣವಿಲ್ಲದೆ ಅಕೌಂಟು ಮತ್ತು ಜೇಬು ಖಾಲಿಯಾಗುತ್ತದೆ .

6.  ಹಣಕ್ಕಾಗಿ  ಮನುಷ್ಯ ಹತಾಶನಾಗುತ್ತಾನೆ ಹಾಗೆಯೇ ಬಗ್ಗಲು ಪ್ರಾರಂಭಿಸುತ್ತಾನೆ.

6.  ಉದ್ಯೋಗದ ಹುಡುಕಾಟದಲ್ಲಿ ಕಡಿಮೆ ಸಂಬಳಕ್ಕೆ ರಾಜಿ ಮಾಡಿಕೊಳ್ಳುವ ಮನಸ್ಥಿತಿ.

7.  ಉದ್ಯೋಗಕ್ಕಾಗಿ ಪರ ಊರಿಗೆ, ಪರ ರಾಜ್ಯ ಅಥವಾ ದೇಶಕ್ಕೆ ವಲಸೆ ಹೋಗುವ ಪರಿಸ್ಥಿತಿ. 

    ಖಾಸಗಿ ಸಂಸ್ಥೆಗಳಲ್ಲಿ ಉದ್ಯೋಗಿಯನ್ನು ಕೆಲಸದಿಂದ ಕೈ ಬಿಡುವಾಗ ಎಷ್ಟೋ ಬಾರಿ ಯಾವುದೇ ಎಚ್ಚರಿಕೆ ಅಥವಾ ಮುಂಚಿತ ವಾದ ಸೂಚನೆ ಕೊಡದೆ ಉದ್ಯೋಗದಿಂದ ವಜಾ ಮಾಡುತ್ತಾರೆ. 

ಕಂಪನಿಗಳು ಇದರಿಂದ ಉದ್ಯೋಗಿಯು ಅನುಭವಿಸಬೇಕಾದ ಕಷ್ಟ ನಷ್ಟಗಳನ್ನು ಪರಿಗಣಿಸುವುದಿಲ್ಲ. ಅವರು ಕೇವಲ ತಮ್ಮ ವ್ಯವಹಾರಕ್ಕೆ ಆಗುವ ಅನುಕೂಲ ಮತ್ತು ಲಾಭಗಳನ್ನು ನೋಡಿಕೊಳ್ಳುತ್ತಾರೆ. ಉದ್ಯೋಗ ಪಡೆಯುವುದು, ಅದರಲ್ಲಿ ಮುಂಬಡ್ತಿ ಪಡೆದು ಉನ್ನತ ಹುದ್ದೆಗೆ ಏರುವುದು, ಹಣ ಸಂಪಾದನೆ, ಅದರಿಂದ ಜೀವನ ನಿರ್ವಹಣೆ, ಉದ್ಯೋಗವನ್ನು ಉಳಿಸಿಕೊಳ್ಳುವುದು ಇವೆಲ್ಲವೂ ಉದ್ಯೋಗಿಯ ಜವಾಬ್ದಾರಿಯೇ ಹೊರತು ಕಂಪನಿಗಳದಲ್ಲ. ಆದುದರಿಂದ ಈ ಮೇಲೆ ಹೇಳಿದ ಎಲ್ಲಾ ಕೆಲಸಗಳು ನೀವು ಜವಾಬ್ದಾರಿ ಹೊತ್ತು ಪೂರ್ವ ಯೋಜನೆಯಿಂದ ಪಡೆಯಬೇಕೆ ಹೊರತು, ಸಂಸ್ಥೆಗಳು, ಅಥವಾ ಮತ್ತೋರ್ವ ವ್ಯಕ್ತಿ ನಿಮಗೆ ಮಾಡಲಾರ. ಆದುದರಿಂದ ನಾವು ಜವಾಬ್ದಾರಿ ಹೊತ್ತು ಯೋಚಿಸಿ ಯೋಜಿಸಿ ಪೂರ್ವ ಸಿದ್ಧತೆ ಮಾಡಿ ಇದನ್ನು ಸಮರ್ಥವಾಗಿ ನಿರ್ವಹಿಸಬೇಕು. 

    ರಕ್ಷಣಾ ಬಲೆಯ  ಪೂರ್ವಸಿದ್ಧತೆ:

     ಉದ್ಯೋಗ ನಷ್ಟ ಅಥವಾ ಆದಾಯ ನಷ್ಟ ದಂತಹ ಸಂದರ್ಭಗಳಿಗೆ ನಾವು ಪೂರ್ವ ಸಿದ್ಧತೆ ಮಾಡಿಕೊಳ್ಳಬೇಕು. ಇದು ವ್ಯಕ್ತಿಯಿಂದ ವ್ಯಕ್ತಿಗೆ, ಅವರು ಹೊತ್ತಿರುವ ಜವಾಬ್ದಾರಿಯಿಂದ ಜವಾಬ್ದಾರಿಗೆ ಬದಲಾಗುತ್ತದೆ. ಆದುದರಿಂದ ಅದನ್ನು ಈ ಕೆಳಕಂಡಂತಹ ಮಾರ್ಗದರ್ಶನದಲ್ಲಿ ಗುರುತಿಸಬೇಕು.

   1. ಒಂದು ವೇಳೆ ಗಂಡ ಹೆಂಡತಿ ಇಬ್ಬರು ದುಡಿಯುತ್ತಿದ್ದರೆ ನಿಮಗೆ ಈಗಾಗಲೇ ಮತ್ತೊಂದು ಆದಾಯವಿದ್ದು ತುಂಬಾ ಚಿಂತಿಸುವ ಅವಶ್ಯಕತೆ ಇರುವುದಿಲ್ಲ. ಒಂದು ವೇಳೆ ನಿಮ್ಮ ಸಂಗಾತಿಯ ಆದಾಯ ತುಂಬಾ ಚೆನ್ನಾಗಿದ್ದು ನಿಮ್ಮ ತಿಂಗಳ ಎಲ್ಲಾ ಖರ್ಚು ವೆಚ್ಚಗಳನ್ನು ಬರಿಸುವ ಶಕ್ತಿ ಹೊಂದಿದ್ದಾರೆ,  ನೀವು 6 ತಿಂಗಳವರೆಗಿನ ಎಲ್ಲಾ ಖರ್ಚುವೆಚ್ಚಗಳನ್ನು ಲೆಕ್ಕ ಹಾಕಿ ಅದನ್ನು ಒಂದು ತುರ್ತು ನಿಧಿಯಾಗಿ ಅಥವಾ ಉದ್ಯೋಗ ನಷ್ಟ ನಿಧಿಯಾಗಿ ಕೂಡಿಡಬೇಕು. ಒಂದು ವೇಳೆ ನಿಮ್ಮ ಸಂಗಾತಿಯ ಆದಾಯ ನಿಮ್ಮ ಎಲ್ಲಾ ಖರ್ಚುವೆಚ್ಚಗಳನ್ನು ಭರಿಸುವ ಶಕ್ತಿಯನ್ನು ಹೊಂದಿಲ್ಲ ವಾದರೆ ನೀವು 9 ತಿಂಗಳ ಸಂಪೂರ್ಣ ಖರ್ಚುವೆಚ್ಚಗಳನ್ನು ತುರ್ತು ನಿಧಿಯಾಗಿ ಕೂಡಿಡಬೇಕು.

2. ಒಂದು ವೇಳೆ ನೀವೊಬ್ಬರೇ ದುಡಿಯುವ ವ್ಯಕ್ತಿಯಾಗಿದ್ದು ನಿಮ್ಮ ಇಡೀ ಕುಟುಂಬ ನಿಮ್ಮ ಆದಾಯದ ಮೇಲೆ ಅವಲಂಬಿತವಾಗಿದ್ದರೆ, ನೀವು ಕನಿಷ್ಠಪಕ್ಷ ಒಂದು ವರ್ಷದ ಸಂಪೂರ್ಣ ಖರ್ಚು ವೆಚ್ಚಗಳನ್ನು ಭರಿಸುವಷ್ಟು ಹಣವನ್ನು ತುರ್ತು ನಿಧಿಯಾಗಿ ಅಥವಾ ಉದ್ಯೋಗ ನಷ್ಟ ನಿಧಿಯಾಗಿ ಕೂಡಿಡಬೇಕು. ಈ ನಿಧಿಯಲ್ಲಿ ನಿಮ್ಮ ಎಲ್ಲಾ ಸಾಲದ ಕಂತುಗಳನ್ನು ತುಂಬುವಷ್ಟು ಹಣವಿರಬೇಕು. 

3. ನೀವು ನಿಮ್ಮ ಹಣದ ಖರ್ಚು ವೆಚ್ಚದ ಅನುಸರಣೆ (ಟ್ರಾಕಿಂಗ್) ಮಾಡಿ ಅದರಲ್ಲಿ ನಿಮ್ಮ ಅಗತ್ಯಗಳು ಯಾವುದು ಹಾಗೂ ಆಸೆಗಳು ಯಾವುದು ಎಂದು ಪೂರ್ವ ಸಿದ್ಧತೆಯ ಭಾಗವಾಗಿ ಗುರುತಿಸಿ ಇಟ್ಟಿರಬೇಕು. ಇದರಿಂದ ಉದ್ಯೋಗ ನಷ್ಟದ ನಂತರ ಕೇವಲ ಅಗತ್ಯಗಳ ಪೂರೈಕೆಗೆ ಮಾತ್ರ ಖರ್ಚುಗಳನ್ನು ಮಾಡಿಕೊಂಡು, ಆಸೆಗಳನ್ನು ತಾತ್ಕಾಲಿಕವಾಗಿ ತಡೆಹಿಡಿಯಬಹುದು ಇದರಿಂದ ಮನೆ ನಡೆಸುವ ಖರ್ಚು ವೆಚ್ಚಗಳಲ್ಲಿ ಸುಧಾರಣೆಯಾಗುತ್ತದೆ. 

