ಹಬ್ಬಗಳ ಸಂಭ್ರಮಿಸಿದ ಪುಟ್ಟ

  ಹಬ್ಬಗಳ ಸಂಭ್ರಮಿಸಿದ ಪುಟ್ಟ


  ಪುಟ್ಟ ಅನುಭವಿಸಿದ ದಸರ ರಜಾದ ಮಜಾನ
  ಹಬ್ಬಕ್ಕೆ ಹೋಗಿದ್ದ ತಿರುಗಲು ಅಜ್ಜಿಯ ಊರನ್ನ

  ಅಜ್ಜಿಯ ಮನೆಯಲ್ಲಿ ಕೂಡಿಸಿದ್ದರು ಬೊಂಬೆಗಳ
  ಬೊಂಬೆಯ ಕೂರಿಸಿ ಆಹ್ವಾನಿಸಿದ್ದರು ಜನಗಳ

  ಹಬ್ಬದಿ ಹೊಸ ಬಟ್ಟೆ ಧರಿಸಿ ಕುಣಿದ ಅಣ್ಣನೊಡನೆ
  ದೊಡ್ಡ ಬೊಂಬೆಗಾಗಿ ಜಗಳಕ್ಕಿಳಿದ ಎಲ್ಲರೊಡನೆ

  ಕೊನೆಗೆ ದಸರೆಯ ರಜವು ಮುಗಿಯುತ ಬಂದಿತು
  ಅಜ್ಜಿಗೆ ಪುಟ್ಟನ ತರಲೆಗಳಿಂದ ಬಿಡುಗಡೆ ಸಿಕ್ಕಿತು

  ಬಸ್ಸನು ಹತ್ತಲು ಗಂಟು ಮೂಟೆ ಕಟ್ಟಿದ ಪುಟ್ಟ
  ಅಜ್ಜಿಯು ಕೊಟ್ಟ ಉಂಡೆಗಳ ಹೊತ್ತು ಹೊರಟ

  ಶಾಲೆಯಲ್ಲಿ ಶುರುವಾದವು ಪಾಠ ಪ್ರವಚನ
  ಅಪ್ಪನೂ ಕೂರಿಸಿ ಹೇಳಿದರು ಓದುವ ಬುದ್ದಿನ

  ಕೇಳಬೇಕಲ್ಲ ತರಲೆ ಮಾಡುವ ಚಿಕ್ಕ ವಯಸ್ಸು
  ಹೇಳಿದಕ್ಕೆಲ್ಲ ತಲೆಯಾಡಿಸಿತು ಎಳೆಯ ಮನಸ್ಸು

  ಕೆಲವೇ ದಿನಗಳಲ್ಲಿ ದೀಪಾವಳಿ ಹತ್ತಿರ ಬಂದಿತು
  ಪಟಾಕಿಗಳ ಹೊಡೆಯಲು ಅವಕಾಶವ ತಂದಿತು

  ಪಟಾಕಿ ಕೊಡಿಸಲು ಪುಟ್ಟನು ಹತ್ತಿದ ಅಪ್ಪನ ಬೆನ್ನು
  ಪಟಾಕಿ ಹಚ್ಚಲು ಅಜ್ಜಿ ಮನೆಗೆ ಕಳಿಸಿದರು ಅವನನ್ನು

  ಸಿಕ್ಕಿತು ಅವಕಾಶ ಅಣ್ಣನೊಂದಿಗೆ ಹಚ್ಚಲು ಪಟಾಕಿ
  ಅಜ್ಜಿಗೆ ಮತ್ತೆ ಸಿಕ್ಕಿದ ತರಲೆಗಳ ಮಾಡುವ ಗಿರಾಕಿ

  ಸಂಭ್ರಮವಾಗಿದೆ ಪುಟ್ಟನಿಗೆ ಹಬ್ಬದ ರಜಾ ದಿನಗಳು
  ಹೀಗೆ ಸಾಗಿದೆ ತುಂಟ ಪುಟ್ಟನ ಬಾಲ್ಯದ ಆಟಗಳು

  - ತೇಜಸ್ವಿ.ಎ.ಸಿ