ಒಗ್ಗಟ್ಟು

             ಒಗ್ಗಟ್ಟು
 
      ನನ್ನ ಮನದೊಳು ಮೂಡಿದ ಆಶ್ಚರ್ಯವಿದು
      ನಮ್ಮವರೇ ಕೊಡುವ ಲಘು ಆಘಾತವಿದು

      ಬೆಂಗಳೂರೆಂಬ ಕನ್ನಡಿಗರ ರಾಜಧಾನಿಯಲಿ
      ಕಾಣುತಿದೆ ಕನ್ನಡಿಗರ ಭಾಷಾ ನಿರಭಿಮಾನ

      ನನ್ನ ಕನ್ನಡಾಭಿಮಾನವೇ ಅಸಹಜ ಹಾಗೂ
      ಅಪರೂಪದ್ದೇ ಎಂದೆನಿಸುವಷ್ಟು ಅನುಮಾನ

      ಒಗ್ಗಟ್ಟು ಮೂಡಿಸಲು ಕೊಡರು ಪ್ರೋತ್ಸಾಹ
      ಆಸಕ್ತರಿಗೂ ಹರಡುವರು ತಮ್ಮ ನಿರುತ್ಸಾಹ

       ಸರಳ ಕನ್ನಡದ ಸುಖ ಬೇಡವೇ ನಿಮಗೆ
       ಸಹಜತೆಯಲ್ಲೇ ಸಂತಸವಲ್ಲವೇ ನಮಗೆ

      ಕನ್ನಡವ ಬಳಸಲು ಪಡಬೇಡಿ ಕೀಳರಿಮೆ
      ನಮ್ಮಲ್ಲೇ ಪರರ ಮೆಚ್ಚಿಸಿ ಪಡದಿರಿ ಗರಿಮೆ

      ಕನ್ನಡದ ಮೇಲೆ ಸದಾ ಇರಲಿ ಅಭಿಮಾನ
      ಕನ್ನಡದಲ್ಲೇ ಅಡಗಿದೆ ನಮ್ಮ ಸ್ವಾಭಿಮಾನ

      ಮುಂದೆ ಬಾರದಿರಲು ನಮ್ಮಲ್ಲಿ ಮುಗ್ಗಟ್ಟು
      ಕನ್ನಡಿಗರ ಹೃದಯದಲಿ ಮೂಡಲಿ ಒಗ್ಗಟ್ಟು

       - ತೇಜಸ್ವಿ. ಎ. ಸಿ

ನಸು ನಗು

 ನಸು ನಗು

  ಕಿಸಕ್ಕನೆ ಸುಖಾಸುಮ್ಮನೆ ನಗುವ ನನ್ನ ನೋಡಿ
  ನನ್ನವಳು ಕೇಳುವ ಪ್ರಶ್ನೆಗೆ ಉತ್ತರ ಕೊಡಲಾಗದೆ
  ನನ್ನ ಮನದೊಳ ಹರಿವ ಅಸಂಖ್ಯಾತ ಲೋಕಗಳ
  ವಿವರವ ನೀಡಲು, ಅವು ಅತಿ ಖಾಸಗಿಯಾಗಿ  
  ಮತ್ತೊಮ್ಮೆ ಅವಳ ಮುಖ ನೋಡಿ ನಸು ನಕ್ಕೆ.

  ಕ್ಷಣ ಕ್ಷಣಕೂ ಬದಲಾಗುವ ನನ್ನೊಳಗಿನ ಲೋಕ
  ಗಾಳಿಯಂತೆ ಬಂದು ಹರಿದಾಡಿ, ಅನುಭವವಿತ್ತು
  ಹೇಳ ಹೆಸರಿಲ್ಲದೆ ಹೊರಟು ಹೋಗುವ ಆಗುಂತಕ
  ಅದರ ಜಾಡು ಹಿಡಿದು ನಾನೆಂದೂ ಹಿಂಬಾಲಿಸಲಿಲ್ಲ
  ನಿನ್ನ ಪರಿಚಯವೇನೆಂದು ಅವುಗಳ ಪ್ರಶ್ನಿಸಲಿಲ್ಲ

  ಮುಂದೊಮ್ಮೆ ನಾ ಈ ರೀತಿ ನಸುನಕ್ಕರೆ ನೀನೂ
  ಹಿಂದಿರುಗಿ ನೋಡಿ ಓಮ್ಮೆ ನಕ್ಕುಬಿಡು ಮನದೊಡತಿ
  ಏಕೆಂದರೆ ನೀ ಕೇಳುವ ಪ್ರೆಶ್ನೆಗಳಿಗೆ ಉತ್ತರಿಸಬೇಕಾದ
  ನನ್ನೀ ಮನದ ಮರ್ಮ ಸ್ವತಃ ನಾನೂ ಅರಿಯೆ