4. ಕಾರ್ಪೊರೇಟ್ ಕಂಪನಿ ಉದ್ಯೋಗಿಗೆ ಕೊಡುವ ಆರೋಗ್ಯ ವಿಮೆಯನ್ನು ಹೊರತುಪಡಿಸಿ, ನೀವು ನಿಮ್ಮದೇ ಸ್ವಂತದ್ದಾದ ಕೌಟುಂಬಿಕ ಆರೋಗ್ಯ ವಿಮೆಯನ್ನು ಹೊಂದಿರಬೇಕು. ಇದು ಇಂತಹ ಸಂದರ್ಭಗಳಲ್ಲಿ ರಕ್ಷಣಾ ಬಲೆಯಾಗಿ ನಿಮ್ಮನ್ನು ಕಾಪಾಡುತ್ತದೆ.

5. ಚಿಕ್ಕಪುಟ್ಟ ಸಾಲಗಳನ್ನು ಆದಷ್ಟು ಬೇಗ ತೀರಿಸಬೇಕು. ದೀರ್ಘ ಕಾಲಿನ ಸಾಲಗಳಾದ  ಗೃಹ ಸಾಲದಂತಹ ಸಾಲಗಳನ್ನು ಆಗಾಗ ಭಾಗಶಃ ಮರುಪಾವತಿಸಿ ಸಾಲದ ಕಂತನ್ನು ಕಡಿಮೆ ಮಾಡುತ್ತಾ ಬರಬೇಕು, ಇದರಿಂದ ಕಂತಿನ ಹೊರೆ ಕಡಿಮೆಯಾಗುತ್ತದೆ. ಸಾಲದ ನಿರ್ವಹಣೆಯ ಹೊರೆ ಕಡಿಮೆಯಾಗುತ್ತದೆ. 

ಉದ್ಯೋಗ ನಷ್ಟವಾದರೆ ನಿರ್ವಹಣಾ ಮಾರ್ಗ:

     ಉದ್ಯೋಗ ನಷ್ಟವಾದರೆ ಅದು ಮುಂಚಿತವಾಗಿ ಸೂಚನೆ ಕೊಡದೆ ತೆಗೆದುಹಾಕುತ್ತಾರೆ. ಇದರಿಂದ ಉದ್ಯೋಗಿಗೆ ಹಾಗೂ ಅವರ ಕುಟುಂಬಕ್ಕೆ ದೊಡ್ಡ ಆಘಾತವಾಗುತ್ತದೆ.  ಇತ್ತೀಚಿಗೆ ಇದನ್ನು ಪತ್ರಿಕೆಯಲ್ಲಿ ಅಥವಾ ಅಂತರ್ಜಾಲದಲ್ಲಿ ಸಾಕಷ್ಟು ಬಾರಿ ಕೇಳಿದ್ದೇವೆ. ಇಂತಹ ಸಂದರ್ಭದಲ್ಲಿ ಏನು ಮಾಡಬಹುದು ಎಂದು ತಿಳಿಯೋಣ. 

  1. ಉದ್ಯೋಗ ನಷ್ಟವಾದಾಗ ಉದ್ಯೋಗಿ ಮತ್ತು ಕುಟುಂಬದವರು ಧೃತಿ ಕೆಡಬಾರದು, ಧೈರ್ಯವನ್ನು ತಂದುಕೊಳ್ಳಬೇಕು ಹಾಗೂ ಬಾವುಕರಾಗದೆ, ಸಮಚಿತ್ತರಾಗಿ ವಾಸ್ತವದ ನೆಲೆಗಟ್ಟಿನಲ್ಲಿ ನಡೆದ ಘಟನೆಯನ್ನು ಒಪ್ಪಿಕೊಳ್ಳಬೇಕು. ನಂತರ ಮುಂದಿನ ಯಾವ ಕ್ರಮಗಳನ್ನು ಕೈಗೊಳ್ಳಬೇಕು ಎಂದು ದಂಪತಿಗಳಿಬ್ಬರು ಚರ್ಚಿಸಿ ನಿರ್ಧರಿಸಿ ಕೆಲಸಗಳನ್ನು ಮಾಡುತ್ತಾ ಹೋಗಬೇಕು. 

2. ಒಂದನ್ನು ನೆನಪಿಟ್ಟುಕೊಳ್ಳಿ ಇದೊಂದು ತಾತ್ಕಾಲಿಕ ಕಷ್ಟ, ಇದನ್ನು ಸಮರ್ಥವಾಗಿ ಎದುರಿಸಿದರೆ ಕಾಲಕ್ರಮೇಣ ಹೊಸ ಹಾಗೂ ಉತ್ತಮ ಉದ್ಯೋಗ ಲಭಿಸಿ ಸಮಸ್ಯೆಗಳೆಲ್ಲ ಪರಿಹಾರವಾಗುತ್ತದೆ.

3. ಮನೆಯ ಎಲ್ಲಾ ಕುಟುಂಬ ವರ್ಗದವರಿಗೆ ಈ ಪರಿಸ್ಥಿತಿಯನ್ನು ತಿಳಿಸಿ, ಸವಾಲಿನ ಅರಿವು ಮೂಡಿಸಿ, ಎಲ್ಲರೂ ಸಹಕರಿಸಿ ಸಂದರ್ಭವನ್ನು ಎದುರಿಸಬೇಕೆಂದು ಮನದಟ್ಟು ಮಾಡಿಸಿ. 

4. ಈ ಮುಂಚೆ ಅಗತ್ಯ ಮತ್ತು ಆಸೆಗಳ ಪಟ್ಟಿಯನ್ನು ಮಾಡಿದಂತೆ, ನೀವು ನಿಮ್ಮ ಅಗತ್ಯಗಳನ್ನು ಮಾತ್ರ ಪೂರೈಕೆ ಮಾಡಿ, ನಿಮ್ಮ ಆಸೆಗಳನ್ನು ತಾತ್ಕಾಲಿಕವಾಗಿ ಮುಂದೂಡಿ ನಿಮ್ಮ ಖರ್ಚುಗಳನ್ನು ಕಡಿಮೆ ಮಾಡಿ  ನಿಯಂತ್ರಿಸಬೇಕು.

5. ಇದು ವಿಭಿನ್ನ ಸಂದರ್ಭ ವಾಗಿರುವುದರಿಂದ ದಂಪತಿಗಳಿಬ್ಬರೂ ಸೇರಿ ಹೊಸ ಬಜೆಟ್ ಅನ್ನು ರೂಪಿಸ ಬೇಕು ಹಾಗೂ ಪಾಲಿಸಬೇಕು. ಇದರಿಂದ ಯಾವ ಅವಶ್ಯಕತೆಗಳಿಗೆ ಆದ್ಯತೆಗಳನ್ನು ಕೊಟ್ಟು ಪೂರೈಸಬೇಕು ಎಂದು ತಿಳಿದು ಬರುತ್ತದೆ ಹಾಗೂ ಅದನ್ನು ಪಾಲಿಸಲು ಕುಟುಂಬದವರ ಸಹಕಾರ ದೊರೆಯುತ್ತದೆ. ಬಜೆಟ್ ನಲ್ಲಿ, ರಕ್ಷಣಾ ಬಲೆಯಾದ ಆರೋಗ್ಯ ವಿಮೆಯನ್ನು ಮುಂದುವರಿಸಬೇಕು. 

6. ಮನೋರಂಜನೆಯಂತಹ ಸಣ್ಣ ಪುಟ್ಟ ಆಸೆಗಳನ್ನು ಈಡೇರಿಸಿಕೊಳ್ಳಲು ಕಡಿಮೆ ವೆಚ್ಚದ ಆಯ್ಕೆಗಳನ್ನು ಮಾಡಿ  ಮನೋರಂಜನೆಯಿಂದ  ಮಾನಸಿಕ ಸಮತೋಲನವನ್ನು ಕಾಯ್ದಿರಿಸಿಕೊಳ್ಳಲು ಸಹಾಯವಾಗುತ್ತದೆ. 

7. ಖರ್ಚು ಮಾಡುವಾಗ ಬುದ್ಧಿವಂತಿಕೆಯನ್ನು ಉಪಯೋಗಿಸಿ.  ನಿಜವಾಗಲೂ ಅವಶ್ಯಕತೆ ಇದೆಯೇ, ಇದನ್ನು ಬಳಸುತ್ತೇನೆಯೇ? ಮಾರಾಟಗಾರನ ಒತ್ತಡಕ್ಕೂ, ಆತ ಮನವೊಲಿಸುತ್ತಿದ್ದಾನೆ ಎಂದೋ ಅನಾವಶ್ಯಕವಾಗಿ ಖರ್ಚು ಮಾಡಬೇಡಿ. ಕೊಳ್ಳುವಾಗ ಸ್ವಲ್ಪ ಚೌಕಾಸಿ ಮಾಡಿ. 

ಉದ್ಯೋಗದ ಹುಡುಕಾಟ:

1. ಒಂದು ಉತ್ತಮ ವೃತ್ತಿ ವಿವರವುಳ್ಳ ರೆಸ್ಯುಮೆಯನ್ನು ಹಾಗೂ ಅರ್ಜಿ ಪತ್ರವನ್ನು ( ಕವರ್ ಲೆಟರ್ ) ಸಿದ್ಧಪಡಿಸಿ. ಇದು ಅರ್ಜಿ ಸಲ್ಲಿಸುವ ಕೇಳಿದ ಉದ್ಯೋಗದ ಕೌಶಲ್ಯಕ್ಕೆ ತಕ್ಕಂತೆ ಅಭಿವೃದ್ಧಿಪಡಿಸಬೇಕು. 

 

2. ಹೊಸ ಉದ್ಯೋಗಕ್ಕಾಗಿ ನಿಮ್ಮ ಉದ್ಯೋಗ ರಂಗದ ಆಧುನಿಕ ಹಾಗೂ ಮುಂದುವರೆದ    ಕೌಶಲ್ಯಗಳನ್ನು, ಪರಿಣಿತಿಯನ್ನು ಅಭಿವೃದ್ಧಿ ಪಡಿಸಿಕೊಳ್ಳಿ. 

3. ನಿಮ್ಮ ಉದ್ಯೋಗಕ್ಕೆ ಸಂಬಂಧಪಟ್ಟ ಪುಸ್ತಕಗಳನ್ನು, ಬರಹಗಳನ್ನು ಓದಿ ಸಂಗ್ರಹಿಸಿ ಇಟ್ಟುಕೊಳ್ಳಿ.     ಟಿಪ್ಪಣಿ ಬರಹಗಳನ್ನು ಬರೆದಿಟ್ಟುಕೊಳ್ಳಿ.  

4. ಉದ್ಯೋಗ ಹುಡುಕಲು  ನೆಟ್ ವರ್ಕಿಂಗ್ ಬಹಳ ಸಹಾಯಕಾರಿ ಆದುದರಿಂದ ನೀವು ಹಳೆಯ ಸ್ನೇಹಿತರು, ಸಹೋದ್ಯೋಗಿಗಳು, ವೃತ್ತಿಪರ ಗುಂಪುಗಳೊಂದಿಗೆ ಸಂಪರ್ಕದಲ್ಲಿರಿ ಹಾಗೂ ಉದ್ಯೋಗ, ಮುಂದುವರೆದ ಕೌಶಲ್ಯದ ಮಾಹಿತಿಯನ್ನು ಪಡೆಯುತ್ತೀರಿ. 

5. ವಿಶೇಷವಾಗಿ ಉದ್ಯೋಗದ ಸಂದರ್ಶನಕ್ಕಾಗಿ ಪ್ರಶ್ನೋತ್ತರಗಳ ಸಿದ್ಧತೆಯನ್ನು ಮಾಡಿಕೊಳ್ಳಿ. 

6. ನಿಮ್ಮ ವ್ಯಕ್ತಿತ್ವದಲ್ಲಿ ಕೊರತೆ ಇದ್ದಲ್ಲಿ ನೀವು ವ್ಯಕ್ತಿತ್ವ ವಿಕಸನಕ್ಕೆ ಆದ್ಯತೆ ಕೊಟ್ಟು ನಿಮ್ಮ ಸಂವಹನ ಚಾತುರ್ಯ, ನಾಯಕತ್ವದ ಗುಣಗಳು, ಆತ್ಮವಿಶ್ವಾಸವನ್ನು ಬೆಳೆಸಿಕೊಳ್ಳಲು ಸಾಫ್ಟ್ ಸ್ಕಿಲ್ ಗಳನ್ನು ಕಲಿಯಬೇಕು. 

7. ಹೊಸ ಉದ್ಯೋಗ ಸಿಗುವ ತನಕ ಫ್ರೀ ಲ್ಯಾನ್ಸಿನ್ಗ್, ಅರೆಕಾಲಿಕ ಉದ್ಯೋಗವನ್ನು ಪರಿಗಣಿಸಿ. 

 ಸಾಲಗಳು 

      ನಮಗೆ ದಿನನಿತ್ಯವೂ ಎಷ್ಟೋ ಮೊಬೈಲ್ ಕರೆಗಳು ಬರುತ್ತಿರುತ್ತವೆ, ಕ್ರೆಡಿಟ್ ಕಾರ್ಡ್ ತೆಗೆದುಕೊಳ್ಳಿ, ವೈಯಕ್ತಿಕ ಸಾಲ ತೆಗೆದುಕೊಳ್ಳಿ, ಓವರ್ ಡ್ರಾಫ್ಟ್ ಸಾಲ, ಬಂಗಾರದ ಮೇಲಿನ ಸಾಲ ಹೀಗೆ ನಾನಾ ಹೆಸರುಗಳಲ್ಲಿ ಲೋನ್ ಸಂಸ್ಥೆಗಳು, ಬ್ಯಾಂಕ್ ಗಳು, NBFC ಗಳು ಸಾಲವನ್ನು ಕೊಡಲು ನಾ ಮುಂದು ತಾ ಮುಂದು ಎಂದು ಹಾತೊರೆಯುತ್ತಿರುತ್ತವೆ. ಹಾಗಿದ್ದಲ್ಲಿ ಸಾಲ ಎಂದರೇನು ಎಂದು  ಅರ್ಥಮಾಡಿಕೊಳ್ಳೋಣ.

     ಸಾಲವು ನಾವು ಸಂಪಾದಿಸುವ ಮುನ್ನವೇ ಖರ್ಚು ಮಾಡುವ ಹಣವಾಗಿದ್ದು, ಅದನ್ನು ಭವಿಷ್ಯದ  ದಿನಗಳಲ್ಲಿ ಸಂಪಾದಿಸಿ ತೀರಿಸುವೆನು ಎಂಬ ಭರವಸೆಯ ಮೇಲೆ ಹಾಗೂ ಅಡಮಾನದ ಆಧಾರದ   ಮೂಲಕ ಹಣವನ್ನು ಎರವಲು ಪಡೆದು, ಇವತ್ತಿನ ದಿನ ಖರ್ಚು ಮಾಡುತ್ತೇವೆ.  ಆದರೆ ಸಾಲವನ್ನು ತೀರಿಸಲು ನಿಯಮಿತ ದಿನಗಳಿರುತ್ತವೆ ಹಾಗೂ ಅದಕ್ಕೆ ಬಡ್ಡಿ ಮತ್ತು ಶುಲ್ಕಗಳು ಇರುತ್ತದೆ.  ಕೆಲವು ಕಡೆ ಚಕ್ರಬಡ್ಡಿಯು ಸೇರುತ್ತದೆ. 

    ಹಾಗೆ ನೋಡಿದರೆ ಕೇವಲ ಜನಸಾಮಾನ್ಯರು  ಅಷ್ಟೇ ಅಲ್ಲ, ಕಾರ್ಪೊರೇಟ್ ಸಂಸ್ಥೆಗಳು, ಇತರೆ ಸಂಸ್ಥೆಗಳು, ರಾಜ್ಯ ಹಾಗೂ ಕೇಂದ್ರ ಸರ್ಕಾರಗಳು ಕೂಡ ಸಾಲವನ್ನು ಪಡೆಯುತ್ತವೆ.  ಹಾಗಂತ ಸಾಲವು ಒಳ್ಳೆಯದೆಂದು ಸಬೂಬು ಹೇಳುವುದಿಲ್ಲ. ಸಾಲವು ಒಂದು ಬದ್ಧತೆ ಆಗಿದ್ದು, ಕೆಲವು ದೀರ್ಘ ಕಾಲದ್ದು ಆಗಿರುತ್ತದೆ. ಅದು ಅಧಿಕವಾದರೆ ಇತರ ಖರ್ಚುಗಳಿಗೆ ಅಡ್ಡಿಪಡಿಸಿ ಮನೆಯಲ್ಲಿ, ಮನಸ್ಸಿನಲ್ಲಿ, ಜೀವನದಲ್ಲಿ ಇಕ್ಕಟ್ಟನ್ನು ಸೃಷ್ಟಿ ಮಾಡುತ್ತದೆ.  ಈ ಆರ್ಥಿಕ ಇಕ್ಕಟ್ಟಿನಿಂದ ನಮ್ಮ ಇತರೆ ಆರ್ಥಿಕ ಗುರಿಗಳನ್ನು ತಲುಪಲು ಹಣದ ಕೊರತೆಯುಂಟಾಗಿ, ಈ  ಆರ್ಥಿಕ ಇಕ್ಕಟ್ಟು ಮತ್ತೆ ಬೇರೆ  ಸಾಲವನ್ನು ಮಾಡಲು ದಾರಿ ಮಾಡಿಕೊಡುತ್ತದೆ.  ಆದಕಾರಣ ಸಾಲವನ್ನು ಒಂದು ಮಿತಿಯಲ್ಲಿ ತೆಗೆದುಕೊಳ್ಳಬೇಕು. ಅತಿ ಅವಶ್ಯಕತೆ ಇರುವ ಸಂದರ್ಭಗಳಲ್ಲಿ ಮಾತ್ರ ಸಾಲವನ್ನು ಮಾಡಬೇಕು, ಅದು ಕೂಡ ಕಡಿಮೆ ಬಡ್ಡಿ ದರದಲ್ಲಿ,  ಅದರಲ್ಲೂ ನಂಬಲಾರ್ಹ ಬ್ಯಾಂಕ್ /ಸಂಸ್ಥೆಗಳಲ್ಲಿ ಮಾತ್ರ. 

  ಸಾಲ ತೆಗೆದುಕೊಳ್ಳುವುದನ್ನು ತಪ್ಪಿಸುವುದು ಹಾಗೂ ತಾವೇ ಸಂಪಾದಿಸಿದ ಹಣದಲ್ಲಿ ಉತ್ಪನ್ನಗಳನ್ನು, ಸೇವೆಗಳನ್ನು ಕೊಳ್ಳುವುದು ಉತ್ತಮ ಆಯ್ಕೆಯಾದರು ಕೆಲವೊಮ್ಮೆ ಅತಿ ಹೆಚ್ಚು ವೆಚ್ಚದ ಗೃಹ ನಿರ್ಮಾಣ ಅಥವಾ ಹೊಸ ಉದ್ದಿಮೆ / ವ್ಯಾಪಾರದ ಆರಂಭಕ್ಕೆ ಬೇಕಾಗುವಷ್ಟು ಹಣ ಜನರ ಬಳಿ ಇರುವುದಿಲ್ಲ.  ಎಲ್ಲರಲ್ಲಿಯೂ ಅತಿದೊಡ್ಡ ಖರ್ಚಿನ ಕೆಲಸಗಳಿಗೆ ಕೂಡಿಡಲು ಸಾಧ್ಯವಾಗುವುದಿಲ್ಲ,  ಅದು ಅಲ್ಲದೆ ಹಣದುಬ್ಬರದಿಂದ, ಹಾಗೂ ದೀರ್ಘ ಕಾಲದ ಸಮಯಾವಕಾಶ ಬೇಡುವುದರಿಂದ ಸಾಲ ಪಡೆಯುವುದು ಒಳ್ಳೆಯ ನಿರ್ಧಾರವೇ ಆಗಿರುತ್ತದೆ. ಇಂತಹ ರಚನಾತ್ಮಕ ವಿಷಯಗಳಿಗೆ ತೆಗೆದುಕೊಳ್ಳುವ ಸಾಲ ಅನಿವಾರ್ಯವಾಗಿರುತ್ತದೆ ಹಾಗೂ ಅದು ಉತ್ತಮ ಭವಿಷ್ಯಕ್ಕೆ ಲಾಭದಾಯಕವಾಗಿರುತ್ತದೆ. 