  - ತೇಜಸ್ವಿ .ಎ.ಸಿ

ಅಣಿಗೊಳಿಸು

 ಅಣಿಗೊಳಿಸು 

 ಖಾಲಿ ಮನಸಿನ ಒಳ ಹೊಕ್ಕು 

 ಸುಂದರ ರೇಖೆಯ ಚಿತ್ರವ ಬಿಡಿಸಿ 

 ವಿಧ ವಿಧ ಬಗೆಯ ಬಣ್ಣವ ಮೂಡಿಸಿ

 ರಮ್ಯ ಪ್ರಕೃತಿಯ ಹಿನ್ನಲೆಯಿರಿಸಿ   

 ಅದ್ಭುತ ಘಟನೆಗಳ ಸರಣಿ ಪೋಣಿಸಿ   

 ವಿವಿಧ ಭಾವಗಳ ಭಾವನೆ ತೋರಿಸಿ  

 ಹೊಸ ಅನುಭವದ ರಸದೌತಣ ಬಡಿಸಿ 

 ಮನಕೆ ಆಹ್ಲಾದತೆಯ ಸಂತಸ ಕೊಡಿಸಿ      

 ನಿಧಾನವಾಗಿ ಸಿದ್ದ ಪಡೆಸುವೇ ನನ್ನನು

 ಹೊಸ ಕವನವ ಬರೆಯಲು ಅಣಿಗೊಳಿಸಿ 
 

 - ತೇಜಸ್ವಿ.ಎ.ಸಿ 

ಸರತಿ ಸಾಲು

  ಸರತಿ ಸಾಲು

  ನನ್ನ ಬದುಕಿನ ನಡು ಯೌವನದಿ
  ಬದುಕಿನ ಗುರಿಗಳ ಪಟ್ಟಿಯ ಹಿಡಿದು,
  ಜಾಣ ಯೋಜನೆಗಳನ್ನೆಲ್ಲ ರೂಪಿಸಿ
  ಕಾರ್ಯಶೀಲನಾಗಿ ಅವಕೆ ದುಡಿದು

  ಸಂಭ್ರಮಿಸಿದ್ದೆ ನಾನಂದು, ಕೆಲಸ
  ಕಾರ್ಯಗಳೆಲ್ಲಾ ಮುಗಿದಿದೆ ಎಂದು,
  ಮರು ದಿನದಲೂ ಕಾಣತೊಡಗಿತು
  ಕೆಲಸ ಕಾರ್ಯಗಳು ಒಂದೊಂದೇ

  ಹಳೆಯ ಅಭ್ಯಾಸದಂತೆ ಮಾಡಿದೆ
  ಅವುಗಳೆಲ್ಲದರ ಹೊಸ ಪಟ್ಟಿಯನು,
  ಕೊಡುತ ನಾ ಸಾಗಿದೆ ಎಲ್ಲ ಕಾರ್ಯಕೆ
  ಆದ್ಯತೆಯ ಮೇರೆಗೆ  ಸಂಖ್ಯೆಯನು

  ಮತ್ತೊಮ್ಮೆ ಎಲ್ಲಾ ಮುಗಿಸಿ ಆಶಿಸಿದೆ,
  ಬರೀ ವಿನೋದ ವಿರಾಮದ ದಿನಗಳ
  ಮರು ದಿನವು ಕಂಡೆ ನಾ ಕೆಲಸಗಳ,
  ತಿಳಿಯಿತಂದು ಜೀವನದ ಹೊಸ ಅರ್ಥ

  ಜೀವನವಿದು ಕೆಲಸಗಳ ಸರತಿಸಾಲು
  ಮುಗಿಯದು ಬದುಕಿನ ಕಾರ್ಯಗಳು
  ಜೀವನ ನಿರ್ವಹಣೆಯೇ ನಿತ್ಯದ ಕಾರ್ಯ
  ಕೆಲಸದ ಸಾಲಿದು ನಮಗನಿವಾರ್ಯ

  - ತೇಜಸ್ವಿ.ಎ.ಸಿ

ಪ್ರೀತಿಯಿಂದ

   ಪ್ರೀತಿಯಿಂದ  

   ಕವಿಮನದ ಸಹಜ ಆಸೆ ಬಿಟ್ಟು 

   ಬದುಕ ಕಟ್ಟುವ ಕಾರ್ಯ ಹೊತ್ತು

   ದುಡಿಯುತಿರುವೆ ಬದುಕಿಗಾಗಿ 

   ಅನ್ಯರ ಸಂಸ್ಥೆಗೆ ಹೆಗಲ ಕೊಟ್ಟು

   ನನ್ನೊಳಗಿನ ಕವಿಯು ರಾಜಿ ಮಾಡಿ

   ಅನ್ಯರ ವ್ಯವಹಾರಕೆ ಹಾದಿ ಮಾಡಿ 

   ದುಡಿಯುತಿರುವೆ ಆಸೆಗಳ ಮುಂದೂಡಿ    

   ಬದುಕ ಕಟ್ಟುವನೆಂಬ ಗುರಿಯ ಇಟ್ಟು

   ವಾರದ ದಿನಗಳ ಕಚೇರಿ ಕೆಲಸ
   ವಾರಾಂತ್ಯದ ಸಂಸಾರದ ಕೆಲಸ 
   ಕಾರ್ಯಗಳಲೇ ಮುಳುಗುತಿರುವೆ  
   ಸಾಹಿತ್ಯ ಕೃಷಿಯ ಆಸೆಯ ಬಿಟ್ಟು 