ಆದರೆ ಮನೋರಂಜನೆಯ ಉದ್ದೇಶಕ್ಕಾಗಿ, ಮೋಜಿಗಾಗಿ, ಪ್ರವಾಸಕ್ಕಾಗಿ, ಪ್ರತಿಷ್ಠೆಯ ಪ್ರದರ್ಶನಕ್ಕಾಗಿ,  ದುಂದು ವೆಚ್ಚದ ಸಮಾರಂಭಗಳಿಗಾಗಿ, ಅಥವಾ ಯಾವುದೇ ಆರ್ಥಿಕ ಪ್ರಗತಿಯನ್ನು ಸಾಧಿಸದ ಕೆಲಸಗಳಿಗೆ ಸಾಲ ತೆಗೆದುಕೊಳ್ಳುವುದು ನಕಾರಾತ್ಮಕ ಪರಿಣಾಮಗಳನ್ನು ಬೀರುತ್ತವೆ. ಇಂತಹ ಸಾಲಗಳನ್ನು ತೆಗೆದುಕೊಳ್ಳಬಾರದು. 

ಸಾಲದ ಜೊತೆಗೆ ಬರುವ ಸಮಸ್ಯೆಗಳು:  

ಸಾಲವು ನಿಮ್ಮ ಹಲವು ಅಗತ್ಯಗಳು ಆಸೆಗಳನ್ನು ಒದಗಿಸುವ ಕೆಲಸ ಮಾಡುತ್ತವೆ, ತಾತ್ಕಾಲಿಕ ಆರ್ಥಿಕ ನೆರವು ನೀಡುತ್ತವೆ. ಆದರೆ ಜೊತೆಗೆ ಪ್ರತಿಕೂಲತೆಗಳು ಸಹ ತರುತ್ತದೆ. ಸಾಲವನ್ನು ಸರಿಯಾಗಿ ನಿರ್ವಹಿಸದಿದ್ದರೆ ಅದು ಆರ್ಥಿಕ, ಮಾನಸಿಕ, ಸಾಮಾಜಿಕ ಸಂಕಷ್ಟಗಳಿಗೆ ಕಾರಣವಾಗುತ್ತದೆ.  ಅವುಗಳೇನೆಂದು ನೋಡೋಣ 

1. ಉಳಿತಾಯ ಕಡಿಮೆಯಾಗುತ್ತದೆ: ಸಾಲದ ಕಂತು ಪಾವತಿಸಲು ಆದಾಯದ ದೊಡ್ಡ ಭಾಗ 

    ಬಳಸಲ್ಪಡುವುದರಿಂದ ಉಳಿತಾಯ ಕಡಿಮೆಯಾಗುತ್ತದೆ.

2. ಹೂಡಿಕೆ ಮಾಡಲು ಸಾಧ್ಯವಾಗದಿರುವುದು: ಭವಿಷ್ಯದ ಜವಾಬ್ದಾರಿಗಳಿಗೆ, ಯೋಜನೆಗಳಿಗೆ, ಆರ್ಥಿಕ ಗುರಿಗಳಿಗೆ ಹೂಡಿಕೆ ಮಾಡುವುದು ಸಾಧ್ಯವಾಗದಿರಬಹುದು.

3. ಸಾಲದ ಬಲೆ: ಒಂದು ಸಾಲ ತೀರಿಸಲು ಮತ್ತೊಂದು ಸಾಲ ತೆಗೆದುಕೊಳ್ಳುವ ಪರಿಸ್ಥಿತಿ.

4. ಆಸ್ತಿ ಕಳೆದುಕೊಳ್ಳುವ ಅಪಾಯ: ಆಸ್ತಿ ಮೇಲಿನ ಸಾಲ ಅಥವಾ ಚಿನ್ನದ ಮೇಲಿನ ಸಾಲ 

    ತೀರಿಸಲಾಗದಿದ್ದರೆ ಆಸ್ತಿ ಕಳೆದುಕೊಳ್ಳುವ ಸಾಧ್ಯತೆಗಳು. 

5. ಮಾನಸಿಕ ಒತ್ತಡ: ದೊಡ್ಡ ಮೊತ್ತದ ಹಾಗೂ ದೀರ್ಘ ಕಾಲಿನ ಸಾಲದಿಂದಾಗಿ ಮಾನಸಿಕ ಒತ್ತಡ, ನೆಮ್ಮದಿಯ ಹಾಗೂ ಆತ್ಮವಿಶ್ವಾಸದ ಕೊರತೆ ಉಂಟಾಗಬಹುದು. 

6. ಕುಟುಂಬ ಕಲಹ: ಹಣದ ಕೊರತೆಯಿಂದ ಅಗತ್ಯ ಹಾಗೂ ಆಸೆಗಳಲ್ಲಿ ರಾಜಿಮಾಡಿಕೊಂಡು ಕುಟುಂಬದಲ್ಲಿ ಅಸಮಾಧಾನ, ಅಶಾಂತಿ ಹಾಗೂ ಘರ್ಷಣೆ ಉಂಟಾಗಬಹುದು. 

7. ಸಂಬಂಧಗಳಲ್ಲಿ ಒಡಕು: ಸಂಬಂಧಿಕರಲ್ಲಿ, ಸ್ನೇಹಿತರಲ್ಲಿ ಸಾಲದ ಪಾವತಿಯಲ್ಲಿ ಏರುಪೇರಾದರೆ ಸಂಬಂಧಗಳು ಒಡೆಯುವ ಅಥವಾ ಅಪನಂಬಿಕೆಯ ಸಾಧ್ಯತೆ.  

ಹೀಗೆ ಸಾಲವನ್ನು ಸರಿಯಾಗಿ ನಿರ್ವಹಿಸದೆ ಹೋದರೆ ಅನೇಕ ಪ್ರತಿಕೂಲ ಪರಿಣಾಮಗಳನ್ನು ಎದುರಿಸಬೇಕಾಗುತ್ತದೆ. ಇದರಿಂದ ಸಾಲ ಒಂದು ಹೊರೆಯಾಗಿ ಪರಿಣಮಿಸಿ ಮನಸ್ಸಿನ ನೆಮ್ಮದಿಯನ್ನು  ಹಾಳು  ಮಾಡಿ, ಮುಂದಿನ ದಿನಗಳಲ್ಲಿ ಆರ್ಥಿಕ ಬಿಕ್ಕ ಟ್ಟು ಸೃಷ್ಟಿಸಿ , ಕುಟುಂಬದ ಜೀವನ ಮಟ್ಟಕ್ಕೆ ಅಡ್ಡ ಪರಿಣಾಮ ಬೀರುತ್ತದೆ.

 

ಸಾಲವನ್ನು ತಪ್ಪಿಸುವುದು / ತಡೆಗಟ್ಟುವುದು  ಹೇಗೆ

     ಸಾಲದ ಮೂಲಕ ಎರವಲು ಪಡೆದ ಹಣ, ಕೆಲವು ಅಗತ್ಯಗಳು, ಆಸೆಗಳನ್ನು ಈಡೇರಿಸಬಹುದು ಆದರೆ ಅದು ಹೆಚ್ಚಿನ ಹೊರೆಯಾಗಿ ಅನೇಕ ವ್ಯತಿರಿಕ್ತ ಪರಿಣಾಮಗಳನ್ನು ಬೀರುತ್ತದೆ. ಆದುದರಿಂದ ನಾವು ನಮ್ಮ ಅವಶ್ಯಕತೆಗಳ, ಆಸೆಗಳ ಈಡೇರಿಕೆಗಾಗಿ ಬೇಕಾಗುವ ಹಣವನ್ನು ಒಂದು ಪ್ರಕ್ರಿಯೆಗೆ ಒಳಪಡಿಸಿ  ಸಮರ್ಥವಾಗಿ ಸಂಪಾದಿಸಿ, ಕೂಡಿಟ್ಟು, ಹೂಡಿಕೆಯಿಂದ ಹೆಚ್ಚಿನ ಹಣ ಗಳಿಸುವುದರ ಮೂಲಕ ಬೇಕಾದ ಸೇವೆಗಳನ್ನು, ಉತ್ಪನ್ನಗಳನ್ನು ಸ್ವಂತ ಹಣದಿಂದ ಪಡೆದರೆ, ಸಾಲ ಮಾಡುವ ಸಂದರ್ಭವು ಬರುವುದಿಲ್ಲ ಅದು ಹೇಗೆಂದು ಕೆಳಗೆ ನೋಡೋಣ.

1.   ಜವಾಬ್ದಾರಿಗಳು ಹಾಗೂ ಘಟ್ಟಗಳನ್ನು ಗುರುತಿಸಿ: ನಿಮ್ಮ ಜೀವನದ ಘಟ್ಟವನ್ನು ಗುರುತಿಸಿ ನಂತರ ನಿಮ್ಮ ಜೀವನದ ಪ್ರಮುಖ ಜವಾಬ್ದಾರಿಗಳು, ಅನಿವಾರ್ಯ ಕಾರ್ಯಗಳನ್ನು ಪಟ್ಟಿ ಮಾಡುತ್ತಾ ಹೋಗಿ.

ಉದಾಹರಣೆಗೆ: ಶಿಕ್ಷಣ, ಮನೆ ನಿರ್ಮಾಣ, ಮಕ್ಕಳ ಅಭಿವೃದ್ಧಿ, ನಿವೃತ್ತಿ

2. ಯೋಜನೆ ರೂಪಿಸಿ:  ಮುಂಬರುವ ಜವಾಬ್ದಾರಿಗಳನ್ನು ನಿಭಾಯಿಸಲು ನೀವು ಆ ಜವಾಬ್ದಾರಿಯನ್ನು  ಅರ್ಥಮಾಡಿಕೊಂಡು, ಆರ್ಥಿಕವಾಗಿ ಸಂಪನ್ಮೂಲಗಳ ಅವಶ್ಯಕತೆಗಳನ್ನು ಕ್ರೂಢೀಕರಿಸುವ ಬಗ್ಗೆ ಸ್ಪಷ್ಟ ಯೋಜನೆ ರೂಪಿಸಿ. 