   ಬದುಕ ಕಟ್ಟುವ ಕಾರ್ಯವೂ ಇರಲಿ
   ಸಂಸಾರ ನೊಗದ ಭಾರವೂ ಇರಲಿ
   ಹೊಂದಿಕೊಂಡೇ ಸಾಗಿಸುವೆ ನನ್ನೀ  
   ಹವ್ಯಾಸವ, ಕೊಂಚ ಹೊತ್ತ ಮೀಸಲಿಟ್ಟು

   ಹವ್ಯಾಸಕುಂಟು ಬತ್ತದ ಉತ್ಸಾಹ
   ಎಲ್ಲ ಕಾಲದಲ್ಲುಂಟು ಸ್ವಪ್ರೋತ್ಸಾಹ
   ಅಂತಾರಾಳದ ಸಹಜ ಮಾತುಗಳಿವು
   ಕವನ ರಚಿಸುವೆ ನಾ ಪ್ರೀತಿಯಿಟ್ಟು

   - ತೇಜಸ್ವಿ.ಎ .ಸಿ

ಧರೆಗಿಳಿದ ಕಂದ

  ಧರೆಗಿಳಿದ ಕಂದ

  ಧರೆಗಿಳಿದು ಬಂದ ನನ್ನಯ ಕಂದ
  ಅಂದಾಯಿತು ಎನಗೆ ಮಹದಾನಂದ

  ವೈದ್ಯರಿತ್ತರು ಮಗನನು ಅಪ್ಪನ ಕೈಗೆ
  ಕಣ್ತುಂಬಿ ಬಂತಂದು ಸಂತಸ ಎನಗೆ

  ಬಟ್ಟಲು ಕಂಗಳಲಿ ನೋಡಿದ ಕಂದ
  ಮುದ್ದು ಮೊಗವು ನೋಡಲು ಚೆಂದ

  ಸಿಹಿ ಸುದ್ದಿಯನೆಲ್ಲೆಡೆ ಹಂಚಿದೆ ನಾನು
  ಮನೆಯವರ ಹರುಷಕೆ ಮಿತಿಯುನ್ಟೇನು

  ಜೀವನದ ದೃಷ್ಟಿಯೇ ಬದಲಾಯಿತೀಗ
  ಮುದ್ದು ಮಗನ ಆರೈಕೆಯೆ ಜೀವನವೀಗ

  ಕಂದನ ಮಡಿಲಲ್ಲೇ ಇರಿಸುವೆ ನಾನು
  ಮುದ್ದಿಸಿ ಆಡಿಸಿ ಮಲಗಿಸುವೆ ಅವನನ್ನು

  ನೀಡುವೆ ಉತ್ತಮವಾದ ಬದುಕಿನ ಪಾಠ
  ತೋರುವೆ ಸುಂದರ ಜೀವನದ ನೋಟ

  - ತೇಜಸ್ವಿ .ಎ.ಸಿ
    ಲಂಡನ್, ಯು.ಕೆ

ಬದಲಾವಣೆಯ ಗಾಳಿ

 ಬದಲಾವಣೆಯ ಗಾಳಿ
 

 ಬದುಕ ತಿರುವುಗಳ ಹಿಂದೆ ಮರೆಮಾಚಿವೆ ಮುಖಗಳು             

 ನಾವು ಕಂಡಿರದ ಒಳಮುಖಗಳ ನಿಜ ದರುಶನವಿತ್ತು 

 ಸಂಬಂಧದ ಸಂಕೋಲೆಗಳ ಸಡಿಲತೆಯ ತಿಳಿಸುತ್ತ

 ನವವಾಸ್ತವವ ತೋರಿ, ಸಂಬಂಧದ ಸೂಕ್ಷ್ಮತೆಯನು 

 ದ್ವಂದ್ವದಲಿ ಸಿಲುಕಿಸಿ, ಮೃದು ಮನದೊಡು ಆಟವಾಡಿದೆ
   

 ಹೊಸ ಚಿಗುರು ಬೆಳೆಯುವ ಪ್ರಕೃತಿಯ ನಿಯಮದಂತೆ  

 ಮುಂದಿನ ತಿರುವಿನಲ್ಲಿ ಹೊಸ ಸಂಬಂಧಗಳು ಸೇರಿ

 ಜೀವನದಿ ಬತ್ತದ ಉತ್ಸಾಹವನ್ನಿತ್ತು, ಇರುವ ಚಿಲುಮೆಯ  

 ನವೀಕರಿಸುತ್ತ, ಬದುಕಿಗೆ ಹೊಸ ದಿಕ್ಕಿನಲ್ಲಿ ಗಮ್ಯವನಿತ್ತು

 ಹೊಸ ಬದಲಾವಣೆಯ ಗಾಳಿಯು ಬೀಸಿದೆ ಜೀವನದಲಿ.

 - ತೇಜಸ್ವಿ.ಎ.ಸಿ