3. ಆರ್ಥಿಕ ಗುರಿ: ಗುರಿ ತಲುಪುವ ಅವಧಿಯನ್ನು ಗುರುತಿಸಿ, ಅವಧಿಗೆ ತಕ್ಕಂತೆ ಉಳಿತಾಯ ಮತ್ತು ಹೂಡಿಕೆ ಗುರಿಗಳನ್ನು ನಿಗದಿ ಮಾಡಿ ಆರ್ಥಿಕ ಗುರಿಯನ್ನು ಹಮ್ಮಿಕೊಳ್ಳಿ.  

4. ಹಲವು ಅಕೌಂಟ್ ಗಳ ಬಳಕೆ: ಉಳಿತಾಯದ ಹಣ ಕೂಡಿಹಾಕಲು  ಹಲವು ಅಕೌಂಟ್ ಗಳನ್ನು ಬಳಸುವುದು ಉತ್ತಮ. ವಿವಿಧ ಎಫ್ ಡಿ ಗಳಲ್ಲಿ ವಿವಿಧ ಉದ್ದೇಶಗಳಿಗೆ ಹಣವನ್ನು ಗಂಟು ಕಟ್ಟುವುದು ಬುದ್ಧಿವಂತಿಕೆಯ ಕೆಲಸ.  

ಸಾಮಾನ್ಯವಾಗಿ ಸಾಲ ತೆಗೆದುಕೊಳ್ಳುವ ಕಾರಣಗಳೆಂದರೆ ಮನೆ ನಿರ್ಮಾಣ, ಕಾರ್, ದ್ವಿಚಕ್ರ ವಾಹನ ಕೊಳ್ಳುವುದು, ದುಬಾರಿ ಉತ್ಪನ್ನಗಳ ಮೊಬೈಲ್, ಟಿವಿ, ಫ್ರಿಡ್ಜ್ ಇತ್ಯಾದಿ. 

 

  ಹೀಗೆ ಗುರಿಗಳ ಮೂಲಕ ನಾವು ನಮ್ಮ ಖರ್ಚು ವೆಚ್ಚದ ಅವಶ್ಯಕತೆಗಳನ್ನು ಈಡೇರಿಸಿ ಕೊಂಡು ಸಾಲವನ್ನು ತಪ್ಪಿಸಬೇಕು. 

ಸಾಲ ಪಡೆಯುವ ಮುನ್ನ ಗಮನದಲ್ಲಿ ಇರಿಸಬೇಕಾದ ಅಂಶಗಳು:

    ಸಾಲವು ಕೆಲವೊಮ್ಮೆ ಅನಿವಾರ್ಯವಾಗಿರುತ್ತದೆ ಆದರೆ ಅನಿವಾರ್ಯವೆಂದು ನಾವು ಅದರ ವ್ಯತಿರಿಕ್ತ ಪರಿಣಾಮಗಳಿಂದ ರಕ್ಷಿಸಿ ಕೊಳ್ಳಬೇಕು. ಅದಕ್ಕಾಗಿ ಈ ಕೆಳಕಂಡ ಅಂಶಗಳನ್ನು ಗಮನದಲ್ಲಿ ಇರಿಸಬೇಕು.  

1. ಅಗತ್ಯಕ್ಕೆ ಮಾತ್ರ ಸಾಲ: ಸಾಲವನ್ನು ಕೇವಲ ಅಗತ್ಯಗಳಿಗೆ ಮಾತ್ರ ತೆಗೆದುಕೊಳ್ಳಿ 

2. ಬ್ಯಾಂಕ್ ಮತ್ತು ಸಾಲದ ಬಗ್ಗೆ ಮಾಹಿತಿ: ಬ್ಯಾಕ್ ಬಡ್ಡಿ ದರ, ಬಡ್ಡಿ ದರ ನಿಯಮಗಳು, ಮರು ಪಾವತಿಯ ನಿಯಮಗಳು, ಸಾಲ ಪ್ರಕ್ರಿಯೆ ಶುಲ್ಕ, ಕಾನೂನು ಮತ್ತು ಮೌಲ್ಯಮಾಪನ ಶುಲ್ಕ, MODT ಶುಲ್ಕ, ವಿಮಾ ಶುಲ್ಕ, GST ತೆರಿಗೆ ಹೀಗೆ  ಎಲ್ಲಾ ವಿಷಯಗಳ ಬಗ್ಗೆ ಮಾಹಿತಿ ಸಂಗ್ರಹಿಸಿ. 

3.  ಸುಲಭ ಮರು ಪಾವತಿ:  ಸಾಲದ ಮರುಪಾವತಿಯ ನಿಯಮಗಳು ಸುಲಭ ಮರುಪಾವತಿಗೆ ಅವಕಾಶ ಕೊಡುವಂತೆ ಇರಲಿ 

4. ಸಾಲದ ಕಂತಿನ ಮಿತಿ: ಸಾಲದ ಕಂತು ನಿಮ್ಮ ಆದಾಯದ ಶೇಕಡಾ 30% ಅನ್ನು ಮೀರಬಾರದು. 

5. ಸಾಲದ ಅವಧಿ: ಸಾಲದ ಅವಧಿ ಆದಷ್ಟು ಕಡಿಮೆ ಇರಲಿ, ಇದರಿಂದ ಬಡ್ಡಿ ಕಡಿಮೆಯಾಗಿ ಹಣದ  ಉಳಿತಾಯವಾಗುತ್ತದೆ. 

6. ಹೆಚ್ಚುವರಿ ಮರುಪಾವತಿಗೆ ಹಣ:  ಸಾಲದ ಹೊರೆ ತಪ್ಪಿಸಲು ಭಾಗಶಃ ಮರು ಪಾವತಿಗೆ ಪ್ರತ್ಯೇಕ ಬಜೆಟ್ ಎತ್ತಿಡಿ. 

 

ವೇಗವಾಗಿ ಸಾಲ ತೀರಿಸುವ ವಿಧಾನ:  

         ಸಾಲವನ್ನು ಹೆಚ್ಚು ದಿನ ಉಳಿಸಿಕೊಂಡು ಹೆಚ್ಚಿನ ಬಡ್ಡಿಯನ್ನು ಕೊಟ್ಟು ನಾವು ಸಂಪಾದಿಸಿದ ಹಣವನ್ನು ಬಡ್ಡಿಗೆ ಕಳೆದ ಕೊಳ್ಳಬೇಕಾಗುತ್ತದೆ. ಆದುದರಿಂದ ಆದಷ್ಟು ಬೇಗ ಸಾಲವನ್ನು ತೀರಿಸುವುದು ಬುದ್ಧಿವಂತಿಕೆ ಆಯ್ಕೆ. ಅದನ್ನು ಹೇಗೆ ಮಾಡಬೇಕೆಂದು ಈ ಕೆಳಗೆ ನೋಡೋಣ.

1. ಮೊಟ್ಟ ಮೊದಲನೆಯದಾಗಿ ಸಾಲದ ಕಂತು ನಿಮ್ಮ ಆದಾಯದ ಶೇಕಡ 30% ನ್ನು ದಾಟಬಾರದು. ಇದರಿಂದ ಬೇರೆ ಖರ್ಚುಗಳಿಗೆ ಹಣ ಇರುತ್ತದೆ. 

2. ಭಾಗಶಃ ಪೂರ್ವ ಪಾವತಿ ಮಾಡಲು ಶೇಕಡಾ 10% ರಷ್ಟು ಹಣವನ್ನು ನಿಮ್ಮ ಬಜೆಟ್ ನಲ್ಲಿ  ಮೀಸಲಿಡಬೇಕು.  

3. ಪ್ರತಿ ತಿಂಗಳು ಕಂತಿನ ಶೇಕಡಾ 10%  ಅಥವಾ ಯಾವುದೇ ಚಿಕ್ಕಪುಟ್ಟ ಭಾಗವನ್ನಾದರೂ  ನೇರವಾಗಿ ಪೂರ್ವ ಪಾವತಿ ಮಾಡಿ. 

4. ಸಾಲದ ಹೊರೆ ಹೆಚ್ಚು ಇದ್ದಲ್ಲಿ, Side hustle, freelance ಕೆಲಸ, consulting ಮೂಲಕ ಹೆಚ್ಚುವರಿ ಆದಾಯ ಗಳಿಸಿ. 

5. ಸಾಲದಿಂದ ತೀರಾ ಇಕ್ಕಟ್ಟಾದ ಪರಿಸ್ಥಿತಿ ಇದ್ದರೆ, ದಂಪತಿಗಳಿಬ್ಬರು ಸಂಪಾದನೆ ಮಾಡುವುದು ಉತ್ತಮವಾದ ಮಾರ್ಗ. 

ಸಾಲ ಮರು ಪಾವತಿಸಲು ಎರಡು ವಿಧಾನಗಳನ್ನು ಆರ್ಥಿಕ ತಜ್ಞರು ರೂಪಿಸಿ ಸಲಹೆಯನ್ನು ಇಟ್ಟಿದ್ದಾರೆ. ಅವು ಈ ಕೆಳಕಂಡಂತೆ ಇವೆ. ಅವುಗಳೆಂದರೆ 

1. Debt Snowball ವಿಧಾನ

2. Debt Avalanche ವಿಧಾನ

  ಇವುಗಳು ಏನೆಂದು ವಿವರಣೆಯೊಂದಿಗೆ ತಿಳಿಯೋಣ.  

Debt Snowball ವಿಧಾನ:  

    ಮೊಟ್ಟಮೊದಲನೆಯದಾಗಿ Snowball ಹೇಗೆ ಆಗುತ್ತದೆ ಎಂಬುದನ್ನು ತಿಳಿಯೋಣ. ಒಂದು ಮಂಜಿನ ಉಂಡೆಯನ್ನು ಬೆಟ್ಟದ ಮೇಲಿನಿಂದ ಉರುಳಿ ಬಿಟ್ಟರೆ, ಅದು ಸುತ್ತುತ್ತ ಇನ್ನು ಹೆಚ್ಚಿನ ಮಂಜನ್ನು ಸೇರಿಸುತ್ತಾ ದೊಡ್ಡ ಉಂಡೆಯಾಗಿ ಬದಲಾಗುತ್ತದೆ, ಅಂದರೆ ಚಿಕ್ಕದರಿಂದ ದೊಡ್ಡದು. ಇದು Debt Snowball. 

   ಒಂದು ವೇಳೆ ನಿಮಗೆ ಹಲವಾರು ಸಾಲಗಳು ಇದ್ದಲ್ಲಿ, Debt Snowball ವಿಧಾನ ಉಪಯೋಗಿಸಬಹುದು. ಇದರಲ್ಲಿ ನೀವು ಕಡಿಮೆ ಮೊತ್ತದ ಸಾಲವನ್ನು ಮೊದಲಾಗಿಸಿ ಸಾಲಗಳನ್ನು ಒಂದೊಂದಾಗಿ ತೀರಿಸುತ್ತಾ ಬರಬೇಕು. ಉದಾಹರಣೆಗೆ ನಿಮಗೆ 50 ಸಾವಿರ, 2 ಲಕ್ಷದ, 30 ಲಕ್ಷದ ಒಟ್ಟು 3 ಸಾಲ ಗಳಿದ್ದಲ್ಲಿ, ನೀವು ಸಣ್ಣ ಮೊತ್ತದ 50 ಸಾವಿರ ರೂಪಾಯಿಯ ಸಾಲವನ್ನು ಮೊದಲು ಪಾವತಿಸಬೇಕು ನಂತರ ಹೆಚ್ಚಿನ ಮೊತ್ತದ ಹಣವನ್ನು ಗುರಿಯಾಗಿಸಬೇಕು. ಅಂದರೆ ಚಿಕ್ಕದರಿಂದ ದೊಡ್ಡ ಸಾಲವನ್ನು ಮರು ಪಾವತಿಸುತ್ತಾ ಹೋಗುವುದು.

    ಇದರಿಂದ ಸಾಲಗಳ ಸಂಖ್ಯೆ ಬೇಗನೆ ತೀರುತ್ತ ನಿಮ್ಮ ಆತ್ಮವಿಶ್ವಾಸ ಹೆಚ್ಚುತ್ತದೆ, ಹಾಗೂ ಒಂದು ವಿಧಾನ ಅಳವಡಿಸುವುದರಿಂದ ಸಾಲ ತೀರಿಸುವ ಸ್ಪಷ್ಟತೆ ನಿಮಗೆ ಮರು ಪಾವತಿಗೆ ನಿಶ್ಚಿತ ರೂಪ ಕೊಡುತ್ತದೆ.

 

Debt Avalanche ವಿಧಾನ:

      ಮೊಟ್ಟಮೊದಲನೆಯದಾಗಿ Avalanche ಎಂದರೇನು ಎಂಬುದನ್ನು ತಿಳಿಯೋಣ. Avalanche ಎಂದರೆ ಹಿಮಕುಸಿತ, ಅಂದರೆ ಪರ್ವತ ತುದಿಯಲ್ಲಿ ಅಪಾರ ಹಿಮರಾಶಿಯ ಸೇರಿದ್ದು, ಒಮ್ಮೆಲೇ ಆ ಹಿಮರಾಶಿ ಕುಸಿದು, ಪರ್ವತದ ಕೆಳಗೆ ಜಾರಿ ಆ ಹಿಮವು ಹಂಚಿ ಹೋಗಿ ಆ ರಾಶಿಯು ಚಿಕ್ಕದಾಗುತ್ತದೆ ಇದೆ Avalanche

     ಒಂದು ವೇಳೆ ನಿಮಗೆ ಹಲವಾರು ಸಾಲಗಳು ಇದ್ದಲ್ಲಿ, Debt Avalanche ವಿಧಾನ ಉಪಯೋಗಿಸಬಹುದು. ಇದರ ಪ್ರಕಾರ ದೊಡ್ಡ ಬಡ್ಡಿದರದ ಸಾಲವನ್ನು ಮೊದಲಾಗಿಸಿ ಸಾಲಗಳನ್ನು ಒಂದೊಂದಾಗಿ ಮರುಪಾವತಿಸಿ ತೀರಿಸುತ್ತಾ ಬರುವುದು. ಉದಾಹರಣೆಗೆ ನಿಮ್ಮ ಬಳಿ 3 ಸಾಲಗಳಿದ್ದು ಒಂದು ಸಾಲಕ್ಕೆ 10.5 % ಬಡ್ಡಿ ದರವಿದ್ದು, ಎರಡನೆಯದಕ್ಕೆ 9.5% ಬಡ್ಡಿ ದರ ಹಾಗೂ ಮೂರನೆಯದಕ್ಕೆ 8.25% ಬಡ್ಡಿ ದರ ವಿದ್ದಲ್ಲಿ, ನೀವು ಅತಿ ಹೆಚ್ಚು ಬಡ್ಡಿ ದರ ವಿರುವ ಸಾಲವನ್ನು ಮೊದಲು ತೀರಿಸಿ. ಅದಕ್ಕಿಂತಲೂ ಕಡಿಮೆ ಬಡ್ಡಿ ದರದ ಸಾಲವನ್ನು ಇಳಿಮುಖದ ದರದಲ್ಲಿ ತೀರಿಸುತ್ತಾ ಬರಬೇಕು ಇದು  Debt Avalanche ವಿಧಾನ. 

    ಈ ವಿಧಾನದಿಂದ ಬಡ್ಡಿ ಕಟ್ಟುವ ಹಣದ ಉಳಿತಾಯವಾಗುತ್ತದೆ. ಹೆಚ್ಚಿನ ಬಡ್ಡಿ ದರದ 

ಸಾಲವನ್ನು ಮೊದಲು ತೀರಿಸುತ್ತಾ ಬರುವುದರಿಂದ ಹೆಚ್ಚಿನ ಬಡ್ಡಿ ಕಟ್ಟುವುದನ್ನು ತಪ್ಪಿಸಿ ಹಣದ ಉಳಿತಾಯವನ್ನು ಈ ವಿಧಾನದ ಮೂಲಕ ಮಾಡಬಹುದು. 

   

ವಿವಿಧ ರೀತಿಯ ಸಾಲಗಳು:     

1. ಕೈ ಸಾಲ: ತುರ್ತು ಅವಶ್ಯಕತೆಗಳಿಗೆ ಕುಟುಂಬ ಅಥವಾ ಸ್ನೇಹಿತರಿಂದ ಹಣ ಪಡೆಯುವುದು. ಕೈ ಸಾಲಕ್ಕೆ ಬಡ್ಡಿ ಇರುವುದಿಲ್ಲ, ವೈಯಕ್ತಿಕ ಸಂಬಂಧಗಳ ಆಧಾರದ ಮೇಲೆ ತೆಗೆದುಕೊಳ್ಳುವ ಸಾಲ. ಸಂಬಂಧಗಳ ಆಧಾರದ ಮೇಲೆ ನಂಬಿಕೆ ಇಡಲಾಗುತ್ತದೆ ಹಾಗೂ ಆರ್ಥಿಕ ವ್ಯವಹಾರ ಜರುಗುತ್ತದೆ. ಇದರಲ್ಲಿ ಪತ್ರಗಳ ವ್ಯವಹಾರ ಇರುವುದಿಲ್ಲ.  

2. ಸುರಕ್ಷಿತ ಸಾಲಗಳು (ಮೇಲಾಧಾರದ ಬೆಂಬಲದೊಂದಿಗೆ) 

ಗೃಹ ಸಾಲಗಳು: ಆಸ್ತಿಯನ್ನು ಖರೀದಿಸಲು, ನಿರ್ಮಿಸಲು ಅಥವಾ ನವೀಕರಿಸಲು ಬಳಸಲಾಗುವ ದೀರ್ಘಾವಧಿಯ ಸಾಲಗಳು, ಅಲ್ಲಿ ಆಸ್ತಿಯು ಮೇಲಾಧಾರವಾಗಿ ಕಾರ್ಯನಿರ್ವಹಿಸುತ್ತದೆ. 

ವಾಹನ ಸಾಲಗಳು: ದ್ವಿಚಕ್ರ ವಾಹನಗಳು ಅಥವಾ ನಾಲ್ಕು ಚಕ್ರಗಳ ವಾಹನಗಳನ್ನು ಖರೀದಿಸಲು ನಿರ್ದಿಷ್ಟ ಸಾಲಗಳು, ಅಲ್ಲಿ ಸಾಲವನ್ನು ಸಂಪೂರ್ಣವಾಗಿ ಮರುಪಾವತಿಸುವವರೆಗೆ ವಾಹನವು ಭದ್ರತೆಯಾಗಿ ಕಾರ್ಯನಿರ್ವಹಿಸುತ್ತದೆ. 

ಚಿನ್ನದ ಸಾಲಗಳು: ಹಣಕ್ಕೆ ಬದಲಾಗಿ ನೀವು ಚಿನ್ನದ ಆಭರಣಗಳು ಅಥವಾ ನಾಣ್ಯಗಳನ್ನು ಒತ್ತೆ ಇಡುವ ತ್ವರಿತ ಪ್ರವೇಶ ಸಾಲಗಳು. 

ಸ್ಥಿರ ಠೇವಣಿಗಳ ಮೇಲೆ ಸಾಲ (FD) / ಭದ್ರತೆಗಳು: ನಿಮ್ಮ FD, ಮ್ಯೂಚುಯಲ್ ಫಂಡ್‌ಗಳು ಅಥವಾ ಷೇರುಗಳನ್ನು ಬೆಂಬಲವಾಗಿ ಬಳಸಿಕೊಂಡು ನಿಮ್ಮ ಹೂಡಿಕೆಗಳನ್ನು ಮುರಿಯದೆ ಹಣವನ್ನು ಎರವಲು ಪಡೆಯಲು ನಿಮಗೆ ಅನುಮತಿಸುತ್ತದೆ.

  

3. ಅಸುರಕ್ಷಿತ ಸಾಲಗಳು (ಕ್ರೆಡಿಟ್ ಮತ್ತು ಆದಾಯದ ಆಧಾರದ ಮೇಲೆ) 

ವೈಯಕ್ತಿಕ ಸಾಲಗಳು: ಯಾವುದೇ ಮೇಲಾಧಾರ ಅಗತ್ಯವಿಲ್ಲದ ಬಹುಮುಖ ಸಾಲಗಳು. ವೈದ್ಯಕೀಯ ತುರ್ತು ಪರಿಸ್ಥಿತಿಗಳು, ಪ್ರಯಾಣ, ಮದುವೆಗಳು ಅಥವಾ ಸಾಲ ಕ್ರೋಢೀಕರಣದಂತಹ ವಿವಿಧ ವೈಯಕ್ತಿಕ ವೆಚ್ಚಗಳಿಗೆ ಅವುಗಳನ್ನು ಬಳಸಬಹುದು. 

ಶಿಕ್ಷಣ ಸಾಲಗಳು: ಭಾರತದಲ್ಲಿ ಅಥವಾ ವಿದೇಶಗಳಲ್ಲಿ ಉನ್ನತ ಅಧ್ಯಯನಗಳಿಗೆ ಹಣಕಾಸು ಒದಗಿಸಲು ವಿನ್ಯಾಸಗೊಳಿಸಲಾಗಿದೆ, ಬೋಧನೆ, ಪ್ರಯಾಣ ಮತ್ತು ಜೀವನ ವೆಚ್ಚಗಳನ್ನು ಒಳಗೊಂಡಿರುತ್ತದೆ. ಅವರು ಸಾಮಾನ್ಯವಾಗಿ ಕೋರ್ಸ್ ಮುಗಿದ ನಂತರ ಮರುಪಾವತಿ ಪ್ರಾರಂಭವಾಗುವ ನಿಷೇಧದ ಅವಧಿಯನ್ನು ನೀಡುತ್ತಾರೆ. 

ಕ್ರೆಡಿಟ್ ಕಾರ್ಡ್ ಸಾಲಗಳು: ಅಲ್ಪಾವಧಿಯ ಅಸುರಕ್ಷಿತ ಕ್ರೆಡಿಟ್ ನಿಮಗೆ ದೊಡ್ಡ ಖರೀದಿಗಳನ್ನು ಸುಲಭ ಮಾಸಿಕ ಕಂತುಗಳಾಗಿ (EMI) ಪರಿವರ್ತಿಸಲು ಅನುವು ಮಾಡಿಕೊಡುತ್ತದೆ.

4. ವ್ಯಾಪಾರ ಸಾಲಗಳು 

ಕಾರ್ಯನಿರತ ಬಂಡವಾಳ ಸಾಲಗಳು: ವ್ಯವಹಾರದಲ್ಲಿ ದೈನಂದಿನ ಕಾರ್ಯಾಚರಣೆ ವೆಚ್ಚಗಳು, ದಾಸ್ತಾನು ಅಥವಾ ನಗದು ಹರಿವಿನ ಏರಿಳಿತಗಳನ್ನು ನಿರ್ವಹಿಸಲು ಬಳಸಲಾಗುತ್ತದೆ.

ವ್ಯಾಪಾರ ವಿಸ್ತರಣಾ ಸಾಲಗಳು: ಉದ್ಯಮಿಗಳು ತಮ್ಮ ಕಾರ್ಯಾಚರಣೆಗಳನ್ನು ಅಳೆಯಲು, ಹೊಸ ಉಪಕರಣಗಳನ್ನು ಖರೀದಿಸಲು ಅಥವಾ ಹೊಸ ಸ್ಥಳಗಳಿಗೆ ವಿಸ್ತರಿಸಲು ಸಹಾಯ ಮಾಡಲು ಸುರಕ್ಷಿತ ಅಥವಾ ಅಸುರಕ್ಷಿತವಾಗಿ ನೀಡಲಾಗುತ್ತದೆ.

  

 5. ಗ್ರಾಹಕರ ಸಾಲಗಳು : ಎಲೆಕ್ಟ್ರಾನಿಕ್ಸ್ ಮತ್ತು ಗೃಹೋಪಯೋಗಿ ಉಪಕರಣಗಳನ್ನು (ಉದಾ. ಟೆಲಿವಿಷನ್‌ಗಳು, ಲ್ಯಾಪ್‌ಟಾಪ್‌ಗಳು ಅಥವಾ ಸ್ಮಾರ್ಟ್‌ಫೋನ್‌ಗಳು) ಖರೀದಿಸಲು ನಿಮಗೆ ಸಹಾಯ ಮಾಡಲು ನಿರ್ದಿಷ್ಟವಾಗಿ ಅಲ್ಪಾವಧಿಯ ಹಣಕಾಸು.

       

ಆರ್ಥಿಕ ಗುರಿಗಳು

ಆರ್ಥಿಕ ಗುರಿಗಳು 

     ಮನುಷ್ಯನ ಜೀವನವು ಹುಟ್ಟಿನಿಂದ ಸಾವಿನವರೆಗೂ ಅನೇಕ ಸಂದರ್ಭಗಳು ಮತ್ತು ಘಟ್ಟಗಳಿಂದ ಕೂಡಿದೆ. ಪ್ರತಿಯೊಂದು ಹಂತವೂ ತನ್ನದೇ ಆದ ಆರ್ಥಿಕ ಹೊರೆಗಳನ್ನು ತರುತ್ತದೆ. ನಾವು ಗಮನಿಸಿದರೆ, ಜೀವನದ ಕಾಲಮಾನದಲ್ಲಿ ಎದುರಾಗುವ ಪ್ರಮುಖ ಘಟನೆಗಳು — ಉನ್ನತ ಶಿಕ್ಷಣ, ನಿಶ್ಚಿತಾರ್ಥ ಮತ್ತು ವಿವಾಹ, ಹೊಸ ಕುಟುಂಬಕ್ಕೆ ಮನೆ, ಸೀಮಂತ ಮತ್ತು ಹೆರಿಗೆ, ನಾಮಕರಣ, ಮಗುವಿನ ಹುಟ್ಟುಹಬ್ಬ, ವಾಹನ ಖರೀದಿ (ಸ್ಕೂಟರ್, ಕಾರು), ಸ್ವಂತ ಮನೆ ನಿರ್ಮಾಣ, ನಿವೃತ್ತಿ ಪಿಂಚಣಿ, ಆರ್ಥಿಕ ಸಂಕಷ್ಟಗಳು, ಅನಾರೋಗ್ಯ, ಹಾಗೂ ಪೂಜೆ-ಹಬ್ಬಗಳು — ಇವೆಲ್ಲವೂ ದೊಡ್ಡ ಮಟ್ಟದ ಖರ್ಚುಗಳನ್ನು ಮುಂದಿರಿಸುತ್ತವೆ.

ಈ ಖರ್ಚುಗಳನ್ನು ನಿಭಾಯಿಸುವುದು ಕೇವಲ ಆಯ್ಕೆಯಲ್ಲ, ಅದು ನಮ್ಮ ಅನಿವಾರ್ಯ ಕರ್ತವ್ಯ ಮತ್ತು ಗುರಿ. ಆದ್ದರಿಂದ, ಇಂತಹ ದೊಡ್ಡ ಮೊತ್ತದ ವೆಚ್ಚಗಳನ್ನು ಹೇಗೆ ಯೋಜಿಸಿ, ಕಾರ್ಯತತ್ಪರವಾಗಿ ನಿಭಾಯಿಸಬೇಕು ಎಂಬುದನ್ನು ತಿಳಿದುಕೊಳ್ಳುವುದು ಅತ್ಯಂತ ಮುಖ್ಯ.

ಪೂರ್ವಸಿದ್ಧತೆ ಮತ್ತು ಪ್ರಜ್ಞೆ:

ಜೀವನದಲ್ಲಿ ಈ ಹಂತಗಳು ಹೊಸದಲ್ಲ. ನಾವು ಪ್ರತಿದಿನ ನಮ್ಮ ಸುತ್ತಮುತ್ತಲಿನ ಜಗತ್ತಿನಲ್ಲಿ ಇಂತಹ ಘಟನೆಗಳನ್ನು ನೋಡುತ್ತೇವೆ, ಕೇಳುತ್ತೇವೆ. ನಮ್ಮ ಜೀವನದಲ್ಲೂ ಅವು ಬರುವುದನ್ನು ಅರಿತಿದ್ದೇವೆ. ಆದ್ದರಿಂದ, ಇದು ಕೇವಲ ಸಾಮಾನ್ಯ ಪ್ರಜ್ಞೆ ಮಾತ್ರವಲ್ಲ, ಆರ್ಥಿಕ ಪೂರ್ವಸಿದ್ಧತೆ ಅಗತ್ಯವಿರುವ ವಿಷಯ.

• ಘಟನೆಗಳನ್ನು ಗುರುತಿಸುವುದು: ಜೀವನದಲ್ಲಿ ಎದುರಾಗುವ ಪ್ರಮುಖ ಹಂತಗಳನ್ನು ಸ್ಪಷ್ಟವಾಗಿ ಗುರುತಿಸಬೇಕು.

• ಗುರಿಗಳಾಗಿ ಪರಿಗಣಿಸುವುದು: ಇವುಗಳನ್ನು ಕೇವಲ ಸಂದರ್ಭಗಳೆಂದು ನೋಡದೆ, ಆರ್ಥಿಕ ಗುರಿಗಳಾಗಿ ಪರಿಗಣಿಸಬೇಕು.

• ಪೂರ್ವಸಿದ್ಧತಾ ಕಾರ್ಯಕ್ರಮ: ಪ್ರತಿಯೊಂದು ಹಂತಕ್ಕೂ ಮುಂಚಿತವಾಗಿ ಯೋಜನೆ ರೂಪಿಸಿ, ಸಂಪನ್ಮೂಲಗಳನ್ನು ಒಗ್ಗೂಡಿಸಿ, ಕಾರ್ಯಪ್ರವೃತ್ತರಾಗಬೇಕು.

ಮುನ್ಸೂಚನೆ ಮತ್ತು ಅಂದಾಜು ವೆಚ್ಚ:

    ಕೆಲವೊಮ್ಮೆ ಕೆಲವು ದುಬಾರಿ ಖರ್ಚುಗಳು ಬರುವುದಕ್ಕಿಂತ ಮೊದಲು ಮುನ್ಸೂಚನೆಯನ್ನು ಕೊಡುತ್ತದೆ. ಉದಾಹರಣೆಗೆ ಕಾರು, ಸ್ಕೂಟರ್ ತುಂಬಾ ದುರಸ್ತಿಗೆ ಬರುತ್ತದೆ, ಅದಕ್ಕೆ ವಯಸ್ಸು ಆಗುತ್ತಿದೆ ಹೀಗಿದ್ದಾಗ ನಾವು ಹೊಸ ಕಾರು, ಸ್ಕೂಟರನ್ನು ಕೊಂಡುಕೊಳ್ಳುವ ಸಂದರ್ಭ ಕೆಲವು ದಿನಗಳಲ್ಲಿ ಒದಗಿ ಬರಬಹುದು ಎಂದು ಅಂದಾಜಿಸಬಹುದು. ಇದರಿಂದ ನಾವು ಒಂದು ಆರ್ಥಿಕ ಗುರಿಯನ್ನು ಹಮ್ಮಿಕೊಳ್ಳಬಹುದು.  

   ಇದೇ ರೀತಿಯಲ್ಲಿ ಮನೆ ಕಟ್ಟಡ, ಮನೆಯಲ್ಲಿರುವ ಪರಿಕರಗಳು, ಜನರ ಆರೋಗ್ಯ ಇವುಗಳಲ್ಲಿ ಏನಾದರೂ ಸಮಸ್ಯೆಯ ಲಕ್ಷಣಗಳು ಕಂಡು ಬಂದರೆ ಮುಂದಿನ ದಿನಗಳಲ್ಲಿ ದೊಡ್ಡ ದುರಸ್ತಿ, ಖರೀದಿ ಅಥವಾ ದೊಡ್ಡ ವೆಚ್ಚದ ಚಿಕಿತ್ಸೆಗಳು ಬರಬಹುದು ಎಂದು ಅಂದಾಜಿಸಿ ಮುಂಜಾಗ್ರತ ಕ್ರಮವಾಗಿ ಆರ್ಥಿಕ ಗುರಿಗಳನ್ನು ಹಮ್ಮಿಕೊಳ್ಳಬೇಕು. 

  ಆರ್ಥಿಕ ಗುರಿಗಳನ್ನು ಇಡುವ ಮೊದಲು ನಾವು ಆ ಖರ್ಚುಗಳ ಬಗ್ಗೆ ಸಂಶೋಧನೆ ಮಾಡಬೇಕು ಅಂದರೆ ಅದಕ್ಕೆ ಬೇಕಾಗುವ ಸಾಮಾಗ್ರಿಗಳ ಖರ್ಚು, ಕಾರ್ಮಿಕರ ಖರ್ಚು, ಸಾರಿಗೆ ಖರ್ಚು ಹೀಗೆ ಸಂಶೋಧನೆ ನಡೆಸಿ ಒಂದು ಅಂದಾಜು ವೆಚ್ಚ ಮಾಡಬೇಕು ಸಾಧ್ಯವಾದರೆ ಅದಕ್ಕೆ ಹೆಚ್ಚುವರಿಯಾಗಿ ಶೇಕಡಾ 10 ರಷ್ಟು ಹಣವನ್ನು ಸೇರಿಸಿ ಒಂದು ಮೊತ್ತವನ್ನು ನಿರ್ಧರಿಸಬೇಕು. ಆ ಮೊತ್ತವೇ ನಿಮ್ಮ ಆರ್ಥಿಕ ಗುರಿಯಾಗಿರುತ್ತದೆ. ನಂತರ ಅದನ್ನು ಸಾಧಿಸಲು ಮಾಸಿಕ ಕಂತು, ಆಯ್ಕೆ ಮಾಡುವ ಸಾಧನ ಹಾಗೂ ಕಾಲಾವಧಿಯನ್ನು ನಿರ್ಧರಿಸಬೇಕು. 

ಆರ್ಥಿಕ ಗುರಿಗಳ ವರ್ಗೀಕರಣ ಮತ್ತು ಯೋಜನೆ: 

ಜೀವನದ ವಿವಿಧ ಹಂತಗಳಲ್ಲಿ ಎದುರಾಗುವ ಆರ್ಥಿಕ ಗುರಿಗಳನ್ನು ಸಾಧಿಸಲು ಅವುಗಳನ್ನು ಸಮಯಾವಧಿ ಆಧಾರಿತವಾಗಿ ಮೂರು ವರ್ಗಗಳಲ್ಲಿ ವಿಂಗಡಿಸಬಹುದು:

1. ಅಲ್ಪಾವಧಿಯ ಆರ್ಥಿಕ ಗುರಿಗಳು

2. ಮಧ್ಯಾವಧಿಯ ಆರ್ಥಿಕ ಗುರಿಗಳು

3. ದೀರ್ಘಾವಧಿಯ ಆರ್ಥಿಕ ಗುರಿಗಳು

ಪ್ರತಿಯೊಂದು ಗುರಿಯನ್ನು ರೂಪಿಸುವಾಗ ಈ ಕೆಳಗಿನ ಅಂಶಗಳನ್ನು ಸ್ಪಷ್ಟವಾಗಿ ಗುರುತಿಸಬೇಕು:

• ಗುರಿಯ ಹೆಸರು

• ತಿಂಗಳ ಹೂಡಿಕೆಯ ಮೊತ್ತ

• ಸಾಧಿಸಬೇಕಾದ ಒಟ್ಟು ಹಣದ ಮೊತ್ತ

• ಬಳಸುವ ಆರ್ಥಿಕ ಸಾಧನ

• ಗುರಿ ಸಾಧಿಸುವ ಕಾಲಾವಧಿ

• ಗುರಿ ಸಾಧಿಸಬೇಕಾದ ನಿಖರ ದಿನಾಂಕ

1. ಅಲ್ಪಾವಧಿಯ ಆರ್ಥಿಕ ಗುರಿಗಳು (1–3 ವರ್ಷ)

ಈ ವರ್ಗದಲ್ಲಿ ಒಂದರಿಂದ ಮೂರು ವರ್ಷಗಳೊಳಗೆ ಸಾಧಿಸಬಹುದಾದ ಗುರಿಗಳು ಬರುತ್ತವೆ.

• ಉದಾಹರಣೆಗಳು: ದುಬಾರಿ ಉತ್ಪನ್ನಗಳ ಖರೀದಿ ಅಥವಾ ದುರಸ್ತಿ, ತುರ್ತು ನಿಧಿ (Emergency Fund), ಚಿಕ್ಕ ಸಾಲದ ಮರುಪಾವತಿ, ಮಕ್ಕಳ ಶಾಲಾ ಶುಲ್ಕ, ವಿಮೆ ಪ್ರೀಮಿಯಂ ಪಾವತಿ, ಪೂಜೆಗಳು ಮತ್ತು ಕುಟುಂಬ ಸಮಾರಂಭಗಳು.

• ಹೂಡಿಕೆ ಸಾಧನಗಳು:

  • ಬ್ಯಾಂಕ್ ರಿಕರಿಂಗ್ ಡೆಪಾಸಿಟ್ ( ಆರ್ ಡಿ )

  • ಅಲ್ಪಾವಧಿಯ ಮ್ಯೂಚುಯಲ್ ಫಂಡ್ SIP

2. ಮಧ್ಯಾವಧಿಯ ಆರ್ಥಿಕ ಗುರಿಗಳು (3–10 ವರ್ಷ)

ಈ ವರ್ಗದಲ್ಲಿ ಮೂರು ವರ್ಷಗಳಿಂದ ಹತ್ತು ವರ್ಷಗಳೊಳಗೆ ಸಾಧಿಸಬಹುದಾದ ಗುರಿಗಳು ಬರುತ್ತವೆ.

• ಉದಾಹರಣೆಗಳು: ವಿವಾಹ ವೆಚ್ಚ, ಮನೆ ಅಥವಾ ನಿವೇಶನ corpus (down payment), ಕಾರು ಖರೀದಿ, ದೇಶ/ವಿದೇಶ ಪ್ರವಾಸ, ವ್ಯಾಪಾರ ಅಥವಾ ವ್ಯವಹಾರದ ಆರಂಭ.

• ಹೂಡಿಕೆ ಸಾಧನಗಳು:

  • ಮ್ಯೂಚುಯಲ್ ಫಂಡ್ SIP

  • ಬ್ಯಾಂಕ್ ರಿಕರಿಂಗ್ ಡೆಪಾಸಿಟ್ ( ಆರ್ ಡಿ )

  • ಬ್ಯಾಂಕ್ ಫಿಕ್ಸೆಡ್ ಡೆಪಾಸಿಟ್ ( ಎಫ್ ಡಿ )

3. ದೀರ್ಘಾವಧಿಯ ಆರ್ಥಿಕ ಗುರಿಗಳು (10–30 ವರ್ಷ)

ಈ ವರ್ಗದಲ್ಲಿ ಹತ್ತು ವರ್ಷಗಳಿಂದ ಮೂವತ್ತು ವರ್ಷಗಳೊಳಗೆ ಸಾಧಿಸಬಹುದಾದ ಗುರಿಗಳು ಬರುತ್ತವೆ.

• ಉದಾಹರಣೆಗಳು: ನಿವೃತ್ತಿ ನಿಧಿ, ಮಕ್ಕಳ ಉನ್ನತ ವಿದ್ಯಾಭ್ಯಾಸ , ಗೃಹ ಸಾಲದ ಮರುಪಾವತಿ.

• ಹೂಡಿಕೆ ಸಾಧನಗಳು:

  • ಇಕ್ವಿಟಿ ಮ್ಯೂಚುಯಲ್ ಫಂಡ್ 

  • ಉದ್ಯೋಗಿ ಭವಿಷ್ಯ ನಿಧಿ ( ಇಪಿಎಫ್ )

  • ಸಾರ್ವಜನಿಕ ಭವಿಷ್ಯ ನಿಧಿ ( ಪಿಪಿಎಫ್ )

  • ನ್ಯಾಷನಲ್ ಪೆನ್ಶನ್ ಸಿಸ್ಟಮ್ (ಎನ್ ಪಿ ಎಸ್)

  • ಜೀವ ವಿಮೆಯ ಆನ್ಯೂಟಿ ಪ್ಲಾನ್ಸ್

  • ಸಿಸ್ಟಮ್ಯಾಟಿಕ್ ವಿತ್ ಡ್ರಾವಲ್ ಪ್ಲಾನ್ ( ಎಸ್ ಡಬ್ಲ್ಯೂ ಪಿ